“Le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.”—Mateo 6:34, Phetolelo ya Lefase le Lefsa.

 “Le se ke la belaelela tša ka moswana, gobane la ka moswana le tlo ipelaelela tša lona. ’Tšatši le lengwe le le lengwe le lekanwa ke bošula bja lona.”—Mateo 6:34, Beibele ya Sepedi.

 Ge Jesu a be a bolela mantšu a, o be a kgonthišetša bao ba bego ba mo theeditše gore ba se ke ba tshwenyega kudu ka mathata ao a ka ba welago goba ba tshwenyega go sa hlokagale. Go e na le moo, ba be ba ka holega kudu ge ba ka lebeletšana le mathata ao ba bego ba na le ona ka nako yeo.

 Jesu o be a sa re gore ga se ra swanela go nagana ka tša ka moswana goba go itokišeletša seo se ka diregago nakong e tlago. (Diema 21:5) Eupša o be a re thuša gore re se ke ra dula re tshwenyega, goba re belaela kudu ka dilo tšeo di ka diregago nakong e tlago. Go tshwenyega go ka dira gore re se sa thaba goba gwa re šitiša go dira dilo tše bohlokwa. Re ka se kgone go rarolla mathata ao re ka bago le ona ka go tshwenyega ka ona. Gantši dilo tšeo re tshwenyegago kudu ka tšona ga di direge goba ge di ka direga, ga e be bothata bjo bogolo go swana le kamoo re bego re naganne ka gona.

 Mantšu a a Jesu ke a mangwe a mantšu ao a a boletšego Thutong ya gagwe ya Thabeng yeo e tsebjago kudu, yeo go bolelwago ka yona go Mateo dikgaolo 5 go ya go 7. Thutong yeo ya gagwe o hlalošitše gore go belaela go sa hlokagale go ka se dire gore re thabe goba gwa re okeletša bophelo. (Mateo 6:27) Le gona o boletše gore ge re etiša Modimo pele maphelong a rena ga go hlokagale gore re belaele kudu ka dilo tša ka moswana. Ka ge Modimo a hlokomela dimela le diphoofolo, seo se bolela gore o tla hlokomela le bahlanka ba gagwe.—Mateo 6:25, 26, 28-33.