Go ba yo mokgethwa ke go dira dilo tše di hlwekilego. Lentšu leo le fetoletšwego e le “kgethwa,” le tšwa lentšung la Seheberu leo le bolelago gore “go arola.” Ka baka leo, selo seo e lego se sekgethwa se dirišwa, le go swarwa ka tsela e kgethegilego, kudukudu ka ge se hlwekile e bile se sekile.

 Modimo ke yo mokgethwa go feta sebopiwa le ge e le sefe. Beibele e re: “Ga go yo mokgethwa go swana le Jehofa.” a (1 Samuele 2:2) Ka gona ke yena fela a swanetšego go re beela melao ya dilo tše di kgethwa le tšeo e sego tše di kgethwa.

 Lentšu “kgethwa” le ka dirišwa selong se sengwe le se sengwe seo sepedišanago le Modimo, kudukudu dilo tšeo di beetšwego ka thoko gore di dirišwe nakong ya borapedi. Ka mohlala, Beibele e bolela ka:

•   Mafelo a makgethwa: Ge Moshe a be a le kgaufsi le sehlare seo se bego se tuka mollo, Modimo o ile a mmotša gore: “Lefelo leo o emego go lona ke naga e kgethwa.”​—Ekisodo 3:2-5.

•   Ditiragalo tše kgethwa: Baisiraele ba bogologolo ba be ba rapela Jehofa menyanyeng yeo e bitšwago “dikopano tše kgethwa.”​—Lefitiko 23:37.

•   Dilo tše dikgethwa: Dilo tšeo di bego di dirišwa tempeleng kua Jerusalema bakeng sa go rapela Modimo, di be di bitšwa “dibjana . . . tše kgethwa.” (1 Dikgoši 8:4) Batho ba be ba swanetše go swara dibjana tšeo ka tsela e hlomphegago kudu, eupša ba be ba se ba swanela go di rapela. b

 Ee. Modimo o neile Bakriste taelo ya gore: “Ebang ba bakgethwa, ka gobane nna ke yo mokgethwa.” (1 Petro 1:16) Eupša batho ba ka se be ba bakgethwa go swana le Modimo ka ge ba belegwe le sebe. Lega go le bjalo, batho bao ba kwago melao ya Modimo ba ka lebelelwa e le ba ‘bakgethwa, e bile ba amogelega go Modimo.’ (Baroma 12:1) Motho yoo a lwelago go ba yo mokgethwa o bontšha seo ka ditiro le dipolelo tša gagwe. Ka mohlala, o kwa keletšo ya Beibele yeo e rego, re be ba ‘bakgethwa e bile re ile bootswa’ le e rego, ‘re be ba bakgethwa boitshwarong bja rena ka moka.’—1 Bathesalonika 4:3; 1 Petro 1:15.

 Ee. Ge e ba motho a tlogela go phela ka go dumelelana le melao ya Modimo ya boitshwaro, Modimo a ka se sa mo lebelela e le yo mokgethwa. Ka mohlala, le ge puku ya Baheberu e ngwaletšwe ‘bana babo rena ba bakgethwa,’ go na le moo e ba lemošago gore ba se be le “pelo e kgopo ya go hloka tumelo ka go katologela kgole le Modimo yo a phelago.”​—Baheberu 3:1, 12.

 Maaka: Go se tsenele thobalano go dira gore motho e be yo mokgethwa le go feta.

 Therešo: Le ge Mokriste a ka kgetha go se nyale goba go se nyalwe, go se tsenele thobalano ga go bolele gore ke yo mokgethwa go Modimo. Ke therešo gore batho bao ba sego ba nyala goba go nyalwa ba ka kgona go dira dilo tša Modimo ntle le tšhitišo. (1 Bakorinthe 7:32-34) Lega go le bjalo, Beibele e bontšha gore batho bao ba lego lenyalong le bona e ka ba ba bakgethwa. Ka mohlala, yo mongwe wa baapostola ba Jesu, e lego Petro, o be a nyetše.​—Mateo 8:​14; 1 Bakorinthe 9:5.