“Nako e beilwego e fihlile gomme Mmušo wa Modimo o batametše. Itsholeng gomme le be le tumelo ditabeng tše dibotse.”—Mareka 1:15, Phetolelo ya Lefase le Lefsa.

 “Lebaka le tlile; mmušo wa Modimo o batametše; sokologang le dumele Ebangedi.”—Mareka 1:15, Beibele ya Sepedi.

 Jesu Kriste o ile a botša batheetši ba gagwe gore Mmušo wa Modimo a o be o “fihlile” goba o be o “batametše” ka gobane e be e le yena e tlago go ba Kgoši ya Mmušo woo, e bile ka nako yeo o be a na le bona.

 Jesu o be a sa bolele gore Mmušo wa Modimo o be o šetše o thomile go buša. Ka baka leo, ka moragonyana o ile a botša barutiwa ba gagwe gore Mmušo woo o sa tlo tla. (Ditiro 1:6, 7) Eupša Jesu o fihlile ka wona ngwaga woo Beibele e boletšego e sa le pele gore o be a tla fihla ka wona e le Kgoši. b Ke ka baka leo Jesu a bego a ka bolela mantšu ao a rego: “Nako e beilwego e fihlile,” e lego nako ya gore a thome go botša batho ditaba tše dibotse tša Mmušo wa Modimo.—Luka 4:16-21, 43.

 E le gore batho ba tle ba holwe ke ditaba tše dibotse tša Mmušo wa Modimo, ba be ba swanetše gore ba sokologe. Seo se ra gore ba be ba swanetše go tlogela dibe tša bona gomme ba phele ka go dumelelana le melao ya Modimo. Bao ba ilego ba sokologa ba ile ba bontšha gore ba a dumela gore ka nnete Mmušo wa Modimo o tlo ba direla dilo tše dibotse nakong e tlago.

 Jesu o boletše mantšu a ge a be a thoma go botša batho ditaba tše dibotse kua Galilea. Lengwalo la Mateo 4:17 le re: “Go tloga ka nako yeo go ya pele,” Jesu o ile a bolela ditaba tše dibotse tša Mmušo wa Modimo. Ge Jesu a be a bolela ditaba tše dibotse, o be a bolela kudu ka Mmušo wa Modimo. Ka baka leo, polelwana “Mmušo wa Modimo” ka Diebangeding c tše nne e tšwelela ka makga a ka godimo ga a 100. Gantši le tšwelela moo Jesu a bolelago gona. Ka Beibeleng Jesu o bolela ka Mmušo wa Modimo go feta dilo tše dingwe ka moka.