Baratani ba bantšhi ba dula mmogo pele ba nyalana. Ba bangwe ba dira seo go bona ge e ba ba swanelana goba ge e ba lenyalo la bona le ka atlega. Na go dula mmogo pele ga lenyalo ke kakanyo e botse?

Sehlogong se

•  Beibele e reng?

•  Na go dula mmogo go tla go lokišeletša lenyalo?

•  Na go dula mmogo go tla le thuša go boloka tšhelete?

•  Na go dula mmogo go tlo go thuša go phema go nyala motho yo a ka se go thabišego?

•  Na go na le tsela e kaone?

•   Beibele e gana thobalano ka ntle ga lenyalo. Ka mohlala, e re: “Le ile bootswa.” (1 Bathesalonika 4:3;1 Bakorinthe 6:18) Se se akaretša thobalano magareng ga monna le mosadi bao ba dulago mmogo, le ge ba ikemišeditše go tlo nyalana. a Ditekanyetšo tša Beibele di thuša go šireletša baratani go ditlamorago tša go swana le go ima ka ntle ga lenyalo le mathata a mangwe.

•   Tokišetšo ya lenyalo e tšwa go Modimo. Ge a thoma tokišetšo ye o rile: ‘Monna o tla tlogela tatagwe le mmagwe, a kgomarela mosadi wa gagwe gomme bona e tla ba nama e tee.’ (Genesi 2:24) Motheo wa lenyalo la monna le mosadi bao ba nyalanego ka molao ke wo o tiilego e bile lapa la bona e ba le le thabilego.

 Ba bangwe ba re ee. Ba nagana gore ge baratani ba thušana go dira mediro ya ka gae le go bona tsela yeo o mongwe a dirago dilo ka yona, seo se ba thuša go tsebana ga kaone. Go e na le moo, selo se bohlokwa seo se tla atlegišago lenyalo ke kwano magareng ga banyalani.

 Banyalani ba ka ithuta bjang go dula ba kgomarelane ge go le thata le ge go le bose? Go dula mmogo ga baratani bao ba sa nyalanago, e le ge ba leka go bona gore ba ka swanelega go nyalana, ga se seo se ka dirago gore lenyalo le atlege. Ka baka la gore yo mongwe wa bona a ka nyaka go re ba kgaogane. Go e na le moo, ge baratani ka bobedi ba kwana ebile ba ikemišeditše go šoma mmogo go lebeletšana le mathata le ge e le afe, lerato la bona le a gola.

 Therešo e sa fetogego: Go e na le go itokišeletša lenyalo,baratani bao ba kgethago go dula mmogo ba se ba nyalana ge e le gabotse ba itokišeletša go arogana.

 Molao wa Motheo wa Beibele: “Se sengwe le se sengwe seo motho a se bjalago, ke sona seo a tlago go se buna.”—Bagalatia 6:7.

 Ba bangwe ba re ee. Nyakišišo ya Pew Research Center e hweditše gore ba bane go ba lesome bao ba thomilego go dula mmogo ba dirile seo ka baka la tša ditšhelete. Eupša ka morago ga go dula mmogo ka nakwana bontšhi bja bona ga ba na tšhelete yeo e lekanego go re ba ka nyalana.

 Go dula mmogo pele ga lenyalo go ka ba le ditlamorago tše di sa kgahlišego kudukudu go basadi. Ka mohlala, ka morago ga go re ba hlalane, gantšhi basadi ke bona ba swanetšego go tšwela pele ba godiša bana.

 Therešo e sa fetogego: Ditlamorago tšeo di sa kgahlišego tša go dula mmogo pele ga lenyalo di ka feta kgole tšeo di ka go thušago.

 Molao wa motheo wa Beibele: “Nna Jehofa,ke Modimo wa lena,Yo a le rutago gore le holege.”—Jesaya 48:17.

 Ba bangwe ba re ee. Go ena le moo, puku ya Fighting for Your Marriage e re:“batho bao ba dulago mmogo pele ga lenyalo gantšhi ga ba lemoge gore go dula mmogo go dira gore go be thata go arogana.” Ka baka la eng? Baratani ba bantšhi ba lemoga gore ga ba na dimelo tša go swana.Eupša ka baka la gore ba na le seruiwa, ba swarišane go patela madulo goba go ima mo go sa letelwago, ba feleditše ba e ba le seo banyakišiši ba se bitšago “the inertia of cohabitation.” b Puku ya Fighting for Your Marriage e tšwela pele ka go re:“ Batho bao ba bego ba tlo arogana pele ga lenyalo ba feleletša ba nyalana ka gobane go ba bonolo gore ba tšwele pele ba dula mmogo.”

 Therešo e sa fetogego: Go e na le go go thuša go dira phetho e botse, go dula mmogo go ka dira gore go be thata go tšwa le ge di se tša go lokela.

 Molao wa motheo wa Beibele: “Yo bohlale o bona kotsi gomme a ikuta,Eupša wa setlaela o sepela a lebile kotsi yeo gomme a wela mathateng”—Diema 22:3.

 O ka phema ditlamorago tše mpe tša go dula mmogo pele ga lenyalo gomme wa kgona go ba le lenyalo le le atlegago. Bjang? Ka go latela ditekanyetšo tša Beibele tša lenyalo. Tšea nako e lekanego go tseba motho yo o nyakago go mo nyala pele le thoma go dula mmogo bjalo ka monna le mosadi bao ba nyalanego. Go kaone gore o kgethe motho yo o tlago go mo nyala o lebeletše dilo tšeo a di dumelago le dika tša gagwe tše di kgahlišago go e na le go lebelela tsela yeo a bonagalago ka yona.

 Beibele e na le dikeletšo tšeo di ka go thušago go ba le lenyalo le le thabilego. c Ka mohlala, Beibele e na le melao ya motheo yeo e ka go thušago  go . . .

•   phema go se tshepagale

•   leka go ba molekane yo mokaone wa lenyalo

•   bona mafokodi a motho yo ge le sa tsebana ga kaone

 Go ithuta kamoo go oketšegilego ka thaba ye, bona karolo yeo e rego “Lenyalo Le Lapa” go jw.org.

 Molao wa motheo wa Beibele: “Lengwalo ka moka le buduletšwe ke Modimo gomme le hola ka go ruta.”—2 Timotheo 3:16