Puku ya Pele ya Dikgoši 19:1-21
19 Ahaba o ile a botša Isebele dilo ka moka tšeo Eliya a di dirilego le kamoo Eliya a bolailego baporofeta ka moka ka sabola.
2 Ge a realo, Isebele a romela molaetša go Eliya a re: “Anke medimo e nkotle e be e oketše kotlo yeo ge e ba gosasa ka yona nako ye ke tla be ke se ka go dira tšeo o di dirilego baporofeta!”
3 Ge a ekwa seo a tšhoga, ke moka a tšhaba gore a phološe bophelo bja gagwe. O ile a fihla Beresheba ya Juda gomme a tlogela mohlanka wa gagwe moo.
4 A sepela leeto la go tšea letšatši, a ya lešokeng gomme a dula ka fase ga mohlare wa mohlopi. Ke moka a kgopela Modimo gore o nyaka go hwa. A re: “Go lekane! Wena Jehofa, mpolaye ka gobane ga ke phale borakgolokhukhu ba ka ka selo.”
5 Ke moka a robala ka fase ga mohlare wa mohlopi. Eupša morongwa a tla kapelapela gomme a mo kgwatha a re: “Tsoga o je.”
6 Ge a lebelela mo a bego a išitše hlogo gona, a bona senkgwa sa nkgokolo godimo ga maswika a go fiša le jeke ya meetse. O ile a ja a ba a nwa, ke moka ka morago a boela a robala.
7 Ka morago morongwa wa Jehofa a boa gape la bobedi a mo kgwatha a re: “Tsoga o je, ka gobane leeto le o tlago go le tšea ke le letelele.”
8 Ka gona a tsoga a ja a ba a nwa, gomme ka ge dijo tšeo di be di mo file matla, o ile a sepela matšatši a 40 le mašego a 40 go fihlela a fihla Horebe, e lego thaba ya Modimo wa nnete.
9 Ge a fihla moo o ile a tsena ka leweng gomme a robala moo. Ke moka bošego Jehofa a bolela le yena a re: “O dira eng mo Eliya?”
10 Eliya a re: “Ke be ke dutše ke hlankela wena Jehofa Modimo wa madira ka mafolofolo ka gobane Baisiraele ba hlanogetše kgwerano ya gago. Ba phušotše dialetare tša gago, ba ba ba bolaya baporofeta ba gago ka sabola, bjale go šetše nna ke nnoši. Gona bjale ba nyaka go mpolaya.”
11 Eupša a re go Eliya: “Etšwa o yo ema pele ga Jehofa thabeng.” Ka nako yeo Jehofa o be a feta, gomme gwa ba le moya o mogolo woo o bego o phatlola dithaba e bile o pšhatla maswika a magolo pele ga Jehofa. (Eupša Jehofa o be a se moo moyeng woo.) Ka morago ga moya woo gwa ba le tšhišinyego ya lefase. (Eupša Jehofa o be a se tšhišinyegong yeo.)
12 Ka morago ga tšhišinyego yeo gwa ba le mollo. (Eupša Jehofa o be a se mollong woo.) Ka morago ga mollo woo gwa kwagala lentšu la tlasana leo le bolelago ka go iketla.
13 Ge Eliya a se na go kwa lentšu leo, o ile a khupetša sefahlego sa gagwe ka seaparo sa gagwe sa baporofeta, a tšwa a ema mojakong wa lewa, ke moka a kwa lentšu leo le mmotšiša le re: “Eliya o nyaka eng mo?”
14 Eliya a re: “Ke be ke dutše ke hlankela wena Jehofa Modimo wa madira ka mafolofolo ka gobane Baisiraele ba hlanogetše kgwerano ya gago, ba phušola dialetare tša gago ba ba ba bolaya baporofeta ba gago ka sabola, bjale go šetše nna ke nnoši. Gona bjale ba nyaka go mpolaya.”
15 Jehofa a re go yena: “Boela morago gomme o ye lešokeng la Damaseko. Ge o fihla moo o kgethe* Hasaele gore e be kgoši ya Siria.
16 O kgethe* le Jehu setlogolo sa Nimishi gore e be kgoši ya Isiraele. O kgethe le Elisha morwa wa Shafata yo a tšwago Abele-mehola gore e tle e be moporofeta legatong la gago.
17 Motho yo a tlago go phonyokga sabola ya Hasaele, o tla bolawa ke Jehu. Yo a tlago go phonyokga sabola ya Jehu, o tla bolawa ke Elisha.
18 Le gona, go sa na le batho ba 7 000 (dikete tše šupago) mo Isiraeleng, bao ba sa kago ba khunamela Baali le go mo khisa.”
19 Ka gona ge a tloga moo, o ile a ya a hwetša Elisha morwa wa Shafata a sa lema ka dipoo tše 24 tšeo di pannwego ka tše pedi tše pedi, gomme yena a le go tše pedi tša mafelelo. Ke moka Eliya a ya go yena a mo fošetša seaparo sa gagwe sa baporofeta.
20 Ka morago ga moo, Elisha a tlogela dipoo tšeo gomme a kitimela Eliya ke moka a re: “Hle e re ke yo laela batswadi ba ka. Ka morago ga moo ke tla go latela.” Eliya a re go yena: “Eya, eupša o boe. Ke mang nna nka go thibelago?”
21 Ka gona a goma a yo tšea dipoo tše pedi gomme a yo dira dihlabelo ka tšona. Ke moka a tšea dikota tša megoma le tša dijoko a di beša a apea nama ya dipoo tšeo, a e fa batho gomme ba eja. Ka morago ga moo, a emelela a latela Eliya ke moka a thoma go mo hlankela.
