Puku ya Pele ya Dikoronika 28:1-21
28 Dafida a kgobokeletša baetapele ka moka ba Isiraele Jerusalema, e lego baetapele ba meloko, baetapele ba dihlopha tša mašole bao ba bego ba hlankela kgoši, baetapele ba batho ba sekete le baetapele ba batho ba lekgolo, baetapele bao ba bego ba hlokometše dithoto ka moka tša kgoši, mehlape le barwa ba kgoši gotee le bahlankedi ba kgoro le banna ka moka ba matla le bao ba bego ba na le bokgoni.
2 Ke moka Kgoši Dafida a emelela a re:
“Ntheetšeng lena banabešo le setšhaba sa ka. Ke be ke duma ka pelo ya ka ka moka go aga ntlo yeo areka ya kgwerano ya Jehofa e bego e tla dula go yona, le moo Modimo a tlago go bea maoto a gagwe gona e bile ke lokišeleditše tše dingwe tša dilo gore e tle e agwe.
3 Eupša Modimo wa nnete o itše go nna: ‘O ka se agele leina la ka ntlo, ka gobane o lwele dintwa e bile o bolaile batho ba bantšhi.’*
4 Eupša Jehofa Modimo wa Isiraele o kgethile nna gare ga ba ntlo ya tate gore ke be kgoši ya Isiraele go ya go ile, ka gobane o kgethile Juda gore e be moetapele, ke moka molokong wa Juda a kgetha ntlo ya tate gomme go barwa ba tate a kgetha nna gore a ntire kgoši ya Isiraele ka moka.
5 Ka ge Jehofa a mphile barwa ba bantšhi, go barwa ba ka ka moka o kgethile Solomone morwa wa ka gore a dule setulong sa bogoši sa Jehofa gomme a buše Isiraele.
6 “O itše go nna: ‘Solomone morwa wa gago ke yena a tlago go aga ntlo ya ka le malapa a ka, ka gobane ke mo kgethile gore e be morwa wa ka gomme nna ke tla ba tatagwe.
7 Ge a ka ikemišetša go kwa melao ya ka le go thekga dikahlolo tša ka, go etša ge a dira bjalo gona bjale, ke tla tiiša bogoši bja gagwe gore bo be gona go ya go ile.’
8 Bjale ke le botša pele ga Baisiraele ka moka, e lego phuthego ya Jehofa e bile ke le botša Modimo wa rena a theeditše ke re: Le nyake go tseba melao ka moka ya Jehofa Modimo wa lena le be le ekwe, e le gore le tšwele pele le dula nageng ye e botse, gomme le tle le e fetišetše go barwa ba lena gore e be bohwa bja bona go ya go ile.
9 “Le gona, wena Solomone morwa wa ka, tseba Modimo wa tatago gomme o mo hlankele ka pelo ka moka e bile o thabile* ka gobane Jehofa o hlahloba dipelo ka moka e bile o tseba selo se sengwe le se sengwe seo motho a se naganago. Ge o ka mo nyaka o tlo dira gore o mo hwetše, eupša ge o ka mo tlogela le yena o tla go tlogela go ya go ile.
10 Bjale bona, Jehofa o kgethile wena gore o mo agele ntlo, e lego lefelo le le kgethwa. Eba le sebete o nape o thome go šoma.”
11 Ke moka Dafida a fa morwa wa gagwe Solomone polane ya mathudi a tempele le diphapoši tša yona, diphapoši tšeo go bewago dilo go tšona, diphapoši tša ka godimo, diphapoši tša ka garegare le phapoši yeo Modimo a lebalelago batho dibe ka go yona.*
12 A mo fa le polane ya dilo ka moka tšeo moya wa Modimo o bego o mmontšhitše tšona mabapi le malapa a ntlo ya Jehofa, diphapoši ka moka tša go jela, diphapoši tšeo go bego go bewa matlotlo a ntlo ya Modimo wa nnete le diphapoši tšeo go bego go bewa dilo tšeo di kgethagaditšwego.
13 Dafida o ile a hlalosetša Solomone kamoo dihlopha tša baperisita le tša Balefi di bego di swanetše go beakanywa ka gona. O ile a mmotša le gore mešomo ka moka yeo e bego e swanetše go dirwa ka ntlong ya Jehofa e be e le efe. A ba a mo hlalosetša le kamoo dibjana ka moka tša ka ntlong ya Jehofa di swanetšego go šomišwa ka gona.
14 O ile a mmotša le gore go swanetše go šomišwe gauta e kaakang e lego gauta yeo e tlago go dira dibjana ka moka tšeo di tlago go dirišetšwa mešomo ya go se swane. A ba a mmotša gore go swanetšwe go šomišwe silifera e kaakang yeo e tlago go dirišetšwa go dira dibjana ka moka tša silifera le dibjana ka moka tša silifera tšeo di tlago go dirišetšwa mešomo ya go se swane,
15 le gore go tlo šomišwa gauta e kaakang go dira dihlomelamabone tša go fapafapana tša gauta le mabone a tšona a gauta, le gore go tlo dirišwa silifera e kaakang go dira dihlomelamabone tša go fapafapana tša silifera le mabone a tšona a silifera go ya le kamoo sehlomelalebone se sengwe le se sengwe le mabone a sona se tlago go dirišwa ka gona.
16 Le gona o ile a mmotša boima bja gauta ya go dira ditafola tša go bea dinkgwa tše di hlatlagantšwego,* a mmotša gore go nyakega gauta e kaakang go dira tafola e nngwe le e nngwe, a mmotša le gore go nyakega silifera e kaakang ya go dira ditafola tša silifera.
17 O ile a mmotša le gore a dire diforoko, dibjana le dikomiki ka gauta yeo e sego ya tswakwa le selo, a mmotša gore sebjana se sengwe le se sengwe se se nyenyane sa gauta se tlo nyaka gauta e kaakang le gore sebjana se sengwe le se sengwe se se nyenyane sa silifera se tlo nyaka silifera e kaakang.
18 A ba a mmotša gore go nyakega gauta e kaakang yeo e sa tswakwago le selo ya go dira aletare ya go fišetša diorelo le ya go dira seswantšho seo se emelago koloi ya Modimo, e lego bakerubi ba gauta bao ba phurolotšego maphego a bona gore ba khupetše areka ya kgwerano ya Jehofa.
19 Dafida a re: “Jehofa ke yena a ntlhahlilego a ba a mpha bohlale bja gore ke thale polane ye le go ngwala dilo ka moka tšeo di nyakegago go yona.”
20 Ke moka Dafida a re go Solomone morwa wa gagwe: “Eba sebete o tie matla gomme o thome go šoma. O se ke wa boifa goba wa tšhoga, ka gobane Jehofa Modimo, yena Modimo wa ka, o na le wena. A ka se ke a go lahla goba a go tlogela, eupša o tla ba le wena go ba go fihla ge modiro ka moka wa go aga ntlo ya Jehofa o fedile.
21 O na le dihlopha tša baperisita le tša Balefi tšeo di tla bego di hlankela ntlong ya Modimo wa nnete. O na le bašomi bao ba nago le bokgoni e bile ba ikemišeditše go dira mošomo o mongwe le o mongwe gotee le baetapele le batho ka moka bao ba tlago go dira dilo ka moka tšeo o ba laelago tšona.”
Mengwalo ya tlase
^ Phetolelo ya lentšu ka lentšu e re, “o tšholotše madi.”
^ Phetolelo ya lentšu ka lentšu e re, “le ka moya o thabilego.” Bona Tlhaloso ya Mantšu.
^ Phetolelo ya lentšu ka lentšu e re, “phapoši yeo go bewago sekhurumelo.”
^ Ke gore, dinkgwa tšeo di neetšwego Modimo.
