Le ge Beibele e sa bolele kudu ka go petšha, eupša melao metheo ya yona e re thuša go lemoga gore Modimo o lebelela go petšha e le sebe.​—Baefeso 5:17. a

•   Batho ba petšha ka ge ba na le megabaru, e lego seka seo Modimo a se hloilego. (1 Bakorinthe 6:9, 10; Baefeso 5:3, 5) Batho ba go petšha ba nyaka go hwetša tšhelete ka go lobiša ba bangwe, eupša Beibele e ganetša mokgwa o mo bjalo wa go lobiša batho dilo tša bona.​—Ekisodo 20:17; Baroma 7:7; 13:9, 10.

•   Go petšha go ka dira gore motho a rate tšhelete kudu, le ge a petšha ka tšhelete e nyenyane.​—1 Timotheo 6:9, 10.

•   Batho ba go petšha gantši ba dumela go maleatlana. Lega go le bjalo, Modimo o lebelela ditumelo tše bjalo e le go rapela medimo ya diswantšho, e lego borapedi bjo bo thulanago kudu le bja gagwe.​—Jesaya 65:11.

•   Beibele e kgothaletša motho gore a šome ka thata go e na le go no hwetša selo a se a se šomela. (Mmoledi 2:24; Baefeso 4:28) Ka baka leo, bao ba phelago ka keletšo ya Beibele ba ka ‘ja dijo tšeo ba di šometšego.’​—2 Bathesalonika 3:10, 12.

•   Go petšha go ka dira gore batho ba phenkgišane goba ba phadišana, e lego mokgwa woo Beibele e o ganetšago.​—Bagalatia 5:26.