Puku ya Pele ya Dikgoši 14:1-31
14 Ka nako yeo Abija morwa wa Jeroboama o ile a lwala.
2 Ka gona Jeroboama a re go mosadi wa gagwe: “Hle eya o itokiše, gomme o itire eka ke wena motho yo mongwe gore batho ba se tsebe gore ke wena mosadi wa ka, ke moka o ye Shilo. Moporofeta Ahija o gona moo. Ke yena yoo a boletšego gore ke tlo ba kgoši ya setšhaba se.
3 Tšea dinkgwa tše lesome, dikuku tšeo di kgabišitšwego ka dithorwana godimo ga tšona le lepotlelo la todi ya dinose, gomme o ye le tšona go yena ke moka yena o tla go botša gore go tla diragala eng ka mošemane yo.”
4 Ke moka mosadi wa Jeroboama a dira ka mokgwa woo Jeroboama a mmoditšego gore a dire ka gona. O ile a itokiša, ke moka a ya Shilo gomme a fihla ntlong ya Ahija. Ahija o be a se sa bona ka baka la botšofadi.
5 Eupša Jehofa o be a boditše Ahija gore: “Mosadi wa Jeroboama o tla go wena go tlo go botšiša mabapi le morwa wa gagwe ka gobane morwa wa gagwe o a lwala. Ke tla go botša seo o swanetšego go mmotša sona. Ge a fihla go wena o tla be a itirile eka ke motho yo mongwe.”
6 Ya re ge Ahija a se no kwa dikgato tša mosadi wa Jeroboama a tsena ka mojako, a re go yena: “Tsena, wena mosadi wa Jeroboama. Ke ka baka la eng o itirile eka ke wena motho yo mongwe? Ke romilwe gore ke go botše molaetša wo o kwešago bohloko.
7 Sepela o yo botša Jeroboama o re: ‘Jehofa Modimo wa Isiraele o re: “Ke go kgethile gare ga batho ba geno, gomme ka go dira moetapele wa setšhaba sa ka sa Isiraele.
8 Ke moka ka phamola mmušo go ba ntlo ya Dafida gomme ka go nea wona. Eupša wena ga se wa ka wa swana le mohlanka wa ka Dafida yoo a ilego a kwa melao ya ka le go latela ditaelo tša ka ka pelo ya gagwe ka moka, a ba a dira dilo tšeo di lokilego pele ga ka.
9 Eupša o ile wa dira dilo tše mpe go feta dikgoši ka moka tšeo di bilego gona pele ga gago, gomme wa itirela modimo yo mongwe le medimo ya diswantšho gore o nkgopiše, ke moka wa mphuralela.
10 Ka baka leo, ke tlišetša ba ntlo ya Jeroboama masetlapelo, gomme ke tla fediša monna yo mongwe le yo mongwe ntlong ya Jeroboama gotee le banna ba go hloka mohola le ba maemo a tlasana bao ba lego Isiraele. Le gona, ke tla fedišetša ba ntlo ya Jeroboama sa ruri go swana le motho yo a tlošago boloko go fihlela bo se sa bonala.
11 Motho yo mongwe le yo mongwe yo e lego wa Jeroboama yo a tlago go hwela motseng o tla jewa ke dimpša, gomme yo mongwe le yo mongwe yoo a hwelago nageng o tla jewa ke dinonyana, ka gobane ke Jehofa yo a boletšego seo.”’
12 “Bjale emelela o boele ntlong ya gago. Ge o se no fihla motseng, ngwana yoo o tlo hwa.
13 Baisiraele ka moka ba tla mo llela gomme ba mmoloka. E tla ba yena feela wa lapa la Jeroboama yo a tlago go bolokwa lebitleng, ka gobane ke yena feela go lapa la Jeroboama yoo Jehofa Modimo wa Isiraele a bonego se sebotse go yena.
14 Jehofa o tla ikgethela motho yo a tlago go buša Isiraele yoo a tlago go fediša lapa la Jeroboama go tloga letšatšing leo go fihla le lehono.
15 Jehofa o tla otla Isiraele, gomme ya ba bjalo ka ge eka ke lehlaka leo le koba-kobegago ka meetseng. Ke moka a fediša Baisiraele nageng ye e botse yeo a bego a e file borakgolokhukhu ba bona gomme a dira gore ba phatlalale go fihla ka mošola wa Noka ya Eforate, ka gobane ba dirile dikota tše kgethwa gore ba kgopiše Jehofa.
16 Le gona ke tla lahla Isiraele ka baka la dibe tšeo Jeroboama a di dirilego le tšeo Isiraele e di dirilego ka baka la gagwe.”
17 Ke moka mosadi wa Jeroboama a tloga a boela morago Thiritsa. Ge a batamela mojakong wa ntlo, mošemane yoo a hwa.
18 Ka gona ba mmoloka, gomme Isiraele ka moka ya mo llela go ya le ka seo Jehofa a se boletšego a diriša mohlanka wa gagwe e lego moporofeta Ahija.
19 Ditaba ka moka tša Jeroboama, tša kamoo a ilego a fenya dintwa le kamoo a bušitšego ka gona, di ngwadilwe ka pukung ya histori ya mehleng ya dikgoši tša Isiraele.
20 Jeroboama o bušitše mengwaga e 22, ka morago ga moo a hlokofala go no swana le borakgolokhukhu ba gagwe, ke moka Nadaba morwa wa gagwe a buša legatong la gagwe.
21 Ka nako yeo Rehoboama morwa wa Solomone e be e le kgoši ya Juda. O bile kgoši a na le mengwaga e 41 gomme o bušitše mengwaga e 17 a le Jerusalema, e lego motse woo Jehofa a bego a o kgethile gare ga meloko ka moka ya Isiraele gore a bee leina la gagwe go wona. Leina la mmago Rehoboama e be e le Naema wa Moamoni.
22 Le gona batho ba Juda ba be ba dira tše mpe pele ga Jehofa. Dibe tšeo ba ilego ba di dira di ile tša mo galefiša kudu go feta kamoo borakgolokhukhu ba bona ba ilego ba mo galefiša ka gona.
23 Le bona ba ile ba ikagela mafelo a phagamego, diphilara tše kgethwa* le dikota tše kgethwa mmotong o mongwe le o mongwe o phagamego le ka tlase ga mohlare o mongwe le o mongwe o motala.
24 Le gona, go be go na le banna bao ba bego ba gweba ka mmele tempeleng moo nageng. Ba be ba dira dilo ka moka tšeo di šišimišago tšeo di bego di dirwa ke ditšhaba tšeo Jehofa a di rakilego gare ga Baisiraele.
25 Ka ngwaga wa bohlano wa ge go buša Kgoši Rehoboama, Kgoši Shishaka wa Egepeta o ile a ya go lwa le Jerusalema.
26 O ile a tšea mahumo ao a bego a le ntlong ya Jehofa le ao a bego a le ntlong ya kgoši. A tšea dilo ka moka, a ba a tšea le dikotse ka moka tša gauta tšeo Solomone a bego a di dirile.
27 Ka gona Kgoši Rehoboama o ile a dira dikotse tša koporo legatong la tšela di ilego tša tšewa ke Kgoši Shishaka, a di fa balaodi ba baleti bao ba bego ba leta mojakong wa ntlo ya kgoši gore ba di hlokomele.
28 Nako le nako ge kgoši e eya ntlong ya Jehofa, baleti ba be ba tšea dikotse tšeo gomme ba sepela le yona, ke moka ka morago ba di bušetša lefelong leo ba letago ba le go lona.
29 Ditaba ka moka tša Rehoboama le dilo ka moka tšeo a di dirilego di ngwadilwe ka pukung ya histori ya mehleng ya dikgoši tša Juda.
30 Rehoboama le Jeroboama ba be ba dula ba elwa.
31 Mafelelong Rehoboama o ile a hlokofala go no swana le borakgolokhukhu ba gagwe gomme a bolokwa Motseng wa Dafida. Abijama* morwa wa gagwe o ile a buša legatong la gagwe. Leina la mmago Rehoboama e be e le Naema wa Moamoni.
