Puku ya Pele ya Samuele 22:1-23
22 Ke moka Dafida a tloga moo a tšhabela leweng la Adulama. Ge bana babo le batho ka moka ba lapeng la gabo ba ekwa seo, ba ile ba theogela go yena.
2 Batho ka moka bao ba bego ba le mathateng le bao ba bego ba na le dikoloto gotee le bao ba bego ba gatelelwa ba bokana go yena, gomme yena a ba molaodi wa bona. Bao ba bego ba na le yena e be e le batho ba e ka bago ba 400 (makgolo a mane).
3 Ka morago Dafida a tloga moo a ya Mitsipa kua Moaba gomme a re go kgoši ya Moaba: “Ke kgopela o dumelele tate le mma gore ba dule le wena go fihlela ke tseba seo Modimo a tlago go ntirela sona.”
4 Dafida a ba tlogela le kgoši ya Moaba, ba dula le yona nako ka moka ya ge a le lefelong leo le šireletšegilego.
5 Ge nako e dutše e eya, moporofeta Gada a re go Dafida: “O se ke wa dula lefelong le, tloga mo o ye nageng ya Juda.” Ke moka Dafida a tloga a ya sethokgweng sa Herethe.
6 Saulo a kwa gore Dafida le banna bao a bego a na le bona ba hweditšwe. Saulo o be a dutše ka tlase ga mohlare wa motamarisiki lefelong le le phagamego kua Gibea. O be a swere lerumo ka seatla gomme bahlanka ba gagwe ka moka ba mo dikologile.
7 Ke moka Saulo a re go bahlanka ba gagwe bao ba bego ba eme kgauswi le yena: “Hle, theetšang lena Babenjamini. Na morwa wa Jese a ka nea lena ka moka mašemo le dirapa tša meterebe go swana le ge nna ke le file? Na a ka bea lena ka moka go ba balaodi ba ba dikete le balaodi ba ba makgolo?
8 Ka moka ga lena le nthadiile, ga go yo a ntomago tsebe ge morwa wa ka a dira kgwerano le morwa wa Jese. Ga go na yo a nkwelago bohloko a mpotša gore morwa wa ka o dirile gore mohlanka wa ka a nkhutele gore a tle a ntlhasele, go swana le ge a dirile bjalo le lehono.”
9 Doege wa Moedomo yo a bego a beilwe gore e be yo mogolo go bahlanka ba Saulo, o ile a araba Saulo a re: “Ke bone morwa wa Jese a etla Nobe go Ahimeleke morwa wa Ahitubo.
10 Ahimeleke o ile a kgopelela Dafida go Jehofa, a mo nea dijo, a ba a mo fa le sabola ya Goliata wa Mofilisita.”
11 Gateetee kgoši ya roma motho gore a yo bitša Ahimeleke morwa wa moperisita Ahitubo le baperisita ka moka ba ntlong ya tatagwe bao ba bego ba le Nobe. Ka moka ga bona ba ile ba tla go kgoši.
12 Saulo a re: “Theetša hle wena morwa wa Ahitubo!” Yena a re: “Ke theeditše mong wa ka.”
13 Saulo a re go yena: “Go re’ng wena le morwa wa Jese le nthadiile, ka gore o mo fe senkgwa le sabola gotee le go mo kgopelela go Modimo? Dafida o lwa le nna e bile o nkhutetše gore a ntlhasele. Le lehono o sa dira bjalo.”
14 Ge Saulo a re’alo, Ahimeleke a mo araba ka go re: “Ke mang yo a tshepegago go swana le Dafida gare ga bahlanka ba gago ka moka, ke mokgonyana wa kgoši e bile ke molaodi wa bahlapetši ba gago. Le gona o a hlomphega ntlong ya gago.
15 Na ke thomile lehono go mo kgopelela go Modimo? Nna nka se dire selo sa mohuta woo. Anke kgoši e se ke ya galefela nna mohlanka wa yona le ba ntlo ya tate ka moka, ka gobane nna mohlanka wa gago ke be ke sa tsebe selo le gatee ka taba yeo.”
16 Eupša kgoši ya re: “Ahimeleke, ruri wena le ba lapa la tatago ka moka le tlo hwa.”
17 Ke moka kgoši ya re go bahlapetši bao ba bego ba eme kgauswi le yona: “Bolayang baperisita ba Jehofa ka gobane ba ema le Dafida. Ba be ba tseba gore o tšhabile eupša ga se ba ka ba ntoma tsebe.” Bahlanka ba kgoši bona ba be ba sa nyake go bolaya baperisita ba Jehofa.
18 Ke moka kgoši ya re go Doege: “Wena bolaya baperisita!” Gateetee Doege wa Moedomo a hlasela baperisita, gomme letšatšing leo a bolaya banna ba 85 bao ba aperego efoda ya lešela la linene.
19 O ile a bolaya le batho ba Nobe motseng wa baperisita ka sabola, a bolaya banna gotee le basadi, bana gotee le masea, a bolaya le dipoo, ditonki le dinku ka sabola.
20 Eupša morwa yo mongwe wa Ahimeleke morwa wa Ahitubo, yoo leina la gagwe e bego e le Abiathara a phonyokga gomme a tšhaba a latela Dafida.
21 Abiathara a botša Dafida a re: “Saulo o bolaile baperisita ba Jehofa.”
22 Ke moka Dafida a re go Abiathara: “Ke tsebile gabotse letšatšing lela gore ka ge Doege wa Moedomo a be a le moo, o tlo botša Saulo. Ke ikarabela ka mahu ka moka a batho ba lapa la tatago.
23 Wena dula le nna. O se ke wa boifa ka gobane yo a nyakago go go bolaya o nyaka go bolaya le nna, gomme nna ke tla go šireletša.”
