Lengwalo la Pele la Johane 3:1-24
3 Ruri lerato leo Tate a re bontšhitšego lona ke le legolo, ke ka baka leo re bitšwago bana ba Modimo, gomme re bana ba gagwe e le ka nnete. Ke ka baka leo lefase le sa re tsebego, ka gobane ga le tsebe Modimo.
2 Bana bešo le dikgaetšedi, gona bjale re bana ba Modimo, eupša ga se gwa tšwa go bonagala gore re tla ba eng nakong e tlago. Re a tseba gore ge a iponagatša re tlo swana le yena, ka gobane re tla mmona ka wona mokgwa wo a lego ka wona.
3 Yo mongwe le yo mongwe yo a nago le kholofelo ye yeo e lego go yena, o a itlhwekiša go swana le ge yena yoo a hlwekile.
4 Motho yo mongwe le yo mongwe yo a dulago a dira sebe o tshela molao, le gona sebe ke go tshela molao.
5 Le tseba le gore Jesu o ile a tla* e le gore a tle a tloše dibe tša rena, e bile ga a ke a dira sebe.
6 Motho yo mongwe le yo mongwe yo a dulago a le boteeng le yena ga a dule a dira sebe. Yo mongwe le yo mongwe yo a dulago a dira sebe ga a mo tsebe e bile ga a na tumelo go yena.
7 Bana ba ba rategago, go se ke gwa ba le motho yo a le forago. Motho yo a dulago a dira dilo tše di lokilego o lokile, go no swana le ge Jesu a lokile.
8 Yo a dulago a dira sebe o ekiša Diabolo, ka gobane Diabolo o be a dutše a dira sebe go tloga mathomong.* Ke ka baka leo Morwa wa Modimo a tlilego go tlo fediša mediro ya Diabolo.
9 Yo mongwe le yo mongwe yo e lego ngwana wa Modimo ga a dule a dira sebe, ka gobane moya wa Modimo o mo go yena* e bile a ka se dule a dira sebe ka gobane ke ngwana wa Modimo.
10 Bana ba Modimo le bana ba Diabolo re ba tseba ka se: Yo mongwe le yo mongwe yo a sa tlwaelago go dira dilo tše di lokilego ga se ngwana wa Modimo, le gona yo mongwe le yo mongwe yo a sa ratego ngwanabo ga se ngwana wa Modimo.
11 Ka gobane go tloga mathomong le kwele gore re swanetše go ratana.
12 Le se ke la swana le Kaine yo e lego ngwana wa Diabolo. Kaine o ile a bolaya ngwanabo. Ke ka baka la’ng a ile a mmolaya? Ka gobane o be a dira dilo tše mpe, eupša ngwanabo yena a dira dilo tše di lokilego.
13 Bana bešo, le se ke la makala ge batho ba lefase le ba le hloya.
14 Re be re le bjalo ka ge eka re hwile, eupša gona bjale re a phela ka gobane re rata bana babo rena. Yo a sa ratego bana babo go bjalo ka ge eka o hwile.
15 Yo mongwe le yo mongwe yo a hloilego ngwanabo ke mmolai gomme le a tseba gore motho yo a bolayago a ka se phele go ya go ile.
16 Re a kwešiša gore lerato ke eng ka gobane Jesu Kriste o re hwetše, ka gona re swanetše go ikemišetša go hwela bana babo rena le dikgaetšedi.
17 Eupša mang le mang yo a nago le dilo tšeo a ka thušago ba bangwe ka tšona, gomme a bona ngwanabo a hloka eupša a se mo kwele bohloko, na re ka re motho yoo o rata Modimo?
18 Bana ba ba rategago, ga se ra swanela go no bolela gore re a ratana, eupša re swanetše re bontšhe ka mediro gore re ratana go tšwa pelong.
19 Ge e ba re dira bjalo re tla tseba gore re nneteng, gomme re tla kgodišega gore Modimo o a re rata.
20 Le ge dipelo tša rena di ka re ahlola dilong tše dingwe, a re duleng re gopola gore Modimo ke yo mogolo go feta dipelo tša rena e bile o tseba dilo ka moka.
21 Bana bešo le dikgaetšedi, ge e ba dipelo tša rena di sa re ahlole, re ka kgona go bolela le Modimo re sa boife selo.
22 Le gona ge e ba re ekwa melao ya gagwe e bile re phela ka tsela yeo e mo kgahlišago, o tla re nea dilo ka moka tšeo re di kgopelago.
23 O re neile taelo ya gore re be le tumelo leineng la Morwa wa gagwe Jesu Kriste, gomme re ratane go etša ge a re laetše.
24 Le gona yo a kwago ditaelo tša Modimo o dula a le boteeng le yena, gomme Modimo le yena o dula a le boteeng le motho yoo. E bile moya o mokgethwa wo a re neilego wona o re thuša go tseba gore o dula a le boteeng le rena.
Mengwalo ya tlase
^ Phetolelo ya lentšu ka lentšu e re, “a bonagatšwa.”
^ Goba “go tloga ge a thoma.” Mo go bolelwa ka nakong ya ge a be a thoma go se kwe Modimo.
^ Phetolelo ya lentšu ka lentšu e re, “ka gobane peu ya gagwe e go yena.”
