Paseka ke monyanya wa Sejuda wa go gopola ge Modimo a be a lokolla Baisiraele bokgobeng kua Egipita ka 1513 B.C.E. Modimo o be a laetše Baisiraele gore ngwaga o mongwe le o mongwe ba gopole tiragalo yeo ya bohlokwa ka di-14 tša kgwedi ya Sejuda ya Abibi, yeo ka morago e ilego ya tsebega e le Nisani.​—Ekisodo 12:42; Lefitiko 23:5.

Ke ka baka la eng e bitšwa Paseka?

 Lentšu “Paseka” le šupa go nako ya ge Modimo a be a phološa Baisiraele ge a be a bolaya maitšibulo ka moka kua Egipita. (Ekisodo 12:27; 13:15) Modimo o ile a laela Baisiraele gore ba tšee madi a kwana goba a pudi yeo e bolailwego ba a gaše karolong ya ka godimo ya diforeime tša mabati a bona pele a phetha kotlo ye e kwešago bohloko. (Ekisodo 12:21, 22) Ge Modimo a be a bona leswao leo dintlong tša bona o be a di “feta” gomme a se bolaye maitšibulo a bona.​—Ekisodo 12:7, 13.

Paseka e be e ketekwa bjang kgale?

 Modimo o ile a nea Baisiraele ditaelo tša kamoo ba bego ba swanetše go keteka Paseka ya pele. a Sehlogong se re tlo ahlaahla tše dingwe tša ditaelo tšeo di lego ka Beibeleng tša kamoo Paseka e bego e swanetše go ketekwa ka gona.

•   Sehlabelo: Malapa a be a swanetše go kgetha kwana (goba pudi) ya ngwaga o tee ka letšatši la lesome la kgwedi ya Abibi (Nisani), gomme ka letšatši la bo-14 ba e bolaye. Nakong ya Paseka ya pele, Bajuda ba ile ba gaša a mangwe a madi karolong ya ka godimo ya diforeime tša mabati a bona, ba beša phoofolo yeo ka moka gomme ba eja.​—Ekisodo 12:3-9.

•   Dijo: Go tlaleletša go nama yeo e bešitšwego ya kwana (goba ya pudi), Baisiraele ba be ba swanetše go ja dinkgwa tše di sa omelwago le merogo ya go galaka.​—Ekisodo 12:8.

•   Monyanya: Baisiraele ba be ba fetša matšatši a šupago ba keteka Monyanya wa Dinkgwa tše di sa Omelwago ka morago ga Paseka. Ka nako yeo, ba be ba sa je dinkgwa tše di sa omelwago.​—Ekisodo 12:17-20; 2 Dikoronika 30:21.

•   Thuto: Batswadi ba be ba diriša nako ya Paseka go ruta bana ba bona ka Jehofa Modimo.​—Ekisodo 12:25-27.

•   Maeto: Ka morago, Baisiraele ba be ba tšea leeto la go ya Jerusalema go yo keteka Paseka.​—Doiteronomio 16:5-7; Luka 2:41.

•   Dilo tše dingwe tšeo di bego di tlwaetšwe go dirwa: Go nwa beine le go opela go be go tšewa e le karolo ya go keteka Paseka mehleng ya Jesu.​—Mateo 26:19, 30; Luka 22:15-18.

Maaka mabapi le Paseka

 Maaka: Bakriste ba swanetše go keteka Paseka.

 Therešo: Ka morago ga gore Jesu a keteke Paseka ka Nisani 14, 33 C.E., o ile a laela gore go gopolwe tiragalo e nngwe, e lego Selalelo sa Morena. (Luka 22:19, 20; 1 Bakorinthe 11:20) Selalelo seo se tšeetše Paseka sebaka, ka ge se re gopotša ka sehlabelo sa ‘Kriste kwana ya Paseka.’ (1 Bakorinthe 5:7) Sehlabelo sa Jesu sa topollo se feta kgole sehlabelo sa Paseka ka gobane se lokolla batho ka moka bokgobeng bja sebe le lehu.​—Mateo 20:28; Baheberu 9:15.