“Godiša tatago le mmago e le gore matšatši a gago e tle e be a matelele godimo ga naga yeo Jehofa Modimo wa gago a go neago yona.”—Ekisodo 20:12, Phetolelo ya Lefase le Lefsa.

 “Godiša tatago le mmago, gore o phele galelele nageng ye Morena Modimo wa gago a go fago yona.”—Ekisodo 20:12, Beibele ya Sepedi.

 Modimo o ile a laela Baisiraele gore ba godiše batswadi ba bona. O ile a ba botša gore ke ka baka la eng ba swanetše go kwa taelo yeo. Le ge Bakriste ba se sa phela ka tlase ga Molao wa Moshe, e lego Molao woo Jehofa a bego a o file Baisiraele, melao ya Modimo ga se ya fetoga. Melao ye ya Modimo e be e theilwe ditherešong tše bohlokwa tšeo le lehono di ka holago Bakriste.—Bakolose 3:20.

 Bana ka moka ba bontšha gore ba godiša batswadi ba bona ka go ba kwa le go ba hlompha. (Lefitiko 19:3; Diema 1:8) Le ge bana ba šetše ba godile e bile ba na le malapa a bona, ba tšwela pele ba rata batswadi ba bona le go ba thuša. Ka mohlala, ba kgonthišetša gore batswadi ba bona ba hlokomelegile gabotse ge ba dutše ba tšofala, e bile ba ba fa le tšhelete le go ba patelela dilo tše dingwe ge go hlokagala.—Mateo 15:4-6; 1 Timotheo 5:4, 8.

 Hlokomela gore bana ba Baisiraele ba be ba swanetše go hlompha botatago bona le bommago bona. Ka go dira bjalo, ba be ba bontšha gore ba lemoga gore mmago bona le yena o bohlokwa ka lapeng. (Diema 6:20; 19:26) Le lehono bana ba swanetše go dira se se swanago.

 Taelo ye ga e re gore bana ba swanetše go kwa batswadi ba bona dilong ka moka. Ka mohlala, bana ba Baisiraele ba be ba se ba swanela go kwa batswadi ba bona goba motho le ge e le ofe ge e ba seo se be se tla dira gore ba tshele melao ya Modimo. (Doiteronomio 13:6-8) Ka mo go swanago le lehono Bakriste ba dumela gore “Modimo ke mmuši yo [ba] swanetšego go mo kwa go e na le go kwa batho.”—Ditiro 5:29.

 Molaong woo Jehofa a bego a o file Baisiraele, o ile a tshepiša gore ge bana ba godiša batswadi ba bona seo se be se tla dira gore “matšatši a [bona] e tle e be a matelele le gore dilo di [ba] sepelele gabotse” nageng yeo Modimo wa bona a ba neilego yona. (Doiteronomio 5:16) Ba be ba ka se otlwe go swana le bana bao ba bego ba sa theetše molao wa Modimo e bile ba sa hlomphe batswadi ba bona. (Doiteronomio 21:18-21) Le lehono molao wo ga se wa fetoga. (Baefeso 6:1-3) Ka moka ga rena re swanetše go dira dilo tšeo Modimo a re laelago tšona, go sa šetšwe gore re ba bagolo goba re ba banyenyane. Ke nnete gore bana bao ba kwago Modimo le bao ba kwago batswadi ba bona ba tlo phela nako e telele. E bile ba na le kholofelo ya go tlo phela go ya go ile.—1 Timotheo 4:8; 6:18, 19.

 Re ka ithuta selo se bohlokwa mo taelo ye e lego go Ekisodo 20:12 e tšwelelago gona. E tšwelela mo go bolelwago ka Melao e Lesome. (Ekisodo 20:1-17) Melao yeo e boletšwego pele ga taelo ye e bontšha gore Baisiraele ba ile ba ikana gore go na le dilo tše dintši tšeo ba bego ba tlo di direla Modimo, go swana le gore ba be ba tla hlankela yena feela. Melao yeo e boletšwego ka morago ga taelo ye e bontšha gore go na le dilo tšeo Baisiraele ba bego ba tlamegile go di direla Baisiraelegotee le bona, go swana le gore ba be ba tla botegela balekane ba bona e bile ba be ba ka se utswe. Ka gona molao wo wa gore “godiša tatago le mmago” o be o tswalanya dilo tše tše pedi.[8]