A re re molekane wa gago o bolela, goba o dira selo seo se go galefišago gomme o leka go dira eka ga se wa kgopišega. Ke moka molekane wa gago a bona gore go na le selo seo se go tshwentšego gomme a thoma go go botšiša gore bothata ke eng. Ge a go botšiša, o tenega le go feta. O ka laola bjang kgalefo ya gago maemong a bjalo?

•  Seo o swanetšego go se tseba

•  Seo o ka se dirago

•   Go galefa go ka go lwatša. Dinyakišišo tšeo di dirilwego di bontšha gore motho yo a sa kgonego go laola kgalefo ya gagwe a ka ipakela malwetši a go swana le madi a magolo (high blood pressure), bolwetši bja pelo, kgateletšego ya monagano (depression) le go dira gore dijo di se šilege gabotse. Le gona, kgalefo e dira gore motho a felelwe ke boroko, a dule a bala-bala, a be le bolwetši bja letlalo le go swarwa ke stroke. Ke ka baka leo Beibele e rego: “Lesa go galefa . . . , gobane seo se lebiša bobeng.”​—Psalme 37:8.

•   Go homola ge o galefišitšwe ke selo se itšego go ka ba kotsi. Go dula o galefile, go ka swantšhwa le bolwetši bjo bo go bolayago ganyenyane-ganyenyane. Ka mohlala, o ka thoma go sola-sola batho ba bangwe goba wa bona eka ga ba na taba le wena. Go ba motho yo bjalo, go ka dira gore batho ba bangwe ba se rate go dula le wena goba gwa dira gore lenyalo la gago le senyege.

•   Lebelela dilo tše dibotse tšeo molekane wa gago a di dirago. Ngwala dilo tše tharo tšeo o di ratago ka molekane wa gago. Ke moka nakong e tlago ge a dira selo seo se go befedišago, nagana ka dilo tše dibotse tšeo o di ngwadilego ka yena. Go dira bjalo go ka go thuša gore o laole kgalefo ya gago.

   Molao wa motheo wa Beibele: “Ipontšheng le le ba lebogago.”​—Bakolose 3:​15.

•    Itlwaetše go lebalela. Selo sa mathomo seo o swanetšego go se dira ke go leka go ipea maemong a molekane wa gago. Se se tla go thuša gore o be le lešoko, e lego seo Beibele e se bitšago gore ke go “[kwelana] bohloko.” (1 Petro 3:8) Ke moka, o ipotšiše gore: ‘Na ke tloga ke na le lebaka le le kwagalago la gore ke se lebalele molekane wa ka?’

   Molao wa motheo wa Beibele: “Go botse ge [motho] a sa latišiše molato.’—Diema 19:11.

•    Bolela kamoo o ikwago ka gona ka tsela e botho le e bohlale. Go e na le gore o sole molekane wa gago, bolela maikwelo a gago. Ka mohlala, go e na le gore o re: “Ga o nnaganele ge o sa mpotše gore o mo kae,” e re: “Ke kwa bohloko ge ke sa tsebe gore o mo kae.” Go bolela kamoo o ikwago ka gona ka tsela e botho go ka go thuša gore o laole kgalefo ya gago.

   Molao wa Motheo wa Beibele: “Anke mantšu a lena ka mehla e be a kgahlišago, a nokilwego ka letswai.”​—Bakolose 4:6.

•    Theetša molekane wa gago ka tlhompho. Ge o fetša go botša molekane wa gago ka seo se go tshwenyago, mo theetše ge a bolela, gomme o se ke wa mo tsena ganong. Ge molekane wa gago a feditše go bolela, boeletša seo a se boletšego go bona ge e ba o mo kwešišitše gabotse. Go no theetša go ka go thuša gore o kgone go laola kgalefo ya gago.

   Molao wa Motheo wa Beibele: ‘Akgofela go kwa, o diege go bolela.’​—Jakobo 1:​19.