Banna ba bantši le basadi ba bona ba na le bothata bja go fetša nako ba le gotee le ge ba dula ka lapeng le tee. Ke ka baka la’ng?

•  Ba dula ka ntlong e tee eupša okare ga ba tsebane. Ka baka la’ng?

•  Ke eng seo le ka se dirago?

•  Banyalani ba bangwe ba re’ng.

•  Dipotšišo

•   Go lapa

   Anna o re: “Ge nako ya gore re be gotee e eba gona, ke hwetša monna wa ka a lapile goba nna ke lapile. Ge ke lapile ke no tenwa ke dilo tša go se re selo. Ke bona go le kaone gore re no lebelela TV”.

•   Re šitišwa ke difouno tša rena

   Katherine o re: “Go diriša inthanete goba didirišwa tša elektroniki go ka go tšeela nako. O ka fetša nako e ntši o di diriša o sa boledišane le molekane wa gago e bile wa hwetša okare ga le ka kamoreng e tee.”

•   Go se rate dilo tša go swana

   Jane o re: “Monna wa ka o fetša nako a dira dilo tšeo a di ratago. Ka baka la ge a šoma boima mošomong, o nyaka go dula a nnoši. Eupša ke duma eka re ka fetša nako re le mmogo.”

•   Mošomo

   Mark o re: “Thekinolotši e dira gore batho ba šome le ge ba le ka gae. Gantši ke fetša nako ke bala melaetša le di e-mail tša mošomong go e na le go fetša nako le mosadi wa ka.”

•   Lebelela nako yeo o e fetšago le molekane wa gago e le bohlokwa

   Molao wa motheo wa Beibele: “Le kgonthišetše dilo tše bohlokwa kudu.”—Bafilipi 1:10.

   Seo le ka naganago ka sona: Na dilo tšeo o di dirago di bontšha gore o lebelela lenyalo la gago le le bohlokwa go feta mošomo wa gago le dilo tšeo o di ratago? Na o fetša nako le molekane wa gago ge feela o se na seo o se dirago?

   Keletšo: O se ke wa letela gore dilo di no itiragalela. Beela nako ya go ba le molekane wa gago ka thoko go se na dilo tšeo di ka le šitišago.

   Anna o re: “Ke a thaba ge nna le monna wa ka re dira dilo re le ba babedi feela. Seo se dira gore ke bone gore o a nthata le gore o nyaka go fetša nako a na le nna. Ke moka ge a dira bjalo ke mo rata le go feta.”

•   Le se dumelele difouno tša lena di le laola.

   Molao wa motheo wa Beibele: “Selo se sengwe le se sengwe se na le nako ya sona e beilwego.”—Mmoledi 3:1.

   Seo le ka naganago ka sona: Ke ga kae molaetša wa founong o go dira gore o se ke wa šetša molekane wa gago?

   Keletšo: Lekang gore letšatši le lengwe le le lengwe le be le nako ya go ja gotee gomme le tlogele difounu tša lena ka kamoreng e nngwe. Nako e botse ya gore le kgone go boledišana ka seo se diregilego letšatšing leo ke ge le eja dijo gotee.

•   Ge go kgonega eyang mabenkeleng gotee goba le dire mešomo ya ka gae gotee.

   Molao wa motheo wa Beibele: “Ba babedi ba phala o tee, ka gobane ba hwetša moputso o mobotse ka go itapiša ga bona.”—Mmoledi 4:9.

   Seo le ka naganago ka sona: Ke ga kae moo le sa sepelego gotee ge le eya go reka dijo goba dilo tše dingwe tša ka lapeng?

   Keletšo: Šomang gotee le ge mošomo woo o be o ka dirwa ke motho o tee.

   Nina o re: “Tsela e nngwe ya go dira dilo le le gotee ke ka go ya mabenkeleng le le mmogo, la hlatswa dibjana, la phutha diaparo le go thušana go hlwekiša lebala.”

•    Ipeeleng dilo tšeo le tlago go kgona go di dira

   Molao wa motheo wa Beibele: “Anke go lekalekana ga lena go tsebje bathong bohle.”—Bafilipi 4:5.

   Seo le ka naganago ka sona: O ka tseba bjang gore seo o letetšego gore molekane wa gago a se dire o tla kgona go se dira?

   Keletšo: Boledišanang ka seo yo mongwe le yo mongwe wa lena a se nyakago. Boledišanang ka seo yo mongwe le yo mongwe wa lena a ka se dirago gore le be le nako ya go ba gotee.

   Daniela o re: “Monna wa ka o na le mafolofolo mola nna ke phela ka bolwetši. Gantši ge a nyaka go tšwa, ke mmotša gore a sepele ke tla mmona ge a bowa. Nna ke no šala ka gae go fihla a boa. Ka moka ga rena re thabišwa ke seo re se dirago.”

 Yo mongwe le yo mongwe wa lena a ka thoma pele ka go araba dipotšišo tše a nnoši ke moka ka morago le tle le boledišane ka dikarabo tša lena.

•    Na o nagana gore gona bjale wena le molekane wa gago le fetša nako e ntši le le gotee?

•    O ka re molekane wa gago o šoma bjang tabeng yeo re bolelago ka yona sehlogong se?

•    O nyaka gore molekane wa gago a kaonefatše kae?

•    Ke ga kae moo o sa kwego ge molekane wa gago a bolela le wena o diriša founo?

•    O ka bontšha bjang gore ga o nyake gore molekane wa gago a dire dilo tšeo a ka se kgonego go di dira?

•    Yo mongwe le yo mongwe wa lena a ka dira diphetogo dife gore le hwetše nako bekeng ye le sa šitišwe ke selo?