Ee. Eupša o fetoša monagano wa gagwe ge batho bao ba dirilego dilo tše mpe ba itshola. Ka mohlala, ge Modimo a be a bolela gore o tlo ahlola Isiraele ya bogologolo o itše: “Modimo wa therešo a bona mediro ya bona, gore ba lahlile tsela ya bona e mpe; ka gona Modimo wa therešo a šegama ka baka la masetlapelo ao a bego a boletše gore o tla ba tlišetša wona; a se ke a a tliša.”—Jona 3:10.

 Diphetolelo tše dintši tša Beibele di fetoletše mantšu a temana ye ya ka mo godimo ka go bolela gore Modimo o tla “itsholela” bošula bjo a bo nagannego. Se se dira gore go bonagale e ka Modimo o be a era gore o dirile phošo. Eupša ka Seheberu, lentšu “itshola” le ka ba le bolela gore “go fetoša monagano.” Moithuti yo mongwe o ngwadile gore: “Ge motho a fetoša tsela yeo a itshwarago ka yona, le Modimo o tlogela go mo ahlola.”

 Taba ya gore Modimo o kgona go fetoša monagano wa gagwe, ga e bolele gore o gapeletšega go o fetoša. Ekwa gore Beibele e re ke maemong afe moo Modimo a ilego a se fetoše monagano wa gagwe:

•   Ge Balaka a be a kgopela Modimo gore a fetoše monagano wa gagwe ka go rogaka setšhaba sa Isiraele, Modimo ga se a ka a dumela.—Numeri 23:18-20.

•   Nakong ya ge Saulo yoo e lego Kgoši ya Isiraele a be a tšwela pele ka go dira bobe, Modimo o ile a se sa mo amogela e le kgoši, e bile ga se a ka a fetoša monagano wa gagwe.—1 Samuele 15:28, 29.

•   Modimo o tla dira gore Morwa wa gagwe e be moperisita wa ka mo go sa felego, e bile a ka se fetoše monagano wa gagwe.—Psalme 110:4.

 Ke nnete. Ka Beibeleng, Modimo o re: “Ke nna Jehofa; ga se ka fetoga.” (Maleaki 3:6) Le gona, Beibele e re Modimo ke “yo a sa fetofetogego goba a fetoga go etša meriti yeo e šuthago.” (Jakobo 1:17) Eupša ditemana tše ga di ganetšane le tšeo di rego Modimo o fetoša monagano wa gagwe. Ge Beibele e re Modimo ga a fetoge e ra gore ga a fetoše semelo sa gagwae le melao ya gagwe ya mabapi le lerato le toka. (Doiteronomio 32:4; 1 Johane 4:8) Eupša o kgona go nea batho ditaelo tša go se swane ka dinako tša go se swane. Ka mohlala, Modimo o ile a botša Kgoši Dafida gore a diriše mekgwa e mebedi ya go se swane go lwa le manaba a gagwe, gomme mekgwa yeo ka moka e ile ya atlega.—2 Samuele 5:18-25.

 Aowa. O no nyamišwa ke gore batho ba bantši ga ba na taba le yena. Ge Beibele e re botša ka dilo tše di bego di direga pele Modimo a ka fediša lefase ka Meetsefula, e re: “Jehofa a itshola gore o dirile motho lefaseng gomme pelo ya gagwe ya kwa bohloko.” (Genesi 6:6) Temaneng ye, lentšu ‘itshola’ le tšwa lentšung la Seheberu leo le ka bago le bolela gore “go fetoša monagano.” Ka ge batho ba bantši ba mehleng ya Noa ba be ba dira dilo tše mpe, Modimo ile a fetoša monagano goba o ile a itsholela gore o ba bopile gomme a ba fediša ka Meetsefula. (Genesi 6:5, 11) Le ge a be a nyamišitšwe ke gore ba be ba dira dilo tše mpe, seo ga se sa dira gore a fetoše morero wa gagwe ka batho. Ge e le gabotse, o ile a phološa Noa le lapa la gagwe nakong ya Meetsefula e le gore morero wa gagwe ka batho o tle o phethege.—Genesi 8:21; 2 Petro 2:5, 9.