Beibele e ruta gore gare ga diphedi ka moka tše di lego mo lefaseng, ke batho ba sego kae feela bao ba yago legodimong. (Kutollo 14:1, 3) Ba ya moo go buša gotee le Jesu e le dikgoši le baperisita. (Luka 22:28-30; Kutollo 5:9, 10) Batho ba bantši bona ba tlo tsošwa mo lefaseng ka morago ga gore le fetošwe paradeise.—Psalme 37:11, 29.

 Ga go na mo Beibele e bolelago gore diruiwa goba dimpša di ya legodimong, gomme taba ye e ya kwagala. Diphoofolo di ka se kgone go dira dilo tšeo di nyakegago gore di hwetše ‘pitšo ya go ya legodimong.’ (Baheberu 3:1) Dilo tšeo di akaretša go ithuta ka Modimo, go ba le tumelo, le go phela ka melao ya Modimo. (Mateo 19:17; Johane 3:16; 17:3) Ke batho feela bao ba bopetšwego go phela ka mo go sa felego.—Genesi 2:16, 17; 3:22, 23.

 E le gore diphedi tše di lego mo lefaseng se ye legodimong, di tlo swanelwa ke gore di tsošwe bahung. (1 Bakorinthe 15:42) Beibele e bolela ka batho ba sego kae feela bao ba ilego ba tsošwa bahung. (1 Dikgoši 17:17-24; 2 Dikgoši 4:32-37; 13:20, 21; Luka 7:11-15; 8:41, 42, 49-56; Johane 11:38-44; Ditiro 9:36-42; 20:7-12) Eupša ga go na mo e bolelago ka diphoofolo.

•  Na diphoofolo di na le meoya (souls)?

•  Na go a kgonega gore meoya (souls) e hwe?

•  Na diphoofolo di kgona go dira sebe?

•  Na batho ba swanetše go swarwa diphoofolo gampe?

 Aowa. Beibele e re diphoofolo le batho ke meoya. (Numeri 31:28) Ge Modimo a be a bopa motho wa pele e lego Adama, ga se a ka a mo nea moya, eupša Adama o ile a “ba moya o phelago”. (Genesi 2:7) Moya (soul) o dirwa ke dilo tše pedi, e lego “lerole la mmu” le “mohemo wa bophelo.”

 Ee, Beibele e ruta gore moya o a hwa. (Hesekiele 18:20) Ka morago ga lehu, batho ba boela leroleng, le diphoofolo le tšona di boela leroleng. (Mmoledi 3:19, 20) Ka mantšu a mangwe, ge batho ba ehwa ba kgaotša go phela, gaešita le diphoofolo le tšona di kgaotša go phela. a

 Aowa. Go dira sebe ke go nagana goba go dira selo seo Modimo a sa se ratego, gaešita le go ikwa ka tsela yeo Modimo a sa e ratego. E le gore sephedi se itšego se dire sebe, se swanetše go ba se kgona go dira diphetho tša mabapi le kamoo se swanetšego go itshwara ka gona, eupša diphoofolo tšona ga di kgone go dira diphetho. Ka nako e nyenyane yeo di phelago ka yona, di laolwa ke tlhago. (2 Petro 2:12) Eupša di feleletša di hwile, gaešita le ge di sa kgone go dira sebe.

 Aowa. Modimo o file batho matla a gore ba laole diphoofolo, e sego gore ba di sware gampe. (Genesi 1:28; Psalme 8:6-8) Modimo o rata diphoofolo ka moka, go akaretša le dinonyana tše dinyenyane. (Jona 4:11; Mateo 10:29) O ile a laela barapedi ba gagwe gore ba sware diphoofolo gabotse.—Ekisodo 23:12; Doiteronomio 25:4; Diema 12:10.