“Letago a le ye go Modimo magodimodimong, lefaseng go be le khutšo bathong bao a ba amogelago.”—Luka 2:14, Phetolelo ya Lefase le Leswa.

 “Tumišo a e ye go Modimo magodimo-dimong; Lefaseng go be le Khutšo Bathong bao a ba Amogelago.”—Luka 2:14, Beibele ya Sepedi.

 Mantšu a a tumišo, ao a boletšwego ke barongwa nakong ya go belegwa ga Jesu a bontšha gore bao ba dumelago go Jesu ba ka amogelwa ke Modimo gomme ba ba le khutšo.

 “Letago a le ye go Modimo magodimodimong.” Ka mantšu a, barongwa ba gatelela gore Modimo o swanetšwe ke go hwetša letago ka moka. Mantšu a gape a lebiša tlhokomelo tabeng ya go belegwa ga Jesu le bodiredi bja gagwe bja lefaseng, tšeo di bego di tlo tliša letago le legolo go Jehofa a. Ka mohlala, ka mehla ge Jesu a be a ruta o be a godiša Modimo, ka mohlala, go swana le ge a be a re: “Seo ke se rutago ga se sa ka, eupša ke sa yo a nthomilego.” (Johane 7:16-18) Ge Jesu a be a dira mehlolo, gantši bao ba bego ba e bona ba be “ba tagafatša Modimo.” (Luka 5:18, 24-26; Johane 5:19) Gaešita le lehu la Jesu le išitše letago go Modimo. Le butše tsela ya gore Modimo a phethagatše morero wa gagwe o mogolo wa go tlatša lefase ka batho ba lokilego le bao ba ratago khutšo.—Genesi 1:28.

 “Lefaseng go be le khutšo.” Khutšo ye ga se ya go no se be gona ga ntwa, eupša e akaretša khutšo ya ka pelong yeo motho a bago le yona feela ka baka la ge a ratwa ke Jehofa. Batho ba kgona go ba le tswalano ye ya khutšo le Modimo ka baka la Jesu. (Jakobo 4:8) Gomme bjalo ka Kgoši ya Mmušo wa Modimo, Jesu o tlo kgona go tliša khutšo ya ka mo go sa felego lefaseng ka moka.—Psalme 37:11; Luka 1:32, 33.

 “Bathong bao a ba amogelago.” Mantšu a a bolela ka batho bao ba amogelwago goba ba ratwago ke Modimo, ka baka la tumelo ya bona ya makgonthe go yena le go yoo a mo romilego, Jesu. Ga e bolele gore Modimo o tlo bontšha lerato go batho ka moka, go sa šetšwe dipono tša bona le mediro ya bona, e bile ga e bolele ka lerato leo le ka bontšhwago ke batho. Diphetolelo tše dingwe tša Beibele, tše bjalo ka phetolelo ya King James Version di fetolela mantšu ka gore, “kgahlišo bathong.” Lega go le bjalo, mengwalo ya kgale le yeo e ka botwago ya Segerika e thekga Phetolelo ya Lefase le Leswa le diphetolelo tše dingwe tša mehleng ye ka go bontšha kgopolo ya khutšo bathong bao Modimo a ba amogelago.—Bona  Luka 2:14 Go tšwa go Additional Translations.”

 Luka kgaolo 2 e bolela ka mengwaga ya ge Jesu e sa le yo monyenyane. Ka moragonyana ga ge Jesu a belegwe, morongwa o ile a tšwelela go “badiši bao ba bego ba dula merakeng ba dišitše mehlape ya bona bošego.” b (Luka 2:4-8) Morongwa o ile a bega “ditaba tše dibotse tša lethabo le legolo,” a botša badiši gore: “Lehono le belegetšwe Mophološi, yo e lego Kriste Morena, motseng wa Dafida.” (Luka 2:9-11) Badiši ba ile ba botšwa gore ba tla hwetša lesea, gomme ba ile ba bona barongwa ba bantšhi. Ge ba fihla Betlelehema badiši ba ile ba hwetša Maria le Josefa gotee le ngwana, Jesu. (Luka 2:12-16) Ka morago ga go laodiša taba ye e kgahlišago, badiši ba ile ba boela mehlapeng ya bona “ba tumiša le go reta Modimo ka dilo ka moka tšeo ba di kwelego le go di bona ka wona mokgwa wo ba di boditšwego ka wona.”—Luka 2:17-20.

 “Letago a le ye go Modimo magodimodimong, lefaseng go be le khutšo bathong bao a ba amogelago!”—Luka 2:14, Sepedi Bi12.

 “A go tumišwe Modimo legodimong le godimodimo, gomme khutšo a e be le ba ba mo kgahlago lefaseng!”—Luka 2:14, Phetolelo ya Taba e Botse.

 “Tumišô a e yê xo Modimo maxodimo-dimong; lefaseng xo bê le khutšo, kxahlišo bathong!”—Luka 2:14, Sepedi Standard Bible.

 Bona bidio ye e kopana ya kakaretšo ya puku ya Luka.