Puku ya Pele ya Dikoronika 15:1-29
15 Dafida a ikagela dintlo Motseng wa Dafida gomme a lokišetša Areka ya Modimo wa nnete lefelo a ba a e hlomela tente.
2 Ke moka Dafida a re: “Ga go na motho yo a tlago go rwala Areka ya Modimo wa nnete ge e se Balefi, ka gobane Jehofa o ba kgethile gore ba rwale Areka ya Jehofa le go dula ba mo hlankela.”
3 Ke moka Dafida a kgoboketša setšhaba sa Isiraele ka moka Jerusalema gore go tlišwe Areka ya Jehofa lefelong leo a e lokišeleditšego lona.
4 Dafida a kgoboketša ditlogolo tša Arone le Balefi:
5 go Bakohathe, o ile a tšea Uriele yoo e bego e le moetapele le banababo ba 120 (lekgolo-masomepedi),
6 go Bamerari, o ile a tšea Asaya yoo e bego e le moetapele le banababo ba 220 (makgolopedi-masomepedi),
7 go Bagerishome, o ile a tšea Joele yoo e bego e le moetapele le banababo ba 130 (lekgolo-masometharo),
8 go ditlogolo tša Elisafane, o ile a tšea Shemaya yoo e bego e le moetapele le banababo ba 200 (makgolo a mabedi),
9 go ditlogolo tša Heburone o ile a tšea Eliele yoo e bego e le moetapele le banababo ba 80,
10 go ditlogolo tša Usiele, o ile a tšea Aminadaba yoo e bego e le moetapele le banababo ba 112 (lekgolo-lesomepedi).
11 Go oketša moo, Dafida o ile a bitša moperisita Tsadoko le moperisita Abiathara, a bitša le Uriele, Asaya, Joele, Shemaya, Eliele le Aminadaba bao e bego e le Balefi,
12 ke moka a re go bona: “Ke lena baetapele ba botatago lena ba Balefi. Lena le banababo lena ikgethagatšeng, gomme le tliše Areka ya Jehofa Modimo wa Isiraele lefelong leo ke e lokišeleditšego lona.
13 Ka ge mathomong e se ya rwalwa ke lena, Jehofa Modimo wa rena o ile a re galefela kudu ka gobane ga se ra ka ra nyaka mokgwa wa maleba wa go rwala areka.”
14 Ka gona baperisita le Balefi ba ile ba ikgethagatša gore ba kgone go iša Areka ya Jehofa Modimo wa Isiraele moo e swanetšego go ya gona.
15 Ke moka Balefi ba tšea Areka ya Modimo wa nnete ba e rwala magetleng ka dikota, ba dira go ya le kamoo Moshe a bego a ba laetše ka gona go ya ka seo Jehofa a bego a mmoditše sona.
16 Ke moka Dafida a botša baetapele ba Balefi gore ba kgethe banababo bona ba diopedi gore ba opelele godimo ba thabile, ba letša le diletšo tša mmino, e lego diletšo tša metato, diharepa le disimbala.
17 Ka gona Balefi ba kgetha Hemane morwa wa Joele, go banababo ba kgetha Asafa morwa wa Berekia. Ke moka go banababo bona ba Bamerari ba kgetha Ethane morwa wa Kushaya,
18 go banababo bona ba bangwe ba kgetha Sakaria, Bene, Jaatsiele, Shemiramothe, Jehiele, Uni, Eliaba, Benaya, Maaseya, Matitia, Elifelehu le Mikinea, gotee le Obede-edomo le Jeiele bao ba bego ba leta dikeiti.
19 Hemane, Asafa le Ethane bao e bego e le diopedi, ba be ba swanetše go letša disimbala tša koporo,
20 gomme Sakaria, Atsiele, Shemiramothe, Jehiele, Uni, Eliaba, Maaseya le Benaya, ba be ba letša diletšo tša metato tšeo di bego di lla ka mokgwa wa Alamothe.*
21 Ke moka Matitia, Elifelehu, Mikinea, Obede-edomo, Jeiele le Asasia, bona ba be ba hlahla mmino ka go letša diharepa ka mokgwa wa Sheminithe.*
22 Kenania moetapele wa Balefi o be a hlokometše modiro wa kamoo areka e swanetšego go rwalwa ka gona, ka gobane o be a tseba mošomo woo gabotse,
23 gomme Berekia le Elikanaba ba be ba leta Areka.
24 Baperisita e lego Shebania, Joshafate, Nethanele, Amasai, Sakaria, Benaya le Eliesere, ba be ba leletša diphalafala godimo pele ga Areka ya Modimo wa nnete. Obede-edomo le Jehia le bona ba be ba leta Areka.
25 Dafida le banna ba bagolo ba Isiraele le baetapele ba batho ba dikete ba ile ba ya ntlong ya Obede-edomo ba thabile, ba ile go tšea areka ya kgwerano ya Jehofa.
26 Ka morago ga gore Modimo wa nnete a thuše Balefi bao ba bego ba rwele areka ya kgwerano ya Jehofa, ba ile ba mo direla dihlabelo ka dipowana tše šupa le dinku tše tona tše šupa.
27 Dafida o be a apere seaparo sa go hloka matsogo sa lešela le lebotse. Seaparo seo se be se aperwe le ke Balefi ka moka bao ba rwalago Areka, diopedi le Kenania yoo e bego e le moetapele wa diopedi e bile a eteletše pele modiro wa kamoo areka e swanetšego go rwalwa ka gona. Dafida o be a apere le efoda* ya lešela la linene.
28 Baisiraele ka moka ba be ba rotoga le areka ya kgwerano ya Jehofa ba goeletša ka lethabo e bile ba letša naka, diphalafala, disimbala e bile ba leletša diletšo tša metato le diharepa godimo.
29 Eupša ge areka ya kgwerano ya Jehofa e fihla Motseng wa Dafida, Mikala morwedi wa Saulo o ile a lebelela fase ka lefasetere gomme a bona Kgoši Dafida a tshelatshela e bile a thabile, gomme yena a thoma go mo nyatša ka pelong ya gagwe.
Mengwalo ya tlase
^ Bona Tlhaloso ya Mantšu.
^ Bona Tlhaloso ya Mantšu.
^ Bona seswantšho go Dit. B5.
