Lengwalo la Pele la Johane 1:1-10
1 Re le ngwalela mabapi le yo a bego a le gona go tloga mathomong, yo re mo kwelego, yo re mmonego ka mahlo a rena, yo re mo swerego ka diatla tša rena, yena yo a bolelago lentšu leo le neago bophelo.
2 (Re tsebile bophelo bja go ya go ile bjo bo tšwago go tatago rena e bile re a bo kwešiša, bjo re ilego ra botšwa ka bjona, le gona re le tsebiša ka bjona).
3 Re le boditše dilo tšeo re di bonego le tšeo re di kwelego, e le gore le be boteeng le rena le Tate le Morwa wa gagwe Jesu Kriste.
4 Ka gona, re ngwala dilo tše e le gore re thabe kudu.
5 Re nyaka go le tsebiša molaetša wo, wo re o kwelego go Jesu, wa gore Modimo ke seetša gomme bao ba lego boteeng le yena ga ba leswiswing.
6 Ge e ba re bolela gore re dira dilo tšeo di swanago le tšeo a di dirago, eupša re tšwela pele re sepela leswiswing,* gona re tla be re bolela maaka gomme re sa phele go ya ka nnete.
7 Eupša ge e ba re sepela seetšeng go swana le ge yena a le seetšeng,* gona re tlo ba boteeng le yena gomme madi a Jesu Morwa wa gagwe a re hlwekiša sebeng sohle.
8 Ge e ba re re: “Ga re na sebe,” gona re a iphora gomme re bontšha gore ga re tshepe dithuto tša nnete.
9 Modimo o a botega e bile o lokile, ka gona ge e ba re ipobola dibe tša rena o tlo re lebalela gomme a re hlwekiša dilong ka moka tše mpe.
10 Ge e ba re re: “Ga se ra dira sebe,” go no swana le ge re re Modimo o na le maaka, gomme ga re dumele seo Modimo a se bolelago.
