Puku ya Pele ya Dikoronika 13:1-14
13 Dafida a boledišana le balaodi bao ba hlokometšego dihlopha tša batho ba 1 000 (sekete) le tša bao ba hlokometšego dihlopha tša batho ba 100 le moetapele yo mongwe le yo mongwe.
2 Ke moka Dafida a bolela le setšhaba ka moka sa Isiraele a re: “Ge e ba le bona e le mo gobotse e bile go amogelega go Jehofa Modimo wa rena, a re romeleng molaetša go bana babo rena bao ba lego dinageng ka moka tša Isiraele, re o romele le go baperisita le Balefi bao ba lego metseng yeo e nago le mafulo gore ba tle ba kgobokane le rena.
3 Ke moka re buše Areka ya Modimo wa rena.” O boletše se ka gobane ba be ba sa e hlokomele mehleng ya Saulo.
4 Batho ka moka ba ile ba dumelelana le taba yeo ka gobane ba be ba bona taba ye e kwagala.
5 Ka gona Dafida a kgoboketša Baisiraele ka moka, go tloga ka bao ba bego ba dula kgauswi le noka* ya Egepeta go fihla ka bao ba bego ba dula Lebo-hamathi, gore ba tliše Areka ya Modimo wa nnete go tšwa Kiriathe-jearima.
6 Dafida le Baisiraele ka moka ba ya Baala, e lego Kiriathe-jearima, yeo e lego ya Juda, gore ba tliše Areka ya Modimo wa nnete, e lego Jehofa yo a dutšego godimo* ga bakerubi. Areka yeo, batho ba be ba bitša leina la gagwe ba le pele ga yona.
7 Eupša ba ile ba nametša Areka ya Modimo wa nnete godimo ga kariki e mpsha gore ba e tloše ntlong ya Abinadaba gomme Usa le Ahio ba be ba hlahla dikgomo tšeo di bego di goga kariki yeo.
8 Dafida le Baisiraele ka moka ba be ba bina pele ga Modimo wa nnete ka dipelo tša bona ka moka, ba opela, ba letša diharepa, diletšo tše dingwe tša metato, meropa, disimbala le diphalafala.
9 Eupša ge ba fihla seboeng* sa Kidone, Usa a otlolla seatla sa gagwe gomme a swara Areka ka gobane dikgomo di nyakile di e wiša.
10 Ka baka leo, Jehofa a galefela Usa kudu gomme a mmolaya, ka gobane o ile a otlolla letsogo la gagwe gomme a swara Areka, ka gona a hwela gona moo pele ga Modimo.
11 Eupša Dafida a galefa ka gobane Jehofa o ile a galefela Usa. Ke moka lefelo leo la bitšwa gore ke Peretse-usa* go ba go fihla le lehono.
12 Letšatšing leo Dafida o ile a boifa Modimo wa nnete kudu, ke moka a re: “Areka ya Modimo wa nnete e tla fihla bjang go nna?”
13 Dafida a se tliše Areka go yena Motseng wa Dafida, eupša a re e išwe ntlong ya Obede-edomo wa Mogathe.
14 Areka ya Modimo wa nnete e be e le lapeng la Obede-edomo. E dutše moo dikgwedi tše tharo gomme Jehofa a dula a šegofatša lapa la Obede-edomo le dilo ka moka tšeo a bego a na le tšona.
Mengwalo ya tlase
^ Goba, “Shihoro.”
^ Goba mohlomongwe “gare ga.”
^ Bona Tlhaloso ya Mantšu.
^ Ke gore, “Go Galefela Usa.”
