Puku ya Pele ya Samuele 12:1-25
12 Mafelelong Samuele a re go Baisiraele ka moka: “Ke dirile dilo ka moka tšeo le nkgopetšego gore ke di dire gomme ka le kgethela kgoši yeo e tlago go le buša.
2 Bjale kgoši yeo e tlago go le eta pele še! Ge e le nna, ke tšofetše e bile meriri ya hlogo ya ka ke e mešweu gomme barwa ba ka šeba ba na le lena. Le gona nna ke le etile pele go tloga bosweng bja ka go fihla letšatšing le.
3 Ke nna yo. Ge e ba go na le seo le belaelago ka sona ka nna se boleleng pele ga Jehofa le pele ga motlotšwa wa gagwe: Ke mang yo ke tšerego poo ya gagwe goba tonki ya gagwe? Goba ke mang yo ke ilego ka mo radia goba ka mo gatelela? Ke mang yo ke ilego ka tšea pipamolomo go yena gore ke se ke ka bona phošo yeo a e dirilego? Ge e ba go na le seo ke se dirilego go dilo tše, gona bolelang gomme ke tla lokiša.”
4 Ge a re’alo bona ba re: “Ga se wa re radia goba wa re gatelela goba wa amogela pipamolomo go tšwa go yo mongwe wa rena.”
5 Ke moka a re go bona: “Jehofa ke hlatse ya go le latofatša, gomme motlotšwa wa gagwe lehono ke hlatse ya gore ga se la hwetša selo le ge e le sefe seo le ka mpeago molato ka sona.” Ke moka bona ba re: “Modimo ke hlatse.”
6 Samuele a re go setšhaba: “Jehofa yo a dirišitšego Moshe le Arone go ntšha borakgolokhukhu ba lena nageng ya Egepeta, ke hlatse.
7 Bjale emang gomme ke tla le ahlola pele ga Jehofa go ya ka dilo tše dibotse tšeo Jehofa a di diretšego lena le borakgolokhukhu ba lena.
8 “Gateetee ge Jakobo a tsena Egepeta gomme borakgolokhukhu ba lena ba kgopela thušo go Jehofa, Jehofa o ile a roma Moshe le Arone gore ba ntšhe borakgolokhukhu ba lena Egepeta gomme ba ba tliša lefelong le gore ba dule go lona.
9 Eupša ba lebala Jehofa Modimo wa bona, gomme yena a ba tlogelela Sisera, molaodi wa mašole a Hatsora le Bafilisita le kgoši ya Moaba, bao ba ilego ba tšwela pele ba elwa le bona.
10 Ba kgopela thušo go Jehofa ba re: ‘Re dirile sebe ka gobane re tlogetše go hlankela Jehofa gomme ra hlankela Bobaali le diswantšho tša Ashiterothe. Bjale re kgopela gore o re phološe go manaba a rena e le gore re go hlankele.’
11 Ke moka Jehofa a roma Jerubaali le Bedani le Jefeta le Samuele gomme a le phološa go manaba a lena ao a le dikologilego e le gore le dule le šireletšegile.
12 Ge le bona gore Nahashi kgoši ya Baamoni o lwa le lena, le ile la dulela go re go nna: ‘Aowa, rena re nyaka kgoši yeo e tlago go re buša!’ le ge Jehofa Modimo wa lena e le Kgoši ya lena.
13 Bjale še kgoši yeo le e kgethilego, yona yeo le e kgopetšego. Jehofa o le kgethetše kgoši.
14 Ge e ba le ka boifa Jehofa, la mo hlankela la ba la kwa lentšu la gagwe, la se hlanogele taelo ya Jehofa gomme lena le kgoši yeo e tlago go le buša la latela Jehofa Modimo wa lena, gona go lokile.
15 Eupša ge e ba le ka se kwe lentšu la Jehofa gomme la hlanogela taelo ya Jehofa, gona Jehofa o tla lwa le lena le botatago lena.
16 Emang gomme le bone selo se segolo seo Jehofa a tlago go se dira pele ga lena.
17 Na lehono ga se letšatši la go buna korong? Ke tla kgopela Jehofa gore a neše pula ya magadima ke moka le tla tseba gore le dirile selo se sebe pele ga Jehofa ka go ikgopelela kgoši.”
18 Ke moka Samuele a kgopela Jehofa gomme Jehofa a neša pula ya magadima letšatšing leo moo setšhaba ka moka se ilego sa boifa Jehofa le Samuele kudu.
19 Ka gona setšhaba ka moka sa re go Samuele: “Rapelela rena bahlanka ba gago go Jehofa Modimo wa gago, ka ge re sa nyake go hwa, ka gobane re okeditše dibe tša rena ka go ikgopelela kgoši.”
20 Ke moka Samuele a re go setšhaba: “Le se ke la boifa. Ke nnete gore le dirile dilo tše ka moka tše mpe. Eupša le se ke la tlogela go latela Jehofa, go e na le moo le hlankele Jehofa ka dipelo tša lena ka moka.
21 Le se ke la mo tlogela gomme la latela medingwana ya lefeela yeo e se nago mohola, yeo e ka se le phološego ka gobane ke ya lefeela.
22 Jehofa a ka se lahle batho ba gagwe ka baka la leina la gagwe le legolo, ka gobane Jehofa o bone go swanetše gore a le dire batho ba gagwe.
23 Ge e le nna, nka se tsoge ke senyeditše Jehofa ka go kgaotša go le rapelela. Ke tla tšwela pele ke le ruta ka tsela e botse le e lokilego.
24 Lena boifang Jehofa gomme le mo hlankele ka go tshepega ka dipelo tša lena ka moka. Bonang dilo tše dibotse tšeo a le diretšego tšona.
25 Eupša ge e ba le tšwela pele le dira dilo tše mpe ka boomo, le tla fedišwa, lena gotee le kgoši ya lena.”
