Puku ya Pele ya Dikgoši 3:1-28
3 Solomone o ile a nyalelana le Farao kgoši ya Egepeta. O ile a nyala morwedi wa Farao a mo tliša Motseng wa Dafida, go fihlela a feditše go aga ntlo ya gagwe le ntlo ya Jehofa gotee le leboto la go dikologa Jerusalema.
2 Eupša batho ba be ba sa direla dihlabelo mafelong a phagamego, ka gobane ka nako yeo go be go sešo gwa agwa ntlo ya go hlompha Jehofa.
3 Solomone a tšwela pele a rata Jehofa ka go sepela ka melao yeo Dafida tatagwe a mo rutilego yona. Eupša o be a fiša dihlabelo le go neela dibego mafelong a phagamego ao go rapelwago go ona.
4 Kgoši Solomone o ile a ya Gibeoni go yo dira dihlabelo moo, ka gobane leo e be e le lefelo le le tumilego leo le phagamego leo go rapelwago go lona. Solomone a dira dihlabelo tša go fišwa tše 1 000 (sekete) aletareng yeo.
5 Ge Solomone a le moo Gibeoni, Jehofa o ile a iponagatša go yena torong bošego gomme a re: “Nkgopele seo o nyakago ke go fa sona.”
6 Ke moka Solomone a re: “Wena o bontšhitše tate mohlanka wa gago lerato le legolo* ge a be a go hlankela* ka pelo ka moka, a tshepega e bile a dira dilo tša go loka. O ile wa tšwela pele o mmontšha lerato le legolo* go fihla lehono ka ge o kgethile morwa wa gagwe gore a dule setulong sa gagwe sa bogoši.
7 Bjale wena Jehofa Modimo wa ka, o beile nna mohlanka wa gago gore ke be kgoši legatong la Dafida tate, le ge ke sa le mošemanyana e bile ke se na phihlelo.*
8 Nna mohlanka wa gago ke gare ga setšhaba seo o se kgethilego, sona setšhaba se segolo seo se sa balegego.
9 Ke kgopela gore o nee nna mohlanka wa gago pelo e kwago gore ke ahlole setšhaba sa gago, le go lemoga phapano magareng ga se se lokilego le se sebe, ka gobane ke mang yo a ka kgonago go ahlola setšhaba se sa gago se segolo?”*
10 Jehofa o ile a kgahlišwa ke gore Solomone o ile a kgopela seo.
11 Modimo a re go yena: “Ka ge o kgopetše seo gomme o se wa kgopela gore ke go okeletše matšatši a go phela, goba mahumo goba gore manaba a gago a hlokofale, eupša o kgopetše kwešišo ya gore o kgone go ahlola melato,
12 ke tla go fa seo o se kgopetšego. Ke tla go fa pelo e bohlale le e kwešišago. Le gona, ka ge go sa ka gwa ba le motho yo mongwe wa go swana le wena pele ga gago, go ka se tsoge go bile le yo mongwe gape wa go swana le wena.
13 Ke tla go nea le tšeo o sego wa di kgopela, ke tla go nea mahumo le letago e le gore go se ke gwa ba le kgoši ya go swana le wena nakong ka moka ya ge o sa phela.
14 Le gona ge e ba o ka kwa ditaelo tša ka le melao ya ka go etša ge Dafida tatago a be a di kwa, ke tla dira gore o phele nako e telele.”
15 Ge Solomone a phafoga, a lemoga gore seo e be e le toro. Ke moka a ya Jerusalema, a ema pele ga areka ya kgwerano ya Jehofa, a dira dihlabelo, a ba a dira le dihlabelo tša go dira khutšo le Modimo.* Ke moka a direla bahlanka ba gagwe monyanya.
16 Ka nako yeo, basadi ba babedi ba bagweba-ka-mmele ba ile ba tla go kgoši gomme ba ema pele ga yona.
17 Ke moka mosadi wa mathomo a re: “Tshwarelo hle mong wa ka, nna le mosadi yo re dula ka ntlong e tee, gomme ke ile ka belega ngwana ke na le yena ka ntlong.
18 Ka morago ga matšatši a mararo ke belege, mosadi yo le yena o ile a belega ngwana. Re be re le mmogo, re le ba babedi feela go se na motho yo mongwe ka ntlong.
19 Morwa wa mosadi yo o ile a hlokofala bošego ka gobane mosadi yo o ile a robala godimo ga gagwe.
20 Ka gona o ile a tsoga gare ga bošego a tšea morwa wa ka yo a bego a robetše kgauswi le nna* mola nna mohlanka wa gago ke be ke sa robetše. Ke moka a tšea morwa wa gagwe yo a hlokofetšego a mmea kgauswi le nna, gomme yena a robala le morwa wa ka.
21 Ge ke tsoga mesong gore ke nyantšhe morwa wa ka, ke ile ka lemoga gore o hlokofetše. Ka gona ke ile ka mo lebeledišiša, gomme ka bona gore ga se morwa wa ka yo ke mmelegego.”
22 Eupša mosadi yola yo mongwe a re: “Aowa, morwa wa ka ke yo a phelago gomme wa gago ke yo a hlokofetšego!” Eupša mosadi yola wa mathomo yena a re: “Aowa, morwa wa gago ke yo a hlokofetšego gomme wa ka ke yo a phelago.” Ba be ba ngangišana ka wona mokgwa wo pele ga kgoši.
23 Mafelelong kgoši ya re: “Yo mongwe o re: ‘Morwa wa ka ke yo a phelago gomme morwa wa gago ke yo a hlokofetšego!’ Mola yo mongwe le yena a re: ‘Aowa, morwa wa gago ke yo a hlokofetšego gomme morwa wa ka ke yo a phelago!’”
24 Kgoši ya re: “Mpheng sabola.” Ka gona ba mo fa yona.
25 Ke moka kgoši ya re: “Kgaolang ngwana yo a phelago ka diripa tše pedi, le tšee seripa se sengwe le se nee mosadi yo ke moka se sengwe le se nee yo mongwe.”
26 Ka ge mmago ngwana yo a bego a phela a be a šokela morwa wa gagwe, o ile a kgopela kgoši a re: “Aowa hle mong wa ka! Mo neeng ngwana yo a phelago, le se ke la ba la leka la mmolaya.” Eupša mosadi yola yo mongwe o be a re: “E ka se be wa gago goba wa ka. Mo kgaoleng ka diripa tše pedi!”
27 Ke moka kgoši ya re: “Neang mosadi wa mathomo ngwana yo a phelago! Le se ke la mmolaya ka gobane ke yena mmagwe.”
28 Ka gona, Baisiraele ka moka ba kwa kamoo kgoši e ahlotšego ka gona, gomme ba thoma go hlompha kgoši kudu, ka gobane ba be ba bona gore Modimo o mo file bohlale bja gore a kgone go ahlola.
Mengwalo ya tlase
^ Goba, “lerato le le botegago.”
^ Phetolelo ya lentšu ka lentšu e re, “sepela pele ga gago.”
^ Goba, “lerato le le botegago.”
^ Phetolelo ya lentšu ka lentšu e re, “le ge ke sa tsebe go tšwa le go tsena.”
^ Goba mohlomongwe, “se sethata.” Phetolelo ya lentšu ka lentšu e re, “se se imelago.”
^ Goba, “dihlabelo tša mohlakanelwa.”
^ Phetolelo ya lentšu ka lentšu e re, “sehubeng sa ka.”
