Ee! Beibele e tšwa go “Modimo yo a homotšago bao ba nyamilego.” (2 Bakorinthe 7:6) Le ge Beibele e se puku ya go bolela ka malwetši a monagano, e thušitše batho ba bantši bao ba bego ba nyaka go ipolaya. E na le keletšo e botse yeo le wena e ka go thušago.

•  Beibele e fa keletšo efe e botse?

•  Na Beibele e re botša ka batho bao ba bego ba nyaka go hwa?

•  Ke ditemana dife tša Beibele tšeo di ka go thušago gore o se sa ikwa o nyaka go ipolaya?

•  O tla dira’ng ge mogwera wa gago a ka re, “Ke nyaka go hwa”?

•  Nka dira’ng ge e ba nkile ka leka go ipolaya?

• ● Botša ba bangwe gore o ikwa bjang.

   Beibele e re: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.”—Diema 17:17.

   Se se ra gore: Re hloka thušo ya ba bangwe ge re gateletšegile.

   Ge o sa botše ba bangwe kamoo o ikwago ka gona, mathata a gago a ka go imela kudu. Ge o botša ba bangwe kamoo o ikwago ka gona o ka ikwa o le kaone gomme wa se sa gateletšega kudu.

   Leka go dira se: Bolela le motho yo mongwe lehono, e ka ba e le wa leloko goba mogwera wa gago yo o mo tshepago. a O ka ngwala kamoo o ikwago ka gona.

• ● Nyaka thušo go batho bao ba ithutetšego ka tša bolwetši bja tša monagano.

   Beibele e re: “Batho ba ba phetšego gabotse ga ba nyake ngaka, eupša ba babjago ba a e nyaka.”—Mateo 9:12.

   Se se ra gore: Ge re babja re swanetše go nyaka thušo go batho bao ba nago le tsebo ka bolwetši bjoo.

   Go nagana ka go ipolaya go ka ba go bontšha gore re na le bolwetši bja monagano goba re gateletšegile. Go no swana le ge re babja re eya go bona ngaka, le ge re ikwa re nyaka go ipolaya, ga se ra swanela go lewa ke dihlong tša gore re kgopele thušo. Bolwetši bja monagano bo ka alafega.

   Leka go dira se: Kgopela ngaka yeo e nago le bokgoni gore e go thuše kapelapela.

• ● Gopola gore Modimo o na le taba le wena.

   Beibele e re: “Na dithaga tše hlano ga di rekišwe ka ditšhelete tša tšhipi tše pedi tša theko e nyenyane? Lega go le bjalo, ga go le e tee ya tšona ye e lebalwago pele ga Modimo. . . . Le se ke la boifa; le ba bohlokwa go feta dithaga tše dintši.”—Luka 12:6, 7.

   Se se ra gore: O bohlokwa kudu go Modimo.

   O ka ikwa eka ga gona motho yoo a nago taba le wena. Eupša Modimo o bona mathata a gago ka moka. O tloga a na le taba le wena, le ge e ba o ikwa o se sa nyaka go phela. Psalme 51:17 e re: “Pelo e robegilego le e setlegilego o ka se e nyatše, wena Modimo.”

   Leka go dira se: Ithute ka bohlatse bjoo bo lego ka Beibeleng bjoo bo bontšhago gore Modimo o a go rata. Ka mohlala, o ka bala kgaolo 24 ka pukung ya go ithuta Beibele ya Batamela Kgaufsi le Jehofa.

• ● Rapela Modimo.

   Beibele e re: ‘Lahlela dipelaelo tša gago ka moka go Modimo, gobane o a go hlokomela.’—1 Petro 5:7.

   Se se ra gore: Modimo o nyaka gore o mmotše gore o ikwa bjang le gore ke eng seo se go tshwenyago.

   Modimo a ka go nea khutšo ya monagano le matla a gore o kgone go kgotlelela. (Bafilipi 4:6, 7, 13) Ka go dira se, o tla be a bontšha gore o thekga bao ba mo rapelago ka pelo ka moka.—Psalme 55:22.

   Leka go dira se: Rapela Modimo lehono. O diriše leina la gagwe Jehofa gomme o mmotše gore o ikwa bjang. (Psalme 83:18) Mo kgopele gore a go thuše go kgotlelela.

• ● Naganišiša ka dilo tše dibotse tšeo Modimo a re tshepišago go tlo re direla tšona nakong e tlago.

   Beibele e re: “Re na le kholofelo ye e le bjalo ka tshetledi ya sekepe ya maphelo a rena, e kgonthišeditšwego le e tiilego.”—Baheberu 6:19.

   Se se ra gore: Tsela yeo o ikwago ka yona e ka fetofetoga go swana le sekepe seo se tšeatšeago ke ledimo. Eupša go naganišiša ka dilo tšeo Modimo a re tshepišago go tlo re direla tšona nakong e tlago go a re matlafatša.

   Dilo tšeo Modimo a re tshepišago tšona ga e no ba toro feela, ka gobane o re tshepiša gore o tlo tloša dilo tšeo di re kwešago bohloko.—Kutollo 21:4.

   Leka go dira se: Bala thuto 5 ya poroutšha ya Ditaba tše Dibotse tše di Tšwago go Modimo! gore o kwe ka tše dingwe tša dilo tšeo Modimo a re tshepišitšego go tlo re direla tšona.

• ● Dira selo seo o se ratago.

   Beibele e re: “Pelo e thabilego e etša sehlare se se fodišago.”—Diema 17:22.

   Se se ra gore: Ge e ba re dira dilo tšeo re di ratago, se se ka dira gore re ikwe re le kaone goba re sa gateletšege kudu.

   Leka go dira se: Dira selo seo o thabelago go se dira. Ka mohlala, o ka theetša mmino, wa bala selo se itšego seo se kgothatšago goba wa dira mošongwana o itšego. Le gona o tlo thaba kudu ge o ka dira se sengwe go thuša ba bangwe le ge e le selo se se nyenyane.—Ditiro 20:35.

• ● Hlokomela mmele wa gago.

   Beibele e re: “Go tlwaetša mmele go [a] hola.”—1 Timotheo 4:8.

   Se se ra gore: Re tlo holega ge re itšhidulla, re robala ka mo go lekanego le go ja dijo tšeo di nago le phepo.

   Leka go dira se: Itšhidolle ka go sepela ka maoto le ge e ka ba metsotso e 15 feela.

• ● Gopola gore tsela yeo re ikwago ka yona le dilo tše dingwe mo bophelong di a fetoga.

   Beibele e re: Ga o “tsebe gore bophelo bja lena bo tla ba bjang gosasa.”—Jakobo 4:14.

   Se se ra gore: Mathata ao a kgateletšago ao re nago le ona, go akaretša leo re bonago eka re ka se kgone go a rarolla e ka ba a nakwana.

   Go sa šetšwe gore lehono o lebeletšane le bothata bjoo o bonagalago eka ga bona tharollo, gosasa dilo di ka fetoga. Nyaka ditsela tšeo di ka go thušago gore o lebeletšane le bothata bja gago. (2 Bakorinthe 4:8) Mohlomongwe ge nako e dutše e eya, bothata bjoo o lebeletšanego le bjona bo ka fetoga. Eupša ge o ka ipolaya, seo se ka se fetoge.

   Leka go dira se: Bala ka batho ba ka Beibeleng bao ba ilego ba ikwa ba nyamile kudu moo ba ilego ba ikwa eka ba ka hwa, gomme o bone gore mafelelong go tlile bjang gore bophelo bja bona bo fetoge ka tsela yeo ba bego ba sa nagana. A re kwe e mengwe ya mehlala ya batho bao.

 Ee. Ge e le gabotse Beibele e re botša ka batho ba bangwe bao ba bego ba nyaka go hwa. Modimo ga se a ka a ba omanya eupša o ile a ba thuša. Le wena a ka go thuša.

Eliya

•  ● Eliya e be e le mang? E be e le moporofeta wa Modimo yoo a bego a na le sebete. Eupša ka dinako tše dingwe le yena o be a fela a ikwa a nyamile kudu. Jakobo 5:17 e re: “Eliya e be e le motho yo a nago le maikwelo a swanago le a rena.”

•  ● Ke ka baka la’ng a be a nyaka go hwa? Nakong e nngwe, Eliya o ile a ikwa a le noši, a boifa e bile a se na mohola. Ka gona o ile a rapela ka gore: “Wena Jehofa, tšea moya wa ka.”—1 Dikgoši 19:4.

•  ● O ile a thušwa ke’ng? Eliya o ile a botša Modimo kamoo a bego a ikwa ka gona. Modimo o ile a mo kgothatša bjang? Modimo o ile a bontšha Eliya gore o na le taba le yena le gore o na le matla kudu. Le gona o ile a kgonthišetša Eliya gore o be sa le bohlokwa gomme a mo nea le motho yoo a bego a tseba gore o tlo kgona go mo thuša le go mo hlokomela.

•  ▸ Bala ka Eliya: 1 Dikgoši 19:2-18.

Jobo

•  ● Jobo e be e le mang? Jobo e be e le monna yoo a bego a humile, yoo a bego a na le lapa le legolo e bile a hlankela Modimo wa therešo ka go botega.

•  ● Ke ka baka la’ng a be a nyaka go hwa? Jobo o ile a diragalelwa ke dilo tše dintši tše mpe a sa nagana. O ile a lahlegelwa ke selo se sengwe le se sengwe seo a bego a na le sona. Bana ba gagwe ka moka ba ile ba bolawa ke kotsi ya tlhago. O ile a swarwa ke bolwetši bjo šoro, le gona o ile a latofatšwa ka gore ke yena a ipaketšego mathata ao ka moka. Jobo o itše: “Ke ganne bophelo; nka se phele go iša mehleng ya neng le neng.”—Jobo 7:16.

•  ● O ile a thušwa ke’ng? O ile a rapela Modimo a ba a bolela le batho ba bangwe. (Jobo 10:1-3) O ile a kgothatšwa ke mogwera wa gagwe yo mogolo e lego Elihu, yoo a ilego a mo thuša gore a bone dilo ka leihlo le lengwe. Jobo o ile a amogela keletšo le thušo e tšwago go Modimo.

•  ▸ Bala ka Jobo: Jobo 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moshe

•  ● Moshe e be e le mang? Moshe e be e le moetapele wa Baisiraele ba mehleng ya kgale e bile e le moporofeta yoo a botegago wa Modimo.

•  ● Ke ka baka la’ng a be a nyaka go hwa? Moshe o be a na le mošomo o montši e bile Baisiraele ba dula ba mo tshwenya gomme seo sa dira gore a ikwe a lapile kudu. Ka baka leo, o ile a kgopela Modimo gore: “Mpolaye hle.”—Numeri 11:11, 15.

•  ● O ile a thušwa ke’ng? O ile a botša Modimo kamoo a bego a ikwa ka gona. Modimo o ile a fokoletša Moshe mošomo gore a se sa ba le stress.

•  ▸ Bala ka Moshe: Numeri 11:4-6, 10-17.