Puku ya Pele ya Samuele 15:1-35
15 Ke moka Samuele a re go Saulo: “Jehofa o nthomile gore ke tlo go tlotša gore o be kgoši ya setšhaba sa gagwe sa Isiraele. Bjale theetša seo Jehofa a se bolelago.
2 Jehofa wa madira o re: ‘Ke tla sekiša Baamaleke ka seo ba se dirilego ge ba be ba hlasela Baisiraele nakong ya ge Baisiraele ba le tseleng ba etšwa Egepeta.
3 Bjale eya go hlasela Baamaleke gomme o ba fediše, o fediše le dilo ka moka tšeo ba nago le tšona. O se ke wa ba šokela. O bolaye monna gotee le mosadi, ngwana gotee le lesea, poo gotee le nku le kamela gotee le tonki.’”
4 Saulo a kgoboketša mašole gomme a a bala a le kua Telaima. Go be go na le mašole ao a sepelago ka maoto a 200 000 (dikete tše makgolo a mabedi) le banna ba Juda ba 10 000 (dikete tše lesome).
5 Saulo a fihla motseng wa Baamaleke gomme yena le mašole ao a bego a na le ona, ba lalela Baamaleke moeding.
6 Saulo a re go Bakeni: “Tlogang gare ga Baamaleke gore ke se le fediše le bona. Ka gobane le bontšhitše Baisiraele ka moka botho* nakong ya ge ba etšwa Egepeta.” Ke moka Bakeni ba tloga go Baamaleke.
7 Ka morago ga moo, Saulo le mašole a gagwe ba bolaya Baamaleke go tloga Hafila go fihla Shuri, yeo e lego kgauswi le Egepeta.
8 Ba bolaya batho ba bangwe ka moka ka sabola eupša ba swara Agaga kgoši ya Baamaleke gomme ba se mmolaye.
9 Saulo le mašole a gagwe ba šokela Agaga, dinku tše dikaonekaone, dikgomo tše dikaonekaone gotee le diphoofolo tše dingwe tše di nonnego le dilo ka moka tše dibotse. Ba be ba sa nyake go di fediša. Eupša dilo ka moka tšeo di bego di se na mohola le tšeo ba bego ba sa di nyake ba ile ba di senya.
10 Ke moka Jehofa a re go Samuele:
11 “Ke a itshola ge ke ile ka kgetha Saulo gore e be kgoši, ka gobane o tlogetše go ntatela e bile ga se a phetha seo ke se boletšego.” Samuele a tshwenyega kudu gomme a rapela Jehofa go tšwa pelong bošego ka moka.
12 Ge Samuele a tsoga e sa le mesong gore a yo gahlanetša Saulo, o ile a botšwa gore: “Saulo o ile Karamele gomme o itlhometše philara yeo a tlago go gopolwa ka yona, ge a fetša a ya Giligala.”
13 Mafelelong ge Samuele a fihla go Saulo, Saulo o ile a re go yena: “Anke Jehofa a go šegofatše. Ke phethile seo Jehofa a se boletšego.”
14 Eupša Samuele a re: “Go re’ng ke ekwa go lla dinku le dikgomo?”
15 Saulo a re: “Di tšerwe go Baamaleke, ka gobane mašole a ka a tšere dinku tše dikaonekaone le dikgomo tše dikaonekaone gore a tle a direle Jehofa Modimo wa gago sehlabelo. Eupša tšeo di šetšego re ile ra di senya.”
16 Samuele a re go Saulo: “Emanyana, e re ke go botše seo Jehofa a mpoditšego sona maabane bošego.” Saulo a re go yena: “Mpotše!”
17 Samuele a re: “Na o be o sa ipone o le yo monyenyane ge Jehofa a be a go kgetha gore o be kgoši ya Isiraele?
18 Ka morago Jehofa a go roma a re: ‘Sepela, o yo fediša badiradibe bao e lego Baamaleke, o lwe le bona go fihlela o ba bolaya ka moka.’
19 Bjale go re’ng o se wa kwa seo Jehofa a se boletšego? Go e na le moo, ka megabaru o ile wa kitimela go tšea dilo tšeo di thopilwego gomme wa senyetša Jehofa!”
20 Saulo a re go Samuele: “Eupša ke kwele seo Jehofa a se boletšego. Ke dirile seo Jehofa a nthomilego gore ke se dire. Ke bolaile Baamaleke ka moka ka ba ka thopa le Agaga kgoši ya Baamaleke.
21 Eupša batho ba ile ba tšea dinku le dikgomo go dilo tšeo di thopilwego gomme dilo tše dikaonekaone go tšeo di bego di swanetše go senywa, ba ile ba direla Jehofa Modimo wa gago sehlabelo ka tšona kua Giligala.”
22 Samuele a re: “Na o nagana gore Jehofa o kgahlwa kudu ke dibego tša go fišwa le dihlabelo go phala go kwa lentšu la Jehofa? Tseba gore go kwa go phala sehlabelo gomme go theetša go phala makhura a dinku tše tona.
23 Go mo hlanogela ke sebe go swana le go loya, gomme go ikgogomoša go swana le go dira maleatlana le go rapela medingwana ya diswantšho.* Ka ge o ganne go kwa seo Jehofa a se boletšego, le yena ga a sa nyaka gore o tšwele pele o le kgoši.”
24 Ke moka Saulo a re go Samuele: “Ke dirile sebe ka gobane ke tshetše taelo ya Jehofa gomme ka se dire seo o mpoditšego sona ka gobane ke be ke tšhaba batho gomme ka kwa seo ba bego ba se bolela.
25 Bjale hle ntshwarele sebe sa ka o boele le nna morago, e le gore ke yo khunamela Jehofa.”
26 Eupša Samuele a re go Saulo: “Nka se boele le wena morago, ka gobane o ganne seo Jehofa a go boditšego sona. Le gona Jehofa ga a sa nyaka gore o tšwele pele o le kgoši ya Isiraele.”
27 Ge Samuele a retologa gore a sepele, Saulo a swara morumo wa seaparo sa Samuele sa go hloka matsogo gomme sa gagoga.
28 Ke moka Samuele a re go yena: “Go swana le ge seaparo se se gagogile, Jehofa le yena o gagotše bogoši bja Isiraele go wena lehono, gomme o tla bo nea wa geno yo a go phalago.
29 Le gona, Modimo yo a hlomphegago wa Isiraele a ka se bolele maaka, e bile a ka se fetoše monagano wa gagwe ka gobane ga se motho moo e lego gore o swanetše go fetoša monagano.”
30 Ge Saulo a ekwa seo a re: “Ke dirile sebe. O se ke wa ntlontlolla mo pele ga banna ba bagolo ba setšhaba sa ka le pele ga Baisiraele ka moka. Boela le nna morago gomme ke tla ya ke khunamela Jehofa Modimo wa gago.”
31 Ka gona, Samuele a boela morago le Saulo, gomme Saulo a khunamela Jehofa.
32 Ka morago ga moo, Samuele a re: “Tlišang Agaga kgoši ya Baamaleke go nna.” Ke moka Agaga a ya go yena a dikadika* ka gobane o be a ipotša gore: “Nka se sa bolawa.”
33 Eupša Samuele a re: “Go etša ge o dirile gore basadi ba bantši ba lobe bana ka ge o ba bolaile ka tšhoša, mmago le yena o tla lla kudu go feta basadi ba bangwe ka moka.” Ka morago ga moo, Samuele a ripaganya Agaga pele ga Jehofa kua Giligala.
34 Ke moka Samuele a ya Rama gomme Saulo a ya ntlong ya gagwe kua Gibea.
35 Samuele a se sa hlwa a bona Saulo gape go ba go fihla a hlokofala, ka gobane Samuele o be a nyamišitšwe kudu ke Saulo. Le gona, Jehofa o ile a itshola ka ge a ile a dira Saulo kgoši ya Isiraele.
Mengwalo ya tlase
^ Goba, “lerato le le botegago.”
^ Phetolelo ya lentšu ka lentšu e re, “diswantšho tša terafimi.” Ke gore, medingwana ya lapa.
^ Goba mohlomongwe, “a ya go yena a sa tšhoge selo.”
