Puku ya Pele ya Samuele 28:1-25
-
Saulo o ya go mosadi yo a nago le bokgoni bja go dirišana le batemona kua Endoro (1-25)
28 Ka nako yeo, Bafilisita ba ile ba kgobokanya mašole a bona gore ba yo lwa le Baisiraele. Akishe a re go Dafida: “O tseba gabotse gore wena le banna bao o nago le bona le swanetše go ya le nna ntweng.”
2 Ge a re’alo Dafida a re: “O tseba gabotse seo nna mohlanka wa gago ke tlago go se dira.” Akishe yena a re go Dafida: “Ke ka baka leo ke tlago go go kgetha gore o dule o le mohlapetši wa ka.”
3 Ka nako yeo Samuele o be a šetše a hlokofetše, le gona Baisiraele ka moka ba be ba šetše ba mo lletše e bile ba mmoloketše kua Rama motseng wa gabo. Saulo o be a rakile batho bao ba dirišanago le batemona le bao ba rego ba botša batho dilo tšeo di tlago go direga nakong e tlago.
4 Bafilisita ba kgobokana gomme ba ya ba hloma ditente kua Shunema. Saulo yena a kgoboketša Baisiraele ka moka gomme ba hloma ditente kua Giliboa.
5 Ge Saulo a bona mašole a Bafilisita o ile a tšhoga kudu, ke moka pelo ya gagwe ya thoma go betha ka lebelo.
6 Le ge Saulo a be a fela a kgopela Jehofa gore a mo hlahle, Jehofa yena ga se a ka a mo araba, e ka ba ka ditoro goba ka Urime* goba ka baporofeta.
7 Mafelelong Saulo a re go bahlanka ba gagwe: “Nnyakeleng mosadi yo a nago le bokgoni bja go dirišana le batemona, gomme ke tlo ya go yena ka yo mmotšiša.” Bahlanka ba gagwe ba re: “Go na le mosadi yo a nago le bokgoni bja go dirišana le batemona kua Endoro.”
8 Saulo a dira gore batho ba se mo tsebe gomme a apara diaparo tše dingwe, a ya go mosadi yoo a na le banna ba gagwe ba babedi e le bošego. A re: “Hle, dira maleatlana gomme o mpotše seo se tlago go ntiragalela nakong e tlago, ke moka o mpiletše motho yo ke tlago go go botša yena.”
9 Eupša Mosadi yoo a re go Saulo: “Wena o tseba gabotse seo Saulo a se dirilego, le kamoo a rakilego batho bao ba dirišanago le batemona le bao ba rego ba botša batho dilo tšeo di tlago go direga nakong e tlago. Bjale ke ka baka la’ng o leka go ntlhalefetša e le gore ke bolawe?”
10 Ke moka Saulo a mo enela ka Jehofa a re: “Ke ikana ka Jehofa yo a phelago gore o ka se be le molato tabeng ye!”
11 Ke moka mosadi yoo a re: “Ke go biletše mang?” Saulo a re: “Mpiletše Samuele.”
12 Ge mosadi yoo a bona “Samuele”* a goeletša kudu, a re go Saulo: “Ke ka baka la’ng o nthadiile? Ke wena Saulo!”
13 Kgoši ya re go yena: “O se ke wa boifa, o bona’ng?” Mosadi yoo a re go Saulo: “Ke bona motho yo a swanago le modimo a rotoga a etšwa fase.”
14 Gateetee Saulo a re: “Motho wa gona o bjang?” Mosadi yoo a re: “Ke mokgalabje yo a aperego seaparo sa go hloka matsogo.” Ke moka Saulo a lemoga gore ke “Samuele,” gomme a khunama hlogo ya gagwe e kgwathile fase go bontšha gore o a mo hlompha.
15 Ke moka “Samuele” a re go Saulo: “Ke ka baka la’ng o ntšhitiša ka go dira gore ke bitšwe?” Saulo yena a re: “Ke mathateng a šiišago. Bafilisita ba lwa le nna gomme Modimo o ntlogetše e bile ga a sa nkaraba, e ka ba e le ka baporofeta goba ka ditoro. Ke ka baka leo ke go bitšago gore o mpotše seo ke swanetšego go se dira.”
16 “Samuele” a re: “Ke ka baka la’ng o etla go botšiša nna gona bjale mola o bona gore Jehofa o go tlogetše e bile ke lenaba la gago?
17 Seo Jehofa a nthomilego go se bolela e sa le pele o tla se phetha, Jehofa o tla tloša mmušo seatleng sa gago a o nea yo mongwe wa banna ba geno, e lego Dafida.
18 Jehofa o tla go dira sona se ka ge o se wa mo kwa e bile o se wa ka wa fediša Baamaleke bao ba bego ba galefišitše Jehofa kudu.
19 Jehofa o tla dira gore wena le Baisiraele le fenywe ke Bafilisita, gomme gosasa ba tla bolaya wena le barwa ba gago gore le tle le be le nna. Le gona, Jehofa o tla dira gore Bafilisita ba fenye mašole a Baisiraele.”
20 Gateetee Saulo a rapalala fase gomme a boifa kudu ka baka la seo “Samuele” a se boletšego. O be a se na matla ka ge a be a se a ja dijo letšatši ka moka le bošego ka moka.
21 Ge mosadi yoo a etla go Saulo gomme a bona gore o tshwenyegile kudu, a re go yena: “Nna mohlanka wa gago ke kwele seo o se boletšego, ka ipea kotsing gomme ka dira seo o mpoditšego sona.
22 Bjale hle, theetša seo nna mohlanka wa gago ke go botšago sona. E re ke go nee senkgwanyana o se je gore o be le matla ka gobane o tlo sepela.”
23 Saulo a gana, a re: “Nka se je.” Eupša bahlanka ba gagwe le mosadi yoo ba mo gapeletša. Mafelelong a ba theetša, ke moka a tsoga a dula setulong.
24 Mosadi yoo o be a na le namane yeo e nonnego lapeng la gagwe. A emelela kapelapela a e hlaba,* a tšea flouru, a duba hlama gomme a dira dinkgwa tše di sa omelwago.
25 A di nea Saulo le bahlanka ba gagwe ba di ja. Ka morago ga moo ba sepela bošegong bjoo.
Mengwalo ya tlase
^ Bona Tlhaloso ya Mantšu.
^ Goba, “selo seo se bego se bonagala eka ke Samuele.”
^ Goba, “a dira sehlabelo.”
