Puku ya Pele ya Dikoronika 20:1-8
20 Mathomong a ngwaga,* nakong ya ge dikgoši di eya dintweng, Joaba o ile a eta mašole pele gomme a senya naga ya Baamoni. O ile a ya a dikologa Raba nakong ya ge Dafida a be a šetše Jerusalema a e hlasela gomme a e fediša.
2 Ke moka Dafida a tšea mphapahlogo wo o bego o le hlogong ya Malikamo, gomme boima bja ona bo be bo lekana le dikhilokgerama tše 34* tša gauta, e bile o be o na le maswika a bohlokwa, ke moka wa bewa godimo ga hlogo ya Dafida. O ile a tšea le dilo tše dintšhi tšeo di bego di šetše motseng ka morago ga ntwa.
3 O ile a ntšha le batho bao ba bego ba le moo motseng gomme a ba fa mošomo wa go betla maswika ka didirišwa tše bogale tša tšhipi le ka dilepe. Tšeo ke tše Dafida a di dirilego metseng ka moka ya Baamoni. Mafelelong Dafida le mašole a gagwe ka moka ba boela Jerusalema.
4 Ka morago ga moo gwa tsoga ntwa magareng ga Baisiraele le Bafilisita kua Getsere. Ka yona nako yeo, Sibekai wa Mohusha a bolaya Sipai yo e bego e le setlogolo sa Barefaimi gomme Baisiraele ba fenya Bafilisita.
5 Ba lwa ntwa e nngwe gape le Bafilisita, gomme Elihanani morwa wa Jairi a bolaya Lahemi ngwanabo Goliata wa Mogathe yoo kota ya lerumo la gagwe e bego e le e koto go swana le kota ya balogi.
6 Gwa tsoga ntwa e nngwe gape kua Gathe moo go bego go na le monna yoo e bego e le yo mogolo ka tsela yeo e sa tlwaelegago, a na le menwana e tshela diatleng ka bobedi, le menwana e tshela maotong ka bobedi, ka moka ga yona e le e 24. Le yena e be e le setlogolo sa Barefaimi.
7 Monna yoo o ile a dulela go kwera Baisiraele. Ka gona Jonathane morwa wa Shimea ngwanabo Dafida a mmolaya.
8 Banna ba e be e le ditlogolo tša Barefaimi ba kua Gathe. Ba ile ba bolawa ke Dafida le bahlanka ba gagwe.
Mengwalo ya tlase
^ Ke gore, ka seruthwane.
^ Phetolelo ya lentšu ka lentšu e re, “talente.” Talente e tee e lekana le dikhilokgerama tše 34,2. Bona Dit. B14.
