Morwa wa gago o a lla o re: “E a mpalela.” “E thata.” “Nka se tsoge ke e kgonne.” O Nyaka go lahlela toulo ka ge a thatafalelwa ke go dira mošongwana o itšego. Ga o rate go bona ngwana wa gago a thatafalelwa ke go dira dilo eupša o nyaka a ithuta go lebeletšana le mathata. Na o swanetše go kitimela go mo thuša? Na o swanetše go mo dumelela gore a lahlele toulo? Goba na o ka ruta ngwana wa gago go phegelela?

 Go phegelela go bohlokwa. Ge batswadi ba ruta bana ba bona gore ba bontšhe bokgoni bja bona ka go šoma ka thata, bana bao gantšhi ba šoma gabotse sekolong e bile ba phela gabotse mmeleng, maikwelong le go ba le segwera se sebotse le batho ba bangwe. Ka lehlakoreng le lengwe ge eba batswadi ba sa dumelele bana ba bona go lebeletšana le maemo a thata, bana bao gantšhi ba ba le kgateletšego ya monagano, ba ikwa ba se na bokgoni gomme ge ba godile ga ba phele bophelo bjo bo kgotsofatšago.

 O ka kgona go Phegelela. Le bana ba banyenyane ba ka ikemišetša go rarolla mathata goba go leka go dira dilo tšeo di bonagalago di le thata. Banyakišiši ba hweditše gore masea a dikgwedi tše 15 a ka leka go rarolla mošongwana o boima ge eba ba ile ba bona motho yo mogolo le yena a ile thatafalelwa pele ke go dira mošomo woo, go ena le go no mmona a dira mošomo woo gabonolo.

 “Ke gopola ke ruta bana ba ka ba banenyana go bofa dieta. Se ga se selo seo o ka ba rutago sona ka letšatši le tee. Ka mehla ge ba be ba swanetše go bofa dieta, go be go ba tšea metsotso e 10 go ya go e 15 ba leka go gopola go dira seo ba nnoši. Ke moka ke be ke ba thuša. Go ba tšere dikgwedi tše mmalwa gore ba kgone go ipofa dieta le ge ka dinako tše dingwe ba be ba fela ba lla ka ge ba nyamišwa ke go se kgone go dira seo. Ke be nka itirela dilo bonolo ka go ba rekela dieta tša go hloka marala. Eupša ka dinako tše dingwe le batswadi ba swanetše go phegelela ele gore ba kgone go ruta bana ba bona seka sa go phegelela..”—Colleen.

 Go phegelela go ka lekwa. Batswadi ba bangwe ka go se lemoge, ba ka nagana gore bana ba bona ga ba kgone go phegelela. Ka tsela efe? Ba kitimela go ba thuša bothateng bjo itšego e sa le ka pela ka ge ba nyaka gore bana ba bona ba ikwe ba le gabotse go ena le gore ba ikwe ba nyamišwa ke gore ga ba kgone go rarolla bothata bjo itšego. Go dira se go ka ba le mafelelo a go se thabiše. Mongwadi yo a bitšwago Jessica Lahey o re, “Ka mehla ge re kitimela go thuša bana ba rena bothateng bjo itšego, e ba eka re botša bana ba rena gore ga re tshepe gore ba ka kgona go dira selo se itšego. a Seo se ba le mafelelo afe? Ge bana ba kopana le bothata bjo itšego ba ka tlogela go leka go bo rarolla ba nagana gore ba hloka motho yo mogolo gore a ba ntšhe bothateng bjoo.

 Ba kgothaletše gore ba šome ka thata. Batswadi ba ka ruta bana ba bona go phegelela ka go ba nea mešongwana yeo e swanetšego mengwaga ya bona. Ka mohlala bana ba mengwaga ya magareng ga 3 le 5 ba ka phutha diaparo tša bona gotee le go paka dibapadišwa tša bona. Bana bao ba godilego ba ka thuša batswadi ba bona go paka dijo ka rakeng, go beakanya tafola pele ba eja le ka morago ga gore ba fetše go ja, go ntšha ditlakala ka ntle le go phumola mo go nago le ditšhila. Baswa bao ba lego mahlalagading ba ka kgona go dira mešongwana e thata go swana le go hlwekiša, go hlokomela le go lokiša didirišwa. Ga se ka mehla bana ba thabelago go dira mešongwana ya ka gae, eupša ba a holega ge eba batswadi ba bona ba ba nea maikarabelo a gore ba hlokomele ka gae go tloga e sa le ba ba nyenyane. Ba holega bjang? Ba ithuta go šoma ka thata gomme seo se tlo ba thuša gore ge ba hwetša mešomo e thata ge ba godile, ba se ke ba e tlogela.

 Molao wa motheo wa Beibele: “Go šoma ka thata go a hola.”—Diema 14:23.

 “O se ke wa no nea bana ba gago mošomo ele fela gore ba swarege. Ga go na motho yo a thabelago seo, gaešita le bona bana. Ba nee mošomo wa bohlokwa wo ba ka go thušago ka wona. Ge eba ngwana wa gago e le yo monyenyane mo nee mošomo wa ka ntlong wa go phumola dilo tšeo a ka di fihlelelago. Ge eba o hlatswa koloi, mo dumelele gore a go thuše go hlatswa dikarolwana tša tlase moo wena o sa kgonego go go fihlelela gabonolo. O se ke wa lebala go leboga ngwana wa gago ka mošomo o mobotse wo a o dirilego.”—Chris.

 Hlahla ngwana wa gago ge a dira mešomo e thata. Ka dinako tše dingwe bana ba fela maatla ge ba thatafalelwa ke go dira mošomo o itšego. Ge o ruta ngwana wa gago selo se seswa o ka leka se. Sa pele, dira mošomo woo ngwana wa gago a go lebeletše. Ke moka le dire mošomo woo le le mmogo. Ka morago, lebelela ngwana wa gago a dira mošomo woo ke moka o mo nee ditšhišinyo tšeo di šomago. Mafelelong, dumelela ngwana wa gago gore a dire mošomo woo a le noši.

 Molao wa motheo wa Beibele: “Ke le beetše mohlala gore go etša ge ke dirile go lena, le lena le dire bjalo.”—Johane 13:15.

 “Bjalo ka batswadi, ke bone gore re swanetše go beela bana ba rena mohlala o mobotse wa go phegelela ge e ba re nyaka gore ba se lahlele toulo ge ba dira selo se itšego. Re swanetše go ba bontšha seka seo re nyakago ba se hlagolela.”—Doug.

 Thuša ngwana wa gago go lemoga gore motho yo mongwe le yo mongwe a ka thatafalelwa ke go dira selo se itšego. Botša ngwana wa gago ka dilo tšeo o ilego wa thatafalelwa ke go di dira le kamoo o ilego wa holega ka gona ka gobane o se wa fela matla. Hlalosetša ngwana wa gago gore go tlwaelegile gore go thata go dira dilo tše diswa le gore go dira diphošo go ka mo thuša gore a ithute. Kgonthišetša ngwana wa gago gore o sa tlo dula o mo thuša le ge a ka thatafalelwa ke go dira selo se itšego. Go etša ge mešifa e tia ge o itšhidulla, ngwana wa gago le yena a ka kgona go phegelela ge o mo dumelela gore a lebeletšane le mathata. Ka gona, ge ngwana wa gago a lebeletšana le mathata, o se ke wa kitimela go mo thuša le semeetseng, mo dumelele gore a leke go rarolla bothata bjoo a nnoši. Puku ya How Children Succeed e re, “Tsela e kaone ya gore motho wa moswa e be yo a tiilego le yo a gotšego monaganong, ke go leka go dira selo seo go ka se bego bonolo go se dira.”

 Molao wa motheo wa Beibele: “Go kaone gore motho a lebane le mathata e sa le yo moswa.”—Dillo tša Jeremia 3:27.

 “Ge o dumelela bana ba gago gore ba leke go dira selo seo se ba thatafalelago, bana bao ba tlo holega ge ba tseba gore batswadi ba kgona go ba thuša. Ka morago ga nako, ba ka no se sa thatafalelwa gomme ba ba le bokgoni le go tseba gore go phegelela go a hola.”—Jordan.

 Reta maiteko e sego bohlale. Ka mohlala, go e na le gore o re, “O šomile gabotse molekong wo o o ngwadilego! O bohlale kudu,” o ka re, “O šomile gabotse molekong wo o o ngwadilego! Ke thabišwa ke tsela yeo o badilego ka thata ka gona.” Ke ka baka la eng go le bohlokwa go reta maiteko go e na le go reta bohlale? Ngaka yeo e bitšwago Carol Dweck o re, Go reta bohlale bja ngwana “go ka dira gore ngwana yoo a se sa ikholofela ge a ka thatafalelwa ke go dira selo se itšego.” O tšwela pele ka gore: “Selo se sekaone seo batswadi ba ka se direlago bana ba bona ke go ba ruta go rata go dira dilo tše diswa, go ithuta diphošong tša bona, go šoma ka thata le go hwetša tsela e mpsha ya go dira dilo. Bana ba bona ba ka se dire dilo ka gobane ba nyaka go retwa.” b

 Molao wa motheo wa Beibele: “Motho o lekwa ka theto yeo a e hwetšago.”—Diema 27:21.