Ga se phošo go boifa lehu le go gata megato ya maleba go šireletša maphelo a rena ka ge lehu e le lenaba. (1 Bakorinthe 15:26) Lega go le bjalo, go boifa lehu ka tsela e sa kwagalego moo go theilwego dithutong tša maaka goba go ditumelakhwele go dira gore batho ba be “bokgobeng bophelo bja bona ka moka.” (Baheberu 2:15) Go tseba therešo go tla go lokolla gore o se boife lehu ka tsela e sa kwagalego—e lego poifo yeo e ka dirago gore motho a se thabele bophelo.—Johane 8:32.

Therešo ka lehu

•   Bahu ga ba kwe selo. (Psalme 146:4) Ga se wa swanela go boifa gore o tla kwa bohloko goba wa tlaišwa ge o hwile, ka gobane Beibele e bapiša lehu le boroko.—Psalme 13:3; Johane 11:11-14.

•   Bahu ba ka se re gobatše. Gaešita le bao e bego e le manaba a rena a šoro ‘ga ba na matla ge ba hwile.’ (Diema 21:16, mongwalo wa tlase) Beibele e re “lehloyo la bona le lehufa la bona di fedile.”—Mmoledi 9:6.

•   Lehu ga le re gore go napile go fedile ka rena. Modimo o tla tsoša bahu.—Johane 5:28, 29; Ditiro 24:15.

•   Modimo o re holofetša gore go tla ba le nako ya ge “lehu le ka se hlwe le sa ba gona.” (Kutollo 21:4) Ge Beibele e bolela ka letšatši leo, e re: “Baloki bona e tla ba beng ba lefase, ba tla dula mo go lona ka mo go sa felego,” ba sa boife gore ba tla hwa.—Psalme 37:29.