Potšišo ya mabapi le morero wa bophelo e ka botšišwa ka ditsela tše dintši, bjalo ka gore: Ke ka baka la’ng re le mo? goba na bophelo bja ka bo na le morero? Beibele e bontšha gore morero wa rena bophelong ke go ba le tswalano le Modimo. Ela hloko tše dingwe tša ditherešo tša motheo tšeo Beibele e bolelago ka tšona.

•   Modimo ke Mmopi wa rena. Beibele e re: “[Modimo] ke yena a re dirilego, ga se ra itira.”—Psalme 100:3; Kutollo 4:11.

•   Modimo o na le morero bakeng sa selo se sengwe le se sengwe seo a se bopago, go akaretša le rena.—Jesaya 45:18.

•   Modimo o re bopile re “nyaka dilo tša moya,” tšeo di akaretšago go kganyoga go tseba morero wa bophelo. (Mateo 5:3) O nyaka gore re kgotsofatše kganyogo yeo.—Psalme 145:16.

•   Re kgotsofatša go nyaka ga rena dilo tša moya ka go gwerana le Modimo. Gaešita le ge batho ba bangwe ba ka bona go sa kgonege gore e be bagwera ba Modimo, Beibele e re nea kgothatšo ye: “Batamelang Modimo gomme o tla le batamela.”—Jakobo 4:8; 2:23.

•   E le gore re be bagwera ba Modimo, re swanetše go phela ka go dumelelana le morero wa gagwe ka rena. Beibele e bolela morero wo go Mmoledi 12:13, yeo e rego: “Boifa Modimo gomme o kwe ditaelo tša gagwe, ka gobane se ke sona seo re bopetšwego go se dira.”—Good News Translation.

•   Nakong e tlago, re tla bona ka botlalo morero wa Modimo wa mathomong ka rena ge a fediša go tlaišega gomme a nea bagwera ba gagwe bao ba mo rapelago bophelo bjo bo sa felego.—Psalme 37:10, 11.