Aowa, polanete ya lefase e ka se tsoge ya fedišwa, ya fišwa ka mollo goba gwa tlišwa e nngwe legatong la yona. Beibele e re ruta gore Modimo o bopile lefase le gore batho ba dule go lona go ya go ile.

•   “Baloki bona e tla ba beng ba lefase, Ba tla dula mo go lona ka mo go sa felego.”​—Psalme 37:29.

•   “[Modimo] o theile lefase godimo ga metheo ya lona; Le ka se tsoge le thekesetše go iša mehleng ya neng le neng, le ka mo go sa felego.”​—Psalme 104:5.

•   “Lefase le dula le le gona go iša mehleng ya neng le neng.”​—Mmoledi 1:4.

•   “Mohlami wa lefase le Modiri wa lona, Yena yo a le theilego ka go tia, yo a sa le bopelago lefeela, yo a le hlametšego go dulwa ke batho”​—Jesaya 45:18.

 Modimo a ka se dumelele batho gore ba fediše lefase ka go le šilafatša, ka dintwa goba ka dilo tše dingwe. Go ena le moo, o tlo “senya bao ba senyago lefase.” (Kutollo 11:18) O tlo dira seo bjang?

 Modimo o tla fediša mebušo ya batho yeo e palelwago ke go šireletša lefase, gomme ya tšeelwa legato ke Mmušo wa gagwe wa legodimong. (Daniele 2:44; Mateo 6:9, 10) Kgoši ya Mmušo woo e tla ba morwa wa gagwe Jesu Kriste. (Jesaya 9:6, 7) Nakong ya ge Jesu a be a le mo lefaseng, o ile a thibela dikotsi tša tlhago ka mohlolo. (Mareka 4:35-41) Ka ge Jesu e le kgoši ya Mmušo wa Modimo, o tlo kgona go laola lefase le dilo tšeo di lego mo go lona. Le gona o tla mpshafatša lefase gomme a le dira gore le boele le swane le serapa sa Edene.​—Mateo 19:28; Luka 23:43.

 Aowa. Gantši kgopolo ye e fošagetšego e tlišwa ke go se kwešiše 2 Petro 3:7, yeo e rego: “Magodimo le lefase tšeo gona bjale di lego gona di boloketšwe mollo.” A re boneng dintlha tše pedi tša bohlokwa tšeo di re thušago go kwešiša gobotse seo se bolelwago ke mantšu ao:

1.   Beibele e diriša mantšu “magodimo,” “lefase,” le “mollo” go šupa go dilo tše di fapafapanego. Ka mohlala, Genesi 11:1 e re: “Lefase ka moka le be le bolela leleme letee.” Mo temaneng ye, lentšu “lefase” le šupa go batho.

2.   Ditemana tša kgauswi le 2 Petro 3:7 di bontšha gore ke eng seo se bolelwago ke magodimo, lefase le mollo tšeo go bolelwago ka tšona temaneng ye. Ditemana 5 le 6 di swantšha seo se tlago go direga le seo se diragetšego nakong ya meetsefula a mehleng ya Noa. Mehleng yeo lefase la kgale le ile la fedišwa, eupša polanete ya rena e ile ya no dula e le gona. Ge e le gobotse meetsefula a ile a fediša batho bao ba bego ba rata bošoro goba “lefase” leo le bego le senyegile. (Genesi 6:11) Le gona a ile a fediša “magodimo” goba batho bao ba bego ba buša mo lefaseng ka nako yeo. Ka gona batho ba babe ba ile ba fedišwa, e sego polanete ya rena. Noa le lapa la gagwe ba ile ba phologa ge lefase le be le fedišwa gomme ba tšwela pele ba dula mo lefaseng ka morago ga meetsefula.​—Genesi 8:15-18.

 Go swana le meetsefula a mehleng ya Noa, phedišo goba “mollo,” woo go bolelwago ka ona go 2 Petro 3:7 o tlo fediša batho bao ba sa kwego Modimo e sego lefase le. Modimo o re tshepiša “magodimo a mafsa le lefase le lefsa” moo ‘toko e tlago go aga gona.’ (2 Petro 3:13) “Lefase le lefsa,” goba batho, ba tlo bušwa ke “magodimo a mafsa,” goba Mmušo o mofsa e lego Mmušo wa Modimo. Ge go buša Mmušo wa Modimo lefase e tloba paradeise.​—Kutollo 21:1-4.