Puku ya Pele ya Dikoronika 11:1-47
11 Ge nako e dutše e eya, meloko ka moka ya Isiraele ya tla go Dafida kua Heburone gomme ya re: “Bona! Re batho ba geno.
2 Nakong e fetilego ge Saulo e be e le kgoši ya rena, ke wena o bego o eteletše Baisiraele pele ge ba eya ntweng. Jehofa o itše go wena: ‘O tla diša batho ba ka ba Isiraele, e bile o tla ba moetapele wa Isiraele.’”
3 Ka gona banna ba bagolo ka moka ba Isiraele ba tla go kgoši kua Heburone, gomme Dafida a dira kgwerano le bona moo Heburone pele ga Jehofa. Ke moka ba tlotša Dafida gore e be kgoši ya Isiraele go ya ka seo Jehofa a se boletšego a diriša Samuele.
4 Ka morago Dafida le Baisiraele ka moka ba ya Jerusalema, ke gore Jebusi, nageng yeo Bajebusi ba bego ba dula go yona.
5 Badudi ba Jebusi ba be ba kwera Dafida ba re: “O ka se tsoge o tsene mo.” Eupša Dafida a thopa lefelo leo le šireletšegilego la Tsione, leo ga bjale e lego Motse wa Dafida.
6 Ka gona Dafida a re: “Motho yo a ka fenyago Bajebusi pele, e tla ba molaodi wa mašole.” Joaba morwa wa Tseruya a ya pele gomme ya ba molaodi wa mašole.
7 Ke moka Dafida a dula lefelong leo le šireletšegilego. Ke ka baka leo ba ilego ba le bitša gore ke Motse wa Dafida.
8 Dafida a thoma go aga maboto le meago e mengwe go dikologa Mmotong le dikarolong tše dingwe tša motse gomme Joaba a tsošološa motse woo ka moka.
9 Dafida a thoma go ba le matla kudu, gomme Jehofa Modimo wa madira o be a mo thekga.
10 Batho ba ba latelago e be e le mašole a matla a Dafida. Bona gotee le Baisiraele ka moka ba ile ba mo thuša gore e be kgoši go ya ka seo Jehofa a bego a se tshepišitše Isiraele.
11 A ke maina a mašole a matla a Dafida: Jashobeama morwa wa Mohakimone, moetapele wa mašole a mararo a matla. O ile a bolaya batho ba fetago ba 300 (makgolo a mararo) ka nako e tee ka lerumo la gagwe.
12 O be a latelwa ke Eleasara morwa wa Dodo wa Moahohi. E be e le yo mongwe wa mašole a mararo a matla.
13 Ke yena a bego a na le Dafida kua Pasa-damima, moo Bafilisita ba bego ba kgobokane gona gore ba tlo lwa. Go be go na le tšhemo yeo e bego e tletše mabele,* gomme batho ba be ba tšhabile ka baka la Bafilisita.
14 Eupša a ema gare ga tšhemo yeo, a se dumelele gore e tšewe gomme a dulela go bolaya Bafilisita. Ka go realo Jehofa a phološa batho ba gagwe ka tsela e kgolo.
15 Go baetapele ba 30, ba bararo ba bona ba ile ba ya go Dafida leweng kua Adulama, nakong ya ge Bafilisita ba be ba hlomile ditente Moeding wa Barefaimi.
16 Dafida o be a iphihlile lefelong leo le šireletšegilego. Ka nako yeo, mašole a Bafilisita a be a le Betlelehema.
17 Ke moka Dafida a re: “O ka re nka nwa meetse ao a tšwago sedibeng seo se lego kgauswi le keiti ya Betlelehema!”
18 Ge mašole a mararo a matla a ekwa seo, a ile a gapeletša go ya kampeng ya Bafilisita gomme a ga meetse sedibeng seo se bego se le keiting ya Betlelehema, gomme a tla a a nea Dafida, eupša Dafida a gana go nwa meetse ao, ke moka a a tšhollela fase gore e be sebego sa Jehofa.
19 A re: “Nka se tsoge ke dirile selo sa mohuta wo pele ga Modimo wa ka! Nka se nwe meetse ao a gelwego ke batho bao ba beilego maphelo a bona kotsing gore ba a ge ka gobane ge nka a nwa go tla ba go le bjalo ka ge eka ke nwa madi a bona. Ka gobane ba beile maphelo a bona kotsing e le gore ba ye ba ge meetse ao.” Ke moka a gana go a nwa. Tše ke dilo tšeo di dirilwego ke mašole a mararo a matla.
20 Abishai ngwanabo Joaba e be e le yo mogolo go sehlopha se sengwe sa mašole a matla a mararo. Ka letšatši le lengwe o ile a bolaya banna ba fetago ba 300 (makgolo a mararo). O be a tumile go swana le mašole a le a mangwe a matla a mararo.
21 Go mašole ao a mararo, o be a tumile kudu go feta ao a mabedi, e bile e le moetapele wa ona, eupša o be a se na maemo a go swana le a mašole a le a mararo a mathomo a matla.
22 Benaya morwa wa Jehoyada o be a na le sebete, e bile o ile a dira dilo tše dikgolo kua Kabatsiele. O ile a bolaya barwa ba babedi ba Ariele wa Moaba. Le gona o ile a tsena ka gare ga sediba nakong ya ge go ewa kapoko gomme a bolaya tau.
23 O ile a bolaya le monna wa Moegepeta yo e bego e le tšiširipa. E be e le wa botelele bja go lekana dimithara tše 2,5.* Le ge Moegepeta yoo a be a swere lerumo leo le bego le le boima go swana le kota ya balogi, Benaya o ile a ya go yena a swere molamo, a mo amoga lerumo leo ke moka a mmolaya ka lona.
24 Tše ke dilo tšeo di dirilwego ke Benaya morwa wa Jehoyada, o be a tumile go swana le mašole a matla a le a mararo a mathomo.
25 Le ge Benaya a be a tumile kudu go feta mašole a 30, o be a se na maemo a go swana le a mašole a le a mararo a mathomo. Le gona Dafida o ile a mo kgetha gore e be yo mogolo go batho ba gagwe ba mo leta gagwe.
26 Mašole a matla e be e le Asahele ngwanabo Joaba, Elihanani morwa wa Dodo wa Betlelehema,
27 Shamothe wa Moharori, Heletse wa Mopeloni,
28 Ira morwa wa Ikeshe wa Mothekoa, Abi-esere wa Moanathothe,
29 Sibekai wa Mohusha, Ilai wa Moahohi,
30 Maharai wa Monetofa, Helebe morwa wa Baena wa Monetofa,
31 Itai morwa wa Ribai wa Gibea ya Babenjamini, Benaya wa Mopirathone,
32 Hurai wa meeding* ya Gaashe, Abiele wa Moaraba,
33 Asimafete wa Mobahurimi, Eliahaba wa Moshaalabima,
34 barwa ba Hasheme wa Mogitsoni, Jonathane morwa wa Shagee wa Moharari,
35 Ahiama morwa wa Sakara wa Moharari, Elifale morwa wa Uri,
36 Hefere wa Momekera, Ahija wa Mopeloni,
37 Hetsero wa Mokaramele, Naarai morwa wa Esibai,
38 Joele ngwanabo Nathane, Mibihara morwa wa Hagiri,
39 Tseleke wa Moamoni, Naharai wa Mobeerothe, e lego morwadi wa dibetša tša Joaba morwa wa Tseruya,
40 Ira wa Moithira, Garebe wa Moithira,
41 Uria wa Mohethe, Sabada morwa wa Ahalai,
42 Adina morwa wa Shisa wa Morubeni, yo e bego e le moetapele wa Barubeni, a na le mašole a matla a 30,
43 Hanana morwa wa Maaka, Joshafate wa Momethine,
44 Utsia wa Moashitherothe, Shama le Jeiele barwa ba Hothama wa Moaroere,
45 Jediale morwa wa Shimiri le Joha ngwanabo wa Mothitsi,
46 Eliele wa Momahafima, Jeribai le Joshafia barwa ba Elinaama le Ithima wa Momoaba,
47 Eliele, Obede le Jaasiele wa Mometsoba.
Mengwalo ya tlase
^ Phetolelo ya lentšu ka lentšu e re, “garase.”
^ Phetolelo ya lentšu ka lentšu e re, “dikubiti tše hlano.” Kubiti e tee e lekana le disenthimithara tše 44,5. Bona Dit. B14.
^ Bona Tlhaloso ya Mantšu.
