Batswadi ba bangwe bao ba šomago ba ka kgetha go iša bana ba bona kheretšheng, e lego lefelo leo le šomago go swana le ka klaseng. Na o swanetše go iša ngwana wa gago moo?

•  Dipotšišo tšeo o swanetšego go di botšiša

•  Seo o ka se dirago

 Na go iša ngwana wa ka kheretšhe go tlo dira gore ke se sa gwerana le yena? Go ka direga. Mengwageng ya mathomo ya ge ngwana a sa gola, bjoko bja gagwe bo gola ka lebelo ka tsela yeo e amago segwera sa gagwe le batho ba bangwe. Leka go fetša nako e ntši le ngwana wa gago ka nako ye e bohlokwa ya ge a sa gola.—Doiteronomio 6:6, 7.

•    Batswadi bao ba nyakago go iša bana ba bona kheretšhe ba swanetše go nagana ka ge e ba ba tlo kgona go ba le segwera se sebotse le ngwana wa bona.

 Na kheretšhe e tlo fokodiša tutuetšo ya gago ngwaneng wa gago? Go ka direga. Puku ya Hold On to Your Kids e re: “Ge bana ba banyenyane ba fetša nako e ntši ba le gotee, ba tlo dira dilo go swana.”

•    Batswadi bao ba nyakago go iša bana ba bona kheretšhe ba swanetše go nagana ge e ba ba tla dula e le bona tutuetšo e kgolo maphelong a bana ba bona.

 Na kheretšhe e tlo dira gore ngwana wa gago a hlalefe ge a thoma go tsena sekolo? Ba bangwe ba a dumela. Ba bangwe ba re kheretšhe e ka ama bokgoni bja ngwana ga nyenyane goba ya se bo ame. Le ga go le bjalo, Penelope Leach e lego setsebi sa menagano ya bana o ngwadile gore: “Le se ke la dumela gore dilo tšeo ngwana a ithutago tšona sekolong di tlo mo hola kudu go feta dilo tše dingwe ka moka bophelong, goba gore o swanetše gore a ye sekolong e sa le yo monyenyane kudu. Ge e ba o dumela seo, o tla ba o nyatša ‘thuto’ yeo o e filego ngwana wa gago go tloga ge a sa belegwa.”

•   Batswadi bao ba nyakago go iša bana ba bona kheretšhe ba swanetše go nagana ka ge e ba go hlokagala goba ge e ba seo se tlo hola bana ba bona.

 Na wena goba molekane wa gago e ka ba yena a dulago ka gae gomme a hlokomela bana? Mabakeng a mangwe batswadi ba šomela gore ba be le tšhelete e lekanego gore ba kgone go hlokomela dilo tšeo ba nago le tšona. Na seo se bohlokwa?

•   Batswadi bao ba nyakago go iša bana ba bona kheretšheng, ba swanetše go nagana ge e ba ba ka kgona go fokotša ditshenyagalelo gomme ba phela bophelo bjo bonolo gore motswadi o tee a kgone go dula ka gae gore a hlokomele ngwana.

 Phetho ya go iša ngwana kheretšheng e swanetše go dirwa feela ka morago ga go lebelela mehola le mathata ao a ka tšwelelago. Bjale le swanetše go dira’ng ge e ba le phetha ka gore le tla iša ngwana wa lena kheretšheng?

 Beibele e re “yo bohlale o šetša dikgato tša gagwe.” (Diema 14:15) Diriša molao o wa motheo ge o dutše o nagana ka mohuta le ge e le o fe wa tlhokomelo ya ngwana.

 Nyakišiša ka dikgetho tšeo o nago le tšona

•   Batswadi ba bangwe ba kgetha go iša ngwana wa bona legaeng la motho moo go nago le motho o tee goba ba mmalwa bao ba hlokomelago sehlophana sa bana.

•   Batswadi ba bangwe ba na le ba gabo bona goba mohlokomedi yo a hlokomelago ngwana wa bona.

 Diphetho ka moka di na le mehola le mathata ao a ka tšwelelago. Ke ka baka la’ng o sa boledišane le batswadi bao ba dirišetšego ditsela tše dingwe tša go hlokomela bana? Beibele e re: “Bohlale ke bja bao ba rerišanago.”—Diema 13:10.

 Ge e ba o kgetha go iša ngwana wa gago kheretšheng. Ge e ba go le bjalo . . .

 Nyakišiša ka Lefelo Leo o tlo Išago Ngwana go Lona

•   Na kheretšhe yeo e molaong? Na e na le mangwalo a semmušo, goba na e tumile bjang?

•   Na e hlwekile e bile e bolokegile?

•   Na bana ba dira eng moo? a

 Nyakišiša ka bahlokomedi

•   Na ba tlwaeditšwe go dira’ng? Se se ka akaretša go tlwaetšwa go ruta bana ba banyenyane, go thuša bana ge ba gobetše, le CPR.

•   Na o kgona go dira nyakišišo ya ge e ba batho bao ba tlago go hlokomela ngwana wa gago ba ile ba golegwa?

•   Na bašomi ba dula ba fetošwa? Ge e ba go le bjalo, ngwana wa gago a ka swanelwa ke go dula a tlwaela difahlego tše difsa.

•   Mohlokomedi o tee o hlokomela bana ba bakae moo kheretšheng? Ge e ba mohlokomedi o tee a hlokomela bana ba bantši, se se bolela gore ngwana wa gago a ka se hlokomelwe ka mo go lekanego. Tlhokomelo yeo ngwana wa gago a e hlokago e tla ithekga ka seo a kgonago go se dira le mengwaga ya gagwe.

•   Na bahlokomedi ba ikemišeditše go boledišana le wena ka dilo tšeo di go tshwenyago goba tšeo di ba tshwenyago?