Puku ya Pele ya Samuele 27:1-12
-
Bafilisita ba fa Dafida motse wa Tsikilaga (1-12)
27 Dafida a bolela ka pelo a re: “Ka letšatši le lengwe Saulo o tlo mpolaya. Go kaone gore ke tšhabele nageng ya Bafilisita, ke moka Saulo o tla tlogela go nyakana le nna nageng ka moka ya Isiraele gomme ka mo tšhabela.”
2 Dafida le banna ba 600 (makgolo a tshelelago) bao a bego a na le bona ba ile ba ya go Akishe morwa wa Maoko, kgoši ya Gathe.
3 Dafida le banna bao a bego a na le bona ba ile ba dula le Akishe kua Gathe, yo mongwe le yo mongwe a dula le lapa la gagwe. Dafida o be a na le basadi ba gagwe ba babedi, e lego Ahinoama wa Mojeseriele le Abigaile wa Mokaramele, yoo e bego e le mosadi wa Nabala.
4 Ge Saulo a ekwa gore Dafida o tšhabetše Gathe, o ile a kgaotša go nyakana le yena.
5 Dafida a re go Akishe: “Ge e ba o bona go lokile, ke kgopela o nnee lefelo leo nka dulago go lona go e mengwe ya metsana ya naga ye. Go kaone gore nna mohlanka wa gago ke dule go e mengwe ya metse ye go e na le gore ke dule ka motseng wa bogoši le wena.”
6 Ka gona, ka letšatši leo Akishe a mo nea Tsikilaga. Ke ka baka leo Tsikilaga e lego motsana wa dikgoši tša Juda go ba go fihla le lehono.
7 Dafida o dutše motsaneng wa Bafilisita ngwaga le dikgwedi tše nne.
8 Dafida le banna bao a bego a na le bona, ba be ba fela ba eya go lwa le Bageshuri, Bageritsi le Baamaleke, ka gobane ba be ba dula nageng yeo e bego e tloga Telama e fihla Shuri gomme e eya nageng ya Egepeta.
9 Ge Dafida a hlasela dinaga tše, o be a bolaya banna le basadi ka moka, a tšea dinku le dikgomo, ditonki, dikamela le diaparo, ke moka ka morago a boela go Akishe.
10 Ge Akishe a botšiša a re: “Le tšwa go hlasela kae lehono?” Dafida o be a re: “Re tšwa go hlasela ka borwa bja Juda, goba bja Bajerahamiele goba bja Bakeni.”
11 Dafida o ile a bolaya banna le basadi ka moka, gore go se be le yoo a tlišwago Gathe, ka gore Dafida o be a re: “E le gore ba se ke ba bolela ka rena ba re: ‘Dafida o dirile se.’” (Se ke seo Dafida a bego a se dira nakong ka moka ya ge a be a dula motsaneng wa Bafilisita.)
12 Ka gona Akishe a kgolwa Dafida, gomme a ipotša a re: “Ka nnete batho ba gabo ba Isiraele ba swanetše go ba ba mo hloile, e tla dula e le mohlanka wa ka go ya go ile.”
