Diithuti di na le mabaka a kwagalago a go dumela gore Jesu o kile a phela mo lefaseng. Ge Tokollo ya 2002 ya The Encyclopædia Britannica e bolela mabapi le ditšhupetšo tša boradihistori ba lekgolong la pele le la bobedi la nywaga tšeo di bolelago ka Jesu le Bakriste ba pele, e re: “Dipego tše tšeo di ikemetšego di hlatsela gore mehleng ya bogologolo gaešita le baganetši ba Bokriste ga se ba ka ba belaela gore Jesu o kile a ba gona, e lego seo se ilego sa ganwa la mathomo le ka mabaka a fokolago bofelong bja ngwagakgolo wa bo-18, ngwagakgolong wa bo-19 le mathomong a ngwagakgolo wa bo-20.”

 Ka 2006, puku ya Jesus and Archaeology e itše: “Lehono ga go na seithuti se se hlompšhago seo se belaelago taba ya gore go kile gwa ba le Mojuda yo go thwego ke Jesu morwa wa Josefa; diithuti tše dintši di tloga di dumela gore gona bjale re tseba mo gontši ka seo Jesu a ilego a se dira le dithuto tša gagwe.”

 Beibele e hlalosa Jesu e le motho wa kgonthe. E re botša maina a borakgolokhukhu ba gagwe le ditho tša lapa labo. (Mateo 1:1; 13:55) Le gona e re nea maina a babuši ba tumilego bao ba phetšego mehleng ya Jesu. (Luka 3:1, 2) Ditaba tše di thuša banyakišiši go kgonthišetša gore dipego tša Beibele di nepagetše.