DITEMANA TŠA BEIBELE DI A HLALOSWA
Baroma 10:13—“Ba ba Bitšago Leina la Morena”
“Yo mongwe le yo mongwe yo a bitšago leina la Jehofa o tla phološwa.”—Baroma 10:13, Phetolelo ya Lefase le Lefsa.
“Ba go tlo phološwa ke ba ba bitšago ’ina la Morena.”—Baroma 10:13, Beibele ya Sepedi.
Seo se Bolelwago ke Baroma 10:13
Modimo o rata batho ka moka go sa šetšwe gore ba tšwa nageng efe goba ke ba morafo ofe. Ke ka baka leo a ba filego sebaka sa gore ba tle ba phološwe ke moka ba phele go ya go ile. E le gore re tle re holwe ke seo re swanetše go bitša leina la Modimo Ramatlaohle e lego Jehofa. a—Psalme 83:18.
Ka Beibeleng go bitša leina la Jehofa ga go bolele feela go tseba leina la Modimo le go le diriša ge re rapela. (Psalme 116:12-14) Eupša go akaretša le go tshepa Modimo le go ithekga ka yena gore a re thuše.—Psalme 20:7; 99:6.
Leina la Modimo le be le le bohlokwa go Jesu Kriste. Mantšu a mathomo thapelong ya gagwe ya mohlala a re: “Tatago rena wa magodimong, leina la gago a le kgethagatšwe,” goba le dirwe le lekgethwa. (Mateo 6:9) Le gona Jesu o ile a bontšha gore re swanetše go tseba Jehofa, re mo kwe e bile re mo rate e le gore re tle re phele go ya go ile.—Johane 17:3, 6, 26.
Ke ka baka la’ng re ka phetha ka gore Jehofa ke Morena yeo go bolelwago ka yena go Baroma 10:13 ka Beibeleng ya King James Version? Ka gobane mantšu a a lego temaneng ye a tšwa go Joele 2:32, moo leina la Modimo le tšwelelago gona ka mangwalong a mathomong a Seheberu, e sego “Morena.” b
Ditemana tša Kgauswi le Baroma 10:13
Go Baroma kgaolo 10, Beibele e bontšha gore e le gore Modimo a re amogele, re swanetše go bontšha gore re na le tumelo go Jesu Kriste. (Baroma 10:9) Taba ye e thekgwa ke ditemana tše mmalwa tšeo di lego ka Testamenteng ya Kgale. Motho yo a nago le tumelo o bontšha seo ka gore a ‘bolele phatlalatša.’ E lego seo se akaretšago go botša batho bao ba sa tsebego Modimo ditaba tše dibotse gore di ba thuše gore ba tle ba phologe. Mafelelong ba bangwe ba tlo ba le tumelo gomme seo sa ba thuša gore ba tle ba kgone go phela go ya go ile.—Baroma 10:10, 14, 15, 17.
Bala Baroma kgaolo 10 go akaretša le mengwalo ya tlase le ditemana tšeo di sepedišanago le yona.
a Leina la Modimo le tšwelela ka makga a e ka bago a 7 000 ka dingwalweng tša kgale tša Beibele. Ka Seheberu leina la Modimo le ngwalwa ka ditlhaka tše nne tšeo di tsebjago e le Tetragrammaton. Gantši leina leo ka Seisemane ke Jehofa eupša diithuti tše dingwe di rata gore ke “Yahweh.”
b Go ka direga gore Bakriste bao ba ngwadilego Beibele ba ile ba diriša leina la Modimo ge ba be ba tsopola Testamente ya Kgale ditemaneng tšeo di nago le leina leo. The Anchor Bible Dictionary e re: “Go na le bohlatse bjo bongwe bjo bo bontšhago gore Tetragrammaton, e lego leina la Modimo Yahweh, le tšwelela ditemaneng tše dingwe goba ditemaneng ka moka moo Testamente e Mpsha e tsopolago Testamente ya Kgale moo e bego e ngwadilwe gona mathomong.” Ge o nyaka go kwa taba ye ka mo go oketšegilego, bala sehlogo seo se rego “Leina la Modimo ka Mangwalong a Bakriste a Segerika” ka pukwaneng ya Tlhahlo ya go Ithuta Lentšu la Modimo. Gore o hwetše diphetolelo tša Beibele tšeo di dirišago leina la Modimo go Baroma 10:13, eya go Appendix C2 ka Beibeleng ya Phetolelo ya Lefase le Lefsa ya Seisemane ya 2013.
You May Also Like
DIPOTŠIŠO TŠA BEIBELE DI A ARABJA
Na Modimo o na le Leina?
Diphetolelo tše dintši tša Beibele di na le leina la Modimo. Na o swanetše go le diriša?
DIPOTŠIŠO TŠA BEIBELE DI A ARABJA
Modimo o na le Maina a Makae?
Batho ba ka nagana gore Modimo o na le maina a go swana le ‘Allah,’ ‘Alfa le Omega,’ ‘El Shaddai’ le ‘Jehofa-Jire.’ Na ke phošo go bitša Modimo ka mokgwa o mongwe le o mongwe?
DIPOTŠIŠO TŠA BEIBELE DI A ARABJA
Go Phologa ke Eng?
O ka phologa bjang? Gona motho o phološwa go eng?
DITHUTO TŠA BEIBELE
Didirišwa tša go Ithuta Beibele
Kgetha didirišwa tša go ithuta Beibele tšeo di tla dirago gore o ipshine ka go ithuta e bile o ikwe o kgotsofetše.
DITHUTO TŠA BEIBELE
Leka Thuto ya Rena ya Beibele
Ithute Beibele mahala o thušwa ke motho yo mongwe.
