Dipsalme 24:1-10
Psalme ya Dafida. Koša.
24 Lefase ke la Jehofa le tšeo di tletšego go lona,+Naga le bao ba dulago go yona.+
2 O le tiišitše godimo ga mawatle,+Wa le thea wa le tiiša godimo ga dinoka.+
3 Ke mang a ka rotogelago thabeng ya Jehofa,+Le gona ke mang a ka emago lefelong la gagwe le lekgethwa?+
4 Ke yo diatla tša gagwe di hlokago molato le yo a hlwekilego pelong,+Yo a sa tšeego moya Wa ka e le wo o hlokago mohola,+Goba a ena ka bofora.+
5 O tla tloga le tšhegofatšo e tšwago go Jehofa+Le toko e tšwago go Modimo yo a mo phološago.+
6 Wo ke moloko wa bao ba mo tsomago,Wa bao ba nyakago sefahlego sa gago, wena Modimo wa Jakobo.+ Seʹlah.
7 “Emišang dihlogo, lena dikgoro,+Iphagamišeng lena mejako ya neng le neng,+Gore go tsene Kgoši ya letago!”+
8 “Bjale ke mang Kgoši ye ya letago?”+“Ke Jehofa wa senatla le yo matla,+Jehofa wa mogale ntweng.”+
9 “Emišang dihlogo, lena dikgoro;+Ee, di emišeng, lena mejako ya neng le neng,Gore go tsene Kgoši ya letago!”+
10 “Bjale ke mang Kgoši ye ya letago?”“Jehofa wa madira ke yena Kgoši ya letago.”+ Seʹlah.
