Jesu e be e se feela motho wa go loka. Bonyenyane, o itlhatsetše e le motho yo a nago le tutuetšo e matla go feta motho le ge e le ofe yo a kilego a phela. Bona seo boradihistori ba le bangwadi ba tumilego ba se boletšego ka yena:

 “Jesu wa Natsaretha . . . ke motho yo a tsebjago kudu historing.”—H. G. Wells, radihistori wa Leisemane.

 “Bophelo bja [Jesu] bo na le tutuetšo e matla go feta bja motho le ge e le ofe yo a kilego a phela polaneteng ye e bile bo tšwela pele bo kgoma maphelo a batho ba bantši.”—Kenneth Scott Latourette, radihistori le mongwadi wa Moamerika.

 Beibele e bontšha lebaka leo ka lona Jesu a bilego le tutuetšo e matla go feta motho le ge e le ofe wa go loka yo a kilego a phela. Ge Jesu a be a botšiša bagwera ba gagwe ba paale gore ba nagana gore ke yena mang, yo mongwe wa bona o ile a opa kgomo lenaka ka go bolela gore: “Ke wena Kriste, Morwa wa Modimo yo a phelago.”—Mateo 16:16.