Beibele e bontšha gore motho o swanetše go ithata go fihla tekanyong e itšego. Go ithata go akaretša go itlhokomela, go itlhompha le go lemoga gore o bohlokwa. (Mateo 10:31) Beibele ga e kgothaletše gore re be le boithati, go e na le moo e re re se ke ra ithata ka tsela e feteletšego.

Ke mang yo re swanetšego go mo rata pele?

1.   Modimo ke yena wa mathomo yo re swanetšego go mo rata ka dipelo tša rena ka moka. Beibele e ruta gore taelo e kgolokgolo ke ya gore: “O rate Jehofa Modimo wa gago ka pelo ya gago ka moka.”​—Mareka 12:28-​30; Doiteronomio 6:5.

2.   Taelo ya bobedi e kgolokgolo ke ya gore: “O rate moagišani wa gago ka mokgwa wo o ithatago ka wona.”​—Mareka 12:31; Lefitiko 19:18.

3.   Beibele ga e bolele ka go lebanya taelo ya gore o ithate, eupša taelo ya gore o “rate moagišani wa gago ka mokgwa wo o ithatago ka wona” e bontšha gore go ithata ka tekanyo e itšego le go itlhompha ke ga tlhago e bile go na le mohola.

Ke mang yo Jesu a mo ratago go feta batho ka moka?

 Jesu o re bontšhitše gore re ka dira’ng gore re be le tekatekano tabeng ya go rata Modimo, baagišani ba rena le go ithata. Ka gona o ile a botša barutiwa ba gagwe gore ba latele mohlala wa gagwe.​—Johane 13:34, 35.

1.   Jesu o rata Jehofa Modimo go feta batho ka moka, e bile o ile a ba a ineela go dira modiro wo Jehofa a bego a mo laetše gore a o dire. Jesu o itše: “E le gore lefase le tsebe gore ke rata Tate, ke dira tšeo Tate a ntaetšego gore ke di dire.”​—Johane 14:31.

2.   Jesu o be a rata baagišani ba gagwe, o ile a bontšha seo ka go ba thuša moo mafelelong a ilego a ba hwela.​—Mateo 20:28.

3.   O ile a bontšha gore o a ithata ka ge a be a fela a khutša, a eja e bile a thabela go ba gotee le balatedi ba gagwe le bao e bego e tlo ba barutiwa ba gagwe.​—Mareka 6:​31, 32; Luka 5:​29; Johane 2:​1, 2; 12:2.

Na go rata batho ba bangwe go feta kamoo o ithatago ka gona go ka dira gore o se thabe goba o se itlhomphe?

 Aowa, ka gobane re bopilwe ka seswantšho sa Modimo, yoo seka sa gagwe se segolo e lego lerato. (Genesi 1:​27; 1 Johane 4:8) Seo se bolela gore ka tlhago re ka kgona go rata batho ba bangwe. Ke nnete gore re swanetše go ithata, eupša ge re ka rata Modimo go feta dilo ka moka le go dula re nyaka go direla ba bangwe dilo tše dibotse, re tla thaba le go feta. Beibele e re, “go na le lethabo le legolo go neeng go feta go amogeleng.”​—Ditiro 20:35.

 Batho ba bantši lehono ba re lethabo le tlišwa ke ge motho a kgotsofatša pelo ya gagwe gomme a se na taba le batho ba bangwe. Go batho ba, taelo yeo e rego “o rate moagišani wa gago” e tšeetšwe legato ke yeo ba ipeetšego yona ya gore “o ithate.” Eupša, le lehono batho bao ba phelago ka go dumelelana le taelo ya Beibele e rego: “Anke yo mongwe le yo mongwe a tšwele pele a tsoma seo se holago motho yo mongwe, e sego seo se holago yena a nnoši,” ba dula ba thabile e bile ba phetše gabotse mmeleng.​—1 Bakorinthe 10:24.