Lengwalo la Pele la Johane 5:1-21
5 Yo mongwe le yo mongwe yo a dumelago gore Jesu ke Kriste, ke ngwana wa Modimo, le yo mongwe le yo mongwe yo a ratago Modimo, o rata bana ba Modimo.
2 Ge re rata Modimo e bile re ekwa melao ya gagwe, re tla tseba gore re rata bana ba Modimo.
3 Ge e ba re rata Modimo gona go ra gore re tlo kwa melao ya gagwe. Le gona, melao ya gagwe ga e thata,
4 ka gobane bana ba Modimo ba fenya lefase. Selo seo se re thušitšego go fenya lefase ke tumelo ya rena.
5 Ke mang yo a ka fenyago lefase? Na ga se yo a dumelago gore Jesu ke Morwa wa Modimo?
6 Jesu Kriste o tlile ka meetse le ka madi, ga se a tla ka meetse feela, eupša o tlile ka meetse le ka madi. Le gona, moya o hlatsela taba ye, ka gobane moya ke nnete.
7 Go na le dilo tše tharo tšeo di utollago gore Jesu ke mang.
8 Dilo tšeo ke moya, meetse le madi, gomme dilo tše tše tharo di nea bohlatse bja go swana.
9 Ge e ba re amogela bohlatse bjo batho ba bo neago, gona re swanetše go amogela le bohlatse bjo Modimo a bo neago, ka ge bjona e le bjo bogolo kudu. Ka gobane Modimo o bolela gore Jesu ke Morwa wa gagwe.
10 Motho yo a dumelago go Morwa wa Modimo o dumela bohlatse bjo a bo neilwego. Motho yo a sa dumelego go Modimo, gona o ra gore Modimo o na le maaka, ka gobane ga se a dumela dilo tšeo Modimo a boletšego gore ke bohlatse bja nnete mabapi le Morwa wa gagwe.
11 Bjo ke bohlatse bja gore Modimo o re file bophelo bjo bo sa felego, gomme bophelo bjoo bo tšwa go Morwa wa gagwe.
12 Yo a amogelago Morwa wa Modimo o tla hwetša bophelo bjo bo sa felego, eupša yo a sa mo amogelego a ka se hwetše bophelo bjo bo sa felego.
13 Ke le ngwalela dilo tše gore le tsebe gore le na le bophelo bjo bo sa felego, lena bao le dumelago go Morwa wa Modimo.*
14 Re kgodišegile gore selo se sengwe le se sengwe seo re se rapelelago seo se sepedišanago le thato ya Modimo, yena o a re kwa.
15 Le gona, ge re kgodišegile gore o kwa dilo ka moka tšeo re di kgopelago, gona re a tseba gore re tlo hwetša dilo tšeo re mo kgopetšego tšona.
16 Ge e ba motho a bona ngwanabo a dira sebe eupša sebe seo se sa lebiše lehung, gona a mo rapelele gomme Modimo o tla nea ngwanabo bophelo.* Se se šoma go bao ba dirago sebe seo se sa lebišego lehung. Eupša go na le sebe seo se lebišago lehung. Ga ke botše motho yoo gore a rapele go thuša motho yo a dirago sebe sa mohuta woo.
17 Dilo ka moka tšeo di sa lokago, ke sebe. Eupša go na le sebe seo se sa lebišego lehung.
18 Re a tseba gore motho yo mongwe le yo mongwe yo e lego ngwana wa Modimo, ga a dule a dira sebe. Eupša yo e lego ngwana wa Modimo, Modimo o a mo hlokomela gomme Sathane* a ka se mo dire selo.
19 Re tseba gore re ba Modimo, eupša lefase ka moka le laolwa ke Sathane.
20 Eupša re a tseba gore Morwa wa Modimo o tlile mo lefaseng, a dira gore re kwešiše re be re tsebe Modimo yo e lego wa nnete. Re boteeng le yena ka Morwa wa gagwe e lego Jesu Kriste. Yo ke Modimo wa nnete e bile bophelo bjo bo sa felego bo tšwa go yena.
21 Bana ba ba rategago, sepelelang kgole le medimo ya maaka.
Mengwalo ya tlase
^ Phetolelo ya lentšu ka lentšu e re, “leineng la Morwa wa Modimo.”
^ Mohlomongwe mo go bolelwa ka go lebalelwa.
^ Phetolelo ya lentšu ka lentšu e re, “yo mobe.”
