“O se ke wa boifa gobane ke na le wena. O se ke wa lealea gobane ke Modimo wa gago. Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko.”—Jesaya 41:10, Phetolelo ya Lefase le Lefsa.

 “O se boife gobane ke na le wene. O se ke wa tšhoga, gobane Modimo wa gago ke Nna. Ke a go tiiša; ke a go thuša; ke go hleka ka letsogo la ka le letona le ya ka toko.”—Jesaya 41:10, Beibele ya Sepedi.

 Jehofa a o kgonthišetša bahlanka ba gagwe bao ba botegago gore o tla ba thuša ge ba na le mathata.

 “Ke na le wena.” Jehofa o botša bahlanka ba gagwe gore ba se ke ba tšhoga ka gobane ga ba nnoši. Ka ge a kgona go bona mathata ao a ba welago le go kwa dithapelo tša bona, go no swana le ge eka o na le bona.—Psalme 34:15; 1 Petro 3:12.

 “Ke Modimo wa gago.” Jehofa o kgothatša bahlanka ba gagwe ka go ba gopotša gore go sa šetšwe mathata ao ba nago le ona, a ka se tlogele go ba Modimo wa bona e bile o a ba amogela. Ba ka kgodišega gore ga go na selo seo se ka thibelago Modimo gore a ba thuše.—Psalme 118:6; Baroma 8:32; Baheberu 13:6.

 “Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko.” Jehofa o dirišitše dipolelwana tše tše tharo go bontšha bahlanka ba gagwe gore ruri o tla ba thekga. O diriša polelwana ‘ke tla go swara ka go tia ka seatla sa ka sa le letona,’ go bontšha bahlanka ba gagwe gore o tla ba thuša ge ba hloka thušo. Ge e ba motho a ka wa, Modimo o tla mo swara ka seatla sa gagwe sa le letona gomme a mo tsoša.—Jesaya 41:13.

 Tsela ya mathomo yeo Modimo a thušago bahlanka gagwe le go ba matlafatša ka yona, ke ka go diriša Lentšu la gagwe e lego Beibele. (Joshua 1:8; Baheberu 4:12) Ka mohlala, Beibele e nea dikeletšo tše dibotse tšeo batho bao ba nago le mathata a bjalo ka bodiidi, go babja goba go hlokofalelwa ba ka di dirišago. (Diema 2:6, 7) Le gona Modimo a ka diriša moya wa gagwe o mokgethwa go thuša bahlanka ba gagwe gore ba se ke ba tshwenyega kudu ka mathata a bona.—Jesaya 40:29; Luka 11:13.

 Mantšu a a ile a kgothatša Bajuda ba botegago bao ba ilego ba išwa bothopša Babilona. Jehofa o ile a bolela e sa le pele gore ge nako ya gore Bajuda ba boele nageng ya gabo bona e batamela, go be go tlo ba le mabarebare a gore lenaba le tlo fediša metse yeo e lego kgauswi le naga ya Babilona le go tšhošetša gore le tla fediša naga yeo. (Jesaya 41:2-4; 44:1-4) Le ge Bababilona ba be ba tlo tšhošwa ke go kwa taba yeo, Bajuda bona go be go ka se hlokagale gore ba tšhoge ka gobane Jehofa o be a tla ba šireletša. O ile a ba kgonthišetša ka makga a mararo ka go ba botša gore: “O se ke wa boifa.”—Jesaya 41:5, 6, 10, 13, 14.

 Le ge mathomong Jehofa a be a lebišitše mantšu ao a lego go Jesaya 41:10 go Bajuda ba botegago bao ba bego ba le bothopša Babilona, eupša o kgonthišeditše gore mantšu ao a ngwalwa ka Beibeleng gore a kgone go kgothatša bahlanka ba gagwe ka moka. (Jesaya 40:8; Baroma 15:4) Le lehono o sa tšwela pele a thuša bahlanka ba gagwe go no swana le ge a ile a thuša bahlanka ba gagwe ba mehleng ya kgale.