Dipsalme 61:1-8
Go moopediši: Diriša dikwadi. Psalme ya Dafida.
61 Ekwa sello sa ka sa ge ke go lopa, hle Modimo.+Theetša thapelo ya ka.+
2 Ke tla lla ke le pheletšong ya lefase ge pelo ya ka e fokola, ka llela wena.+Anke o nkiše leswikeng leo le mphetago ka bogolo.+
3 Gobane o bile setšhabelo sa ka,+O bile tora e tiilego ge ke be ke lebeletšane le lenaba.+
4 Ke tla ba moeng ka tenteng ya gago go iša mehleng ya neng le neng;+Ke tla tšhabela tlase ga maphego a gago moo nka utamago gona.+ Seʹlah.
5 Gobane wena Modimo o theeditše dikeno tša ka.+O nneile leruo leo le thabelwago ke bao ba boifago leina la gago.+
6 O tla okeletša kgoši matšatši a yona;+Nywaga ya yona e tla feta ya meloko e mentši yeo e tlago go tla e hlatlamana.+
7 E tla dula pele ga Modimo go iša mehleng ya neng le neng;+Hle romela botho le therešo, gore tšona di e šireletše.+
8 Ka gona ke tla opelela leina la gago ka mo go sa felego,+Gore ke phethe dikeno tša ka letšatši le letšatši.+
