Puku ya Pele ya Samuele 14:1-52
14 Ka letšatši le lengwe Jonathane morwa wa Saulo a re go mohlanka wa gagwe yo a bego a mo rwalela dibetša: “Etla re tshelele kampeng ya Bafilisita bao ba lego ka mošola.” Eupša Jonathane a se botše tatagwe seo.
2 Saulo o be a dula ka ntle ga Gibea ka tlase ga mohlare wa mogarenate kua Migirone. Batho bao ba bego ba na le yena e be e le ba e ka bago ba 600 (makgolo a tshelelago).
3 (Ahija morwa wa Ahitubo, ngwanabo Ikabodi, morwa wa Finease morwa wa Eli, yo e lego moperisita wa Jehofa kua Shilo, o be a swere efoda.) Mašole a be a sa tsebe gore Jonathane o sepetše.
4 Magareng ga ditsejana tšeo Jonathane a bego a nyaka go feta go tšona gore a yo lwa le mašole a Bafilisita ka mošola, go be go na le maswika ao a nago le dintlha ka mahlakoreng a ditsela. Leina la leswika le lengwe e be e le Botsetse mola le lengwe e le Sene.
5 Leswika le lengwe le be le swana le philara le le ka leboa le lebane le Mikimashe gomme le lengwe le le ka borwa le lebane le Geba.
6 Jonathane a re go morwadi wa dibetša tša gagwe: “Etla re tshelele ka mošola moo mašole ao a sa bollago a Bafilisita a kampilego gona. Mohlomongwe Jehofa o tla re lwela, ka gobane ga go seo se ka paledišago Jehofa gore a phološe batho a diriša batho ba bantši goba ba sego kae.”
7 Ge a re’alo, morwadi wa dibetša tša gagwe a re go yena: “Dira selo se sengwe le se sengwe seo o bonago se lokile. Eya go gongwe le go gongwe mo o nyakago go ya gona, gomme nna ke tla ya le wena.”
8 Ke moka Jonathane a re: “Re tla tshelela ka mošola go banna bale, gomme ra itšweletša gore ba re bone.
9 Ge ba ka re go rena: ‘Emang gona moo go fihla re kopana le lena!’ gona re tla ema gona moo, ra se ke ra rotogela go bona.
10 Eupša ge ba ka re go rena: ‘Rotogang le tlo lwa le rena!’ gona re tla rotoga, ka gobane seo e tla ba e le sešupo sa go bontšha gore Jehofa o tla re thuša gore re ba fenye.”
11 Bobedi bja bona ba ya moo mašole a Bafilisita a bego a kampile gona. Ke moka Bafilisita ba re: “Baheberu šebale ba tšwa meleteng moo ba bego ba khutile gona.”
12 Mašole a re go Jonathane le morwadi wa dibetša tša gagwe: “Rotogelang go rena, re tle re le rute go phela le batho!” Ke moka Jonathane a re go morwadi wa dibetša tša gagwe: “A re rotoge, ka gobane Jehofa o tla thuša rena Baisiraele gore re ba fenye.”
13 Ke moka Jonathane a namela mmoto a tšama a swarelela ka matsogo, morwadi wa dibetša tša gagwe a mo šetše morago, gomme Jonathane a thoma go hlasela Bafilisita. Morwadi wa dibetša tša gagwe a eta a bolaya bao Jonathane a bego a se a ba bolaya.
14 Ge Jonathane le morwadi wa dibetša tša gagwe ba be ba hlasela la mathomo, ba ile ba bolaya banna ba e ka bago ba 20, lefelong leo le lekanago le seripa sa ekere ya tšhemo.*
15 Mašole ao a bego a le kampeng le ao a bego a le mebotong, gotee le ao a bego a romilwe gore a ye a hlasele Baisiraele, a ile a tšhoga kudu. Lefase le ile la thoma go šišinyega, gomme Modimo a dira gore Bafilisita ba tšhoge.
16 Bahlapetši ba Saulo kua Gibea ya Benjamini ba bona tlhakahlakano yeo e bego e direga kampeng ya manaba a bona.
17 Saulo a re go mašole ao a bego a na le yena: “Hle, balang banna re bone gore ke mang yo a sego gona.” Ge ba ba bala, ba lemoga gore Jonathane le morwadi wa dibetša tša gagwe ga ba gona.
18 Saulo a re go Ahija: “Batametša Areka ya Modimo wa nnete!” (Ka gobane Areka ya Modimo wa nnete e be e le go Baisiraele ka nako yeo.*)
19 Ya re ge Saulo a sa bolela le moperisita, tlhakahlakano yeo e bego e le kampeng ya Bafilisita ya golela pele. Ke moka Saulo a re go moperisita: “Tlogela seo o se dirago.”
20 Saulo le mašole a gagwe ba kgobokana gomme ba tšwa gore ba yo lwa le Bafilisita. Ge ba fihla ntweng, ba hwetša gore Bafilisita ba bolayane ka disabola gomme tlhakahlakano e le e kgolo kudu.
21 Baheberu bao ba bego ba ema le Bafilisita ba bile ba rotogetše le bona kampeng, ba ile ba ema le Baisiraele bao ba bego ba eteletšwe pele ke Saulo le Jonathane.
22 Banna ka moka ba Isiraele bao ba bego ba khutile tikologong ya dithabeng tša Efuraime ba ile ba kwa gore Bafilisita ba a tšhaba, ke moka le bona ba ba rakediša gore ba lwe le bona.
23 Ba tšama ba ba bolaya go fihla Bethe-abene, gomme Jehofa a phološa Isiraele letšatšing leo.
24 Mašole a Baisiraele a be a lapile kudu letšatšing leo, ka gobane Saulo o be a dirile gore batho ba ikane gore ba ka se je dijo pele ga ge e eba mantšiboa le pele ga ge a itefeleditše go manaba a gagwe. Ka gona gwa se be le lešole leo le jago dijo.
25 Mašole ka moka a ile a tla sethokgweng, ka nako yeo todi ya dinose e be e tletše nageng.
26 Ge mašole a fihla sethokgweng, a ile a bona todi ya dinose e rotha, eupša go be go se na yo a ka e jago, ka gobane a be a boifa keno yeo Saulo a e dirilego.
27 Jonathane yena o be a se a kwa ge tatagwe a be a eniša mašole. O ile a kgotla mamapo a dinose ka ntlhana ya molamo wo a bego a o swere. Ge a eja mamapo ao, mahlo a gagwe a ile a phadima.
28 Ka morago ga moo, yo mongwe wa mašole a re: “Tatago o dirile gore batho ba ikane gore ba ka se je dijo lehono, ka baka la gore yo a ka jago dijo o tlo rogakwa. Ke ka baka leo mašole a lapilego.”
29 Eupša Jonathane a re: “Tate o baketše naga mathata a magolo. Bonang kamoo mahlo a ka a phadimago ka gona ka baka la ge ke latswitše todinyana ye ya dinose.
30 Ge nkabe mašole a ile a lokologa go ja dilo tšeo a di thopilego go manaba a ona lehono, go be go tla ba go le kaone. Le gona nkabe a bolaile Bafilisita ba bantši.”
31 Letšatšing leo a ile a bolaya Bafilisita go tloga Mikimashe go ya Ajaloni gomme mašole a lapa kudu.
32 Ke moka mašole a kitimela go tšea dilo tšeo a di thopilego go manaba a ona, a tšea dinku le dikgomo le dinamane a di bolaela gona moo, gomme a di ja di sa na le madi.
33 Ke moka Saulo a botšwa gore: “Tseba gore mašole a senyetša Jehofa ka go ja nama e na le madi.” Ge ba re’alo, Saulo a re: “Ga se la tshepega. Kgokološetšang leswika le legolo go nna kapelapela.”
34 Ke moka Saulo a re: “Eyang le yo botša mašole le re: ‘Yo mongwe le yo mongwe wa lena a ntlišetše poo ya gagwe le nku ya gagwe, gomme le di bolaeleng mo ke moka le di je. Le se ke la direla Jehofa sebe ka go ja nama le madi a yona.’” Yo mongwe le yo mongwe wa bona a tliša poo ya gagwe bošegong bjoo gomme ba di bolaela moo.
35 Saulo a agela Jehofa aletare. Yeo e bile aletare ya mathomo yeo a e agetšego Jehofa.
36 Ka morago Saulo a re: “A re theogeng re rakediše Bafilisita bošego re yo ba tšeela dilo go fihla go esa, re ka se tlogele le o tee wa bona a sa phela.” Ge a re’alo ba re: “Dira se sengwe le se sengwe seo o bonago se lokile.” Ke moka moperisita a re: “A re botšišeng Modimo wa nnete ka taba ye.”
37 Saulo a botšiša Modimo a re: “Na ke theoge ke rakediše Bafilisita? Na o tla thuša Baisiraele gore ba ba fenye?” Eupša letšatšing leo Modimo a se mo arabe.
38 Ke moka Saulo a re: “Lena baetapele ba setšhaba ka moka, etlang mo, le tle le nyakišiše gore ke sebe sa mohuta mang seo se dirilwego lehono.
39 Ke ikana ka Jehofa Modimo yo a phelago, yoo a phološitšego Isiraele, gore le ge sebe se ka hwetšwa go Jonathane morwa wa ka, o swanetše go hwa.” Eupša ga go na yo a ilego a mo araba.
40 Ke moka Saulo a botša Baisiraele ka moka a re: “Lena le tla ba ka lehlakoreng le lengwe gomme nna le morwa wa ka Jonathane ra ba ka go le lengwe.” Ke moka batho ba re go Saulo: “Dira seo o bonago se lokile.”
41 Saulo a re go Jehofa: “Wena Modimo wa Isiraele, araba ka go diriša Thumime!” Ke moka gwa kgethwa Jonathane le Saulo, gomme batho ba tšwa ditabeng.
42 Saulo a re: “Dirang matengwa gore go bonwe yo a lego molato magareng ga ka le morwa wa ka Jonathane.” Ke moka gwa kgethwa Jonathane.
43 Saulo a re go Jonathane: “Mpotše, o dirile’ng?” Jonathane a re go yena: “Ke ile ka latswa todinyana ya dinose yeo e bego e le ntlheng ya molamo wa ka. Ke nna yo! Ke ikemišeditše go hwa!”
44 Ge a re’alo Saulo a re: “Anke Modimo a nkotle a be a oketše kotlo yeo, ge e ba o ka se hwe wena Jonathane.”
45 Eupša mašole a re go Saulo: “Na Jonathane o swanetše go hwa, yena yoo a thušitšego Baisiraele go fenya ge go be go lwewa ntwa e kgolo? Taba ye ga e kwagale! Re ikana ka Jehofa yo a phelago gore ga go moriri wa hlogo ya gagwe wo o tlago go wela fase, ka gobane Modimo o mo thušitše go fenya go fihla le lehono.” Ka go re’alo batho ba phološa* Jonathane, gomme a se hwe.
46 Saulo a kgaotša go rakediša Bafilisita, ke moka Bafilisita ba ya nageng ya bona.
47 Kgoši Saulo a ba le matla mmušong wa gagwe kua Isiraele gomme a tšama a elwa le manaba a gagwe ka moka ao a mo dikologilego, e lego Bamoaba, Baamoni, Baedomo, dikgoši tša Tsoba le Bafilisita. Kae le kae mo a bego a eya gona o be a a fenya.
48 O ile a bontšha sebete, a lwa le Baamaleke gomme a ba fenya. Ke moka a phološa Baisiraele go manaba a bona.
49 Barwa ba Saulo e be e le Jonathane, Ishifi le Malaki-shua. Le gona, o be a na le barwedi ba babedi, yo mogolo e be e le Merabe gomme yo monyenyane e be e le Mikala.
50 Leina la mosadi wa Saulo e be e le Ahinoama morwedi wa Ahimaatse. Leina la molaodi wa mašole a gagwe e be e le Abenere morwa wa Nere, rangwane wa Saulo.
51 Kishe e be e le tatago Saulo gomme Nere tatago Abenere e be e le morwa wa Abiele.
52 Nakong ka moka ya ge Saulo a sa phela, o be a dula a elwa ntwa e sehlogo le Bafilisita. Ge Saulo a be a bona motho a na le matla goba a sa tšhabe selo, o be a mmitša gore a tsene mašoleng a gagwe.
Mengwalo ya tlase
^ Goba, “seripa sa tšhemo seo dikgomo di ka kgonago go se lema ka letšatši.”
^ Phetolelo ya lentšu ka lentšu e re, “letšatšing leo.”
^ Phetolelo ya lentšu ka lentšu e re, “lopolla.”
