“Thabela go hlankela Jehofa, gomme yena o tla go fa tšeo pelo ya gago e di kganyogago.”—Psalme 37:4, Phetolelo ya Lefase le Leswa.

 “O thabele Morena, mme yena o tlo go nea tše pelo yago e di kgopelago.”—Psalme 37:4, BIBELE ya Mangwalo a makgethwa a Testamente ye tala le a Testamente ye mpsha.

 Mopsalme o kgothaletša batho bao ba hlankelago Modimo gore ba thabele go ba le segwera sa kgauswi le Modimo. Batho ka moka bao ba thabelago go ba le segwera sa kgauswi le Modimo ba ka kgodišega gore Jehofa a Modimo o tla ba nea dilo tša maleba tšeo ba di kganyogago.

 “Thabela go hlankela Jehofa.” Mantšu a gape a ka bolela gore, “thabela Jehofa kudu,” “thabela go hlankela MORENA” goba “thabela seo MORENA a go tshepišitšego sona.” Se se no bolela gore re swanetše go “thabišwa kudu ” ke go hlankela Modimo wa therešo. (Psalme 37:4, mongwalo wa tlase wa Phetolelo ya Lefase le Leswa ya Seisemane) Ke ka baka la’ng re re’alo?

 Batho bao ba hlankelago Jehofa ba lebelela dilo ka tsela yeo a di lebelelago ka yona mo Beibeleng. Ba tseba Modimo, e bile ba a lemoga gore ge ba mo kwa ba bontšha gore ba bohlale. Ba a tseba gore seo se dira gore ba be le matswalo ao a hlwekilego gomme ba phema go dira diphošo tše dintšhi le diphetho tše di fošagetšego. (Diema 3:5, 6) Ka mohlala, ge batho bao ba hlankelago Modimo ba bona batho ba go ba le megabaru le ba go se botege ba bonagala eka ba a atlega, ga ba ba kwatele goba go ba jela mona. (Psalme 37:1, 7-9) Ba thabišwa ke go tseba gore e se kgale Modimo o tlo fediša batho ba babe ka moka, ke moka a putsa batho bao ba mmotegelago. (Psalme 37:34) Le gona ba thabišwa ke go tseba gore Tatago bona wa legodimong o a ba amogela.—Psalme 5:12; Diema 27:11.

 “Yena o tla go fa tšeo pelo ya gago e di kganyogago.” Mantšu a a ka fetolelwa ka gore, “o tla theetša dithapelo tša gago” goba “o tla go nea seo o tlogago o se kganyoga.” Ke nnete gore Jehofa a ka se re fe selo se sengwe le se sengwe seo re se kgopelago. Jehofa o swana le motswadi yo lerato. O tseba selo se se kaonekaone seo se swanetšego bana ba gagwe. Re swanetše go rapelela dilo tšeo di sepedišanago le thato ya Modimo le melao ya gagwe, re be re phele ka go dumelelana le seo Modimo a se nyakago. (Diema 28:9; Jakobo 4:3; 1 Johane 5:14) Ge re ka dira bjalo, re ka batamela “Mokwi wa dithapelo” re kgodišegile gore o tla re theetša.—Psalme 65:2; Mateo 21:22.

 Psalme 37 e ngwadilwe ke Kgoši Dafida wa Isiraele ya kgale. O ngwadile psalme ye a diriša mokgwa wa go latelelana ga ditlhaka. b

 Gantšhi Dafida o be a sa swarwe gabotse. Ka dinako tše dingwe o be a ikuta goba a tšhaba ge Kgoši Saulo le batho ba bangwe ba be ba nyaka go mmolaya. (2 Samuele 22:1) Eupša ka mehla Dafida o be a tshepa Modimo wa gagwe. Dafida o be a tseba gore ka letšatši le lengwe Jehofa o tlo otla batho ba babe. (Psalme 37:10, 11) Le ge ba ka bonagala ba atlega, eupša mafelelong ba tlo fedišwa go swana le ge “bjang bjo botala bjoo bo sa tšwago go mela” bo pona.—Psalme 37:2, 20, 35, 36.

 Psalme 37 e bontšha seo se tlago go diragalela batho bao ba latelago melao ya Modimo le bao ba sa e latelego. (Psalme 37:16, 17, 21, 22, 27, 28) Le gona psalme ye e re thuša gore re be bohlale le gore re amogelwe ke Modimo.

 Bogela bidio ye e kopana go bona kakaretšo ya puku ya Dipsalme.