Na Thuto ya Mabapi le go Tswalwa Lefsa e tšwa ka Beibeleng?
Karabo ya Beibele
Aowa, ga e tšwe ka Beibeleng. Le polelwana “go tswalwa lefsa” goba kgopolo ya yona ga di tšwelele ka Beibeleng. Batho ba dumela tabeng ya go tswalwa lefsa ka ge ba rutilwe gore moya ga o hwe. a Lega go le bjalo, Beibele e ruta gore motho ka boyena ke moya e bile moya woo o a hwa. (Genesi 2:7; Hesekiele 18:4) Ge motho a ehwa, o kgaotša go ba gona.—Genesi 3:19; Mmoledi 9:5, 6.
Phapano ke efe magareng ga go tswalwa lefsa le tsogo ya bahu?
Seo Beibele e se rutago ka tsogo ya bahu ga se sa thewa tabeng ya gore moya ga o hwe. Modimo o tla diriša matla a gagwe go tsoša bao ba hwilego gore ba phele gape. (Mateo 22:23, 29; Ditiro 24:15) Tsogo ya bahu e nea batho kholofelo e botse ya go tlo phela lefaseng le lefsa, moo ba ka se kego ba hwa le ka mohla.—2 Petro 3:13; Kutollo 21:3, 4.
Dikgopolo tše di fošagetšego mabapi le go tswalwa lefsa le Beibele
Maaka: Beibele e re moporofeta Eliya o ile a tswalwa lefsa gomme a ba Johane Mokolobetši.
Therešo: Modimo o boletše e sa le pele gore: “Ke le romela moporofeta Eliya,” gomme Jesu o ile a bontšha gore Johane Mokolobetši o phethagaditše boporofeta bjoo. (Maleaki 4:5, 6; Mateo 11:13, 14) Lega go le bjalo, se ga se bolele gore Eliya o tswetšwe lefsa e le Johane Mokolobetši. Johane ka boyena o ile a bolela gore ga se yena Eliya. (Johane 1:21) Eupša o be a dira modiro wa go swana le wa Eliya wa go kwatša molaetša wa Modimo go batho gore ba itshole. (1 Dikgoši 18:36, 37; Mateo 3:1) E bile Johane o ile a bontšha gore o na le “matla go swana le moporofeta Eliya.”—Luka 1:13-17, Good News Translation.
Maaka: Ge Beibele e bolela ka go tswalwa lefsa e ra “go tswalwa gape.”
Therešo: Beibele e bontšha gore go tswalwa gape ke ge motho a thoma go bontšha a sa phela gore o dumela go Modimo. (Johane 1:12, 13) Go tswalwa gape mo go bolelwago ka gona, ga se go phema ditlamorago tša ditiro tša rena tša nakong e fetilego, eupša ke tšhegofatšo yeo re e newago ke Modimo, gomme bao ba e amogelago ba ba le kholofelo ya moswananoši ya go tlo phela nakong e tlago.—Johane 3:3; 1 Petro 1:3, 4.
a Ditumelo tša gore moya ga o hwe le gore batho ba tswalwa lefsa di thomile mehleng ya Babilona ya bogologolo. Ka morago, boradifilosofi ba India ba ile ba hlama thutatumelo ya Karma. Go ya ka Britannica Encyclopedia of World Religions, Karma ke “molao wo o bolelago gore se motho a se dirago bophelong bja gona bjale se tla kgoma bophelo bjo a tlo fetelago go bjona.”—Letlakala 913.
You May Also Like
DIPOTŠIŠO TŠA BEIBELE DI A ARABJA
Go Tswalwa Gape ke Eng?
Na o swanetše go tswalwa gape gore o be Mokriste?
ESSENTIAL BIBLE TEACHINGS
Na Bahu ba a kwa Goba ba a Bona?
Beibele e re tshepiša gore go tlo tla nako yeo batho ba bantši ba tlago go tsošwa bahung, go no swana le Latsaro.
DIPOTŠIŠO TŠA BEIBELE DI A ARABJA
Moya Soul ke Eng?
Na ke selo seo se lego ka gare ga gago? Na e tla tšwela pele e phela le ka morago ga ge o hwile?
DIPOTŠIŠO TŠA BEIBELE DI A ARABJA
Tsogo ya Bahu ke Eng?
O ka makatšwa ke go tseba gore ke bomang bao ba tlago go tsošwa.
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.