“Tlogelang go lwa gomme le tsebe gore ke nna Modimo. Ke tla hlompšha gare ga ditšhaba, Ke tla hlompšha lefaseng.”—Psalme 46:10, Phetolelo ya Lefase le Leswa.

 Modimo o nyaka gore motho yo mongwe le yo mongwe a mo rapele e bile a tsebe gore o na le tshwanelo ya go buša lefase ka moka. Motho yo mongwe le yo mongwe yo a nyakago go phela go ya go ile o swanetše go dumela gore Modimo o na le matla.—Kutollo 4:11.

 “Tlogelang go lwa gomme le tsebe gore ke nna Modimo.” Mantšu a Seheberu ao a fetoletšwego gore “tlogelang go lwa gomme le tsebe gore ke nna Modimo” ke taelo yeo e tšwago go Jehofa a Modimo. O laela batho ka moka gore ba tlogele go lwa le yena eupša ba lemoge gore ke yena feela a swanetšego go rapelwa.

 Taelo e swanago e hwetšagala go Psalme 2. Mo Psalmeng ye, Modimo o re o tlo dira se sengwe ka batho bao ba lwago le yena. Bao ba lemogago gore Modimo o na le matla, ba nyaka gore a ba hlahle, a ba fe matla e bile a ba fe bohlale. Ka ge ba tshepile “gore o tlo ba šireletša,” ba ikwa ba thabile e bile ba bolokegile kudukudu ge ba na le mathata.—Psalme 2:9-12.

 “Ke tla hlompšha gare ga ditšhaba; Ke tla hlompšha lefaseng.” Nakong e fetilego, Jehofa Modimo o ile a diriša matla a gagwe a magolo go šireletša batho ba gagwe gomme seo sa dira gore ba mo hlomphe. (Ekisodo 15:1-3) Nakong e tlago, Jehofa Modimo o tlo hlomphiwa ke batho ka moka mo lefaseng gomme ba tlo bontšha seo ka go ikokobeletša yena le go mo rapela.—Psalme 86:9, 10; Jesaya 2:11.

 Puku e nngwe e bitša Psalme 46 “sefela sa go reta matla a Modimo ao a a dirišago go phološa batho ba gagwe.” Ge batho ba Modimo ba be ba opela Psalme 46, ba be ba bontšha gore ba a tshepa gore Jehofa a ka kgona go ba thuša le go ba šireletša. (Psalme 46:1, 2) Mantšu a Psalme ye a be a ba gopotša gore Jehofa o be a dula a na le bona.—Psalme 46:7, 11.

 Mopsalme o ile a kgothaletša batho ba Modimo gore ba lebelele dilo tše di kgahlišago tšeo Jehofa Modimo a di dirilego gore ba tshepe gore a ka kgona go ba šireletša. (Psalme 46:8) Psalme ye e bolela kudu ka gore Jehofa o tlo fediša dintwa. (Psalme 46:9) E bile re ka re Jehofa o ile a fediša dintwa nakong e fetilego ge a be a šireletša batho ba gagwe go batho bao ba bego ba elwa le bona. Beibele e re tshepiša gore Modimo o tlo dira se se fetago seo ka go dira gore go se sa ba le dintwa lefaseng ka moka.—Jesaya 2:4.

 Na le lehono Jehofa o sa thuša batho bao ba mo rapelago? Ee. Ge e le gabotse, moapostola Paulo o kgothaletša Bakriste gore ba ye go Modimo ge ba hloka thušo. (Baheberu 13:6) Seo se bolelwago ke Psalme 46 se re thuša go tshepa gore Modimo o na le matla a go re šireletša. E bile e re thuša go bona gore Modimo “o a re šireletša e bile o re fa matla.”—Psalme 46:1.

 Bogela bidio ye e kopana go bona kakaretšo ya puku ya Psalme.