Ee. Beibele e lego puku ya bogologolo yeo go yona re ka hwetšago bohlale, e nea dikarabo tša dipotšišo tše bohlokwa bophelong e bile e ka go thuša gore o ikwe o le kaone o be o thabele bophelo. Ela hloko tše dingwe tša dipotšišo tšeo e di arabago.

1.   Na Mmopi o gona? Beibele e re Modimo “o bopile dilo ka moka.” (Kutollo 4:11) Modimo o tseba seo re se hlokago e le gore re thabele bophelo le go ikwa re kgotsofetše ka ge e le Mmopi wa rena.

2.   Na Modimo o na le taba le nna? Go e na le go bolela ka Modimo a le kgole le batho, Beibele e re: “Ga a kgole le yo mongwe le yo mongwe wa rena.” (Ditiro 17:27) O na le taba le seo se go diragalelago e bile o nyaka go go thuša gore o atlege bophelong.—Jesaya 48:17, 18; 1 Petro 5:7.

3.   Go tseba Modimo go ka nthuša bjang gore ke ikwe ke le kaone? Modimo o re bopile re “nyaka dilo tša moya,” e lego senyakwa seo re belegwego re na le sona sa go nyaka go kwešiša morero wa bophelo. (Mateo 5:3) Go nyaka ga rena dilo tša moya go akaretša le go kganyoga go tseba Mmopi wa rena le go ba le tswalano le yena. Modimo o tla thabela maiteko a gago a go nyaka go mo tseba, ka gobane Beibele e re: “Batamelang Modimo gomme o tla le batamela.”—Jakobo 4:8.

 Batho ba dimilione ba lemogile gore go gwerana le Modimo go kaonefaditše maphelo a bona e bile go ba thušitše gore ba ikwe ba thabela bophelo. Gaešita le ge go tseba Modimo go ka se go tlošetše mathata bophelong, bohlale bja gagwe bjoo bo hwetšagalago ka Beibeleng bo ka go thuša go

•   Ba le bophelo bjo bo thabišago bja lapa.

•   Ba le khutšo le ba bangwe.

•   Lebeletšana le mathata a swanago le kgateletšego, mathata a tša ditšhelete le bolwetši bjo bo sa alafegego.

 Madumedi a mantši ao a dirišago Beibele ga a nape a latela dithuto tša yona. Go e na le moo, bodumedi bja therešo bjoo bo kgomarelago seo ruri Beibele e se rutago bo tla go thuša gore o tsebe Modimo.