“Mathomong Modimo o hlodile magodimo le lefase.”—Genesi 1:1, Phetolelo ya Lefase le Lefsa.

 “Mathomong Modimo o hlodile legodimo le lefase.”—Genesi 1:1, Beibele ya Sepedi.

 Temana ye ya mathomo ka Beibeleng e re botša dilo tše pedi tša bohlokwa. Sa pele, e re botša gore “magodimo le lefase,” goba lefase le dinaledi di na le mathomo. Sa bobedi, di hlodilwe ke Modimo.—Kutollo 4:11.

 Beibele ga e re botše gore Modimo o na le nako e kaakang a bopile lefase le dinaledi e bile ga e re botše gore o di bopile bjang. Eupša e no re botša gore ge a bopa lefase le dinaledi, o šomišitše ‘matla a gagwe a magolo kudu.’—Jesaya 40:26.

 Lentšu “hlodile” le fetoletšwe go tšwa lentšung la Seheberu leo le bolelago ka dilo tšeo di dirilwego ke Modimo feela. a Ka Beibeleng Jehofa b Modimo ke yena feela yo a bitšwago Mmopi.—Jesaya 42:5; 45:18.

 Temana ye ke temana ya mathomo ya ditemana tšeo di re hlalosetšago ka seo se diragetšego ge Modimo a be a bopa dilo go Genesi kgaolo 1 le 2. Go tloga go Genesi 1:1 go ya go 2:4, Beibele e re hlalosetša ka bokopana seo Modimo a ilego a se dira ge a be a bopa lefase le diphedi ka moka tšeo di lego go lona go akaretša le monna wa pele le mosadi wa pele. Ka morago ga tlhaloso ye e kopana, Beibele e re hlalosetša ka botlalo seo se ilego sa direga ge Modimo a be a bopa monna wa pele le mosadi wa pele.—Genesi 2:7-25.

 Puku ya Genesi e re botša gore Modimo o bopile dilo ka “matšatši” a tshela. Matšatši ao go bolelwago ka ona mo ga se ao re a tlwaetšego a diiri tše 24, eupša gago tsebege gore ke nako e kae. Ke nnete gore lentšu “letšatši” le ka šupa go nako e itšego, e sego feela go diiri tše 24. Se re se bona gabotse go Genesi 2:4, yeo e dirišago ‘letšatši’ le ‘nako’ e le selo setee. E lego seo se dirago gore go bonagale eka Modimo o bopile dilo ka ‘letšatši’ letee, e sego ka matšatši a tshela.

 Maaka: Genesi 1:1 e re Modimo ke Modimo o tee go ba bararo ka gobane lentšu la Seheberu leo le dirišitšwego temaneng ye le šupa go Modimo ka bontši e sego ka botee.

 Nnete: Lentšu “Modimo” leo le dirišitšwego go fetolela lentšu la Seheberu ’Elo·himʹ, leo le lego ka bontši le šupa go bogolo e sego palo ya batho. New Catholic Encyclopedia e hlalosa gore lentšu leo le dirišitšwego ka bontši ’Elo·himʹ go Genesi 1:1 “ka mehla le šupa go modimo o tee go bontšha tlhompho e sego go palo ya batho, go no swana le ge dikgoši di be di hlomphiwa ka tsela yeo.”—Second Edition, Bolumo 6, letlakala 272.