Puku ya Pele ya Samuele 31:1-13
-
Saulo le barwa ba gagwe ba bararo ba a hlokofala (1-13)
31 Bafilisita ba ile ba lwa le Baisiraele gomme mašole a Baisiraele a tšhaba Bafilisita. Baisiraele ba bantši ba ile ba bolaelwa Thabeng ya Giliboa.
2 Bafilisita ba hlasela Saulo le barwa ba gagwe, gomme ba bolaya barwa ba gagwe e lego Jonathane, Abinadaba le Malaki-shua.
3 Bafilisita ba ile ba lwa le Saulo kudu. Mafelelong batho bao ba bego ba thuntšha mesebe ka bora ba mo hwetša ke moka ba mo gobatša o šoro.
4 Ke moka Saulo a botša morwadi wa dibetša tša gagwe a re: “Tšea sabola ya gago o mpheleletše ka yona, e le gore banna ba ba go se bolle ba se tle ba mpheleletša gomme ba nkgoboša.” Eupša morwadi wa dibetša tša gagwe yena o be a sa nyake go dira seo ka gobane o be a boifa o šoro. Ka gona Saulo a tšea sabola a itahlela godimo ga yona.
5 Ge morwadi wa dibetša tša Saulo a bona gore Saulo o hwile, le yena a itahlela godimo ga sabola ya gagwe gomme a hwa gotee le yena.
6 Ka gona letšatšing leo, Saulo le barwa ba gagwe ba bararo le morwadi wa dibetša tša gagwe gotee le bahlanka ba gagwe ka moka ba ile ba hwa.
7 Ge banna ba Baisiraele bao ba bego ba le moeding le bao ba bego ba le tikologong ya Noka ya Jorodane ba bona gore mašole a Baisiraele a tšhabile le gore Saulo le barwa ba gagwe ba hwile, ba ile ba tlogela metse ya bona gomme ba tšhaba. Ka morago ga moo, Bafilisita ba tla ba dula metseng yeo.
8 Letšatšing le le latelago, ge Bafilisita ba etla go utswa dilo tša batho bao ba bolailwego, ba ile ba hwetša Saulo le barwa ba gagwe ba bararo ba hwile Thabeng ya Giliboa.
9 Ke moka ba kgaola hlogo ya gagwe, ba tšea le dibetša tša gagwe gomme ba romela molaetša nageng ka moka ya Bafilisita gore Bafilisita ba tsebiše bao ba lego ditempeleng tša medingwana ya bona le setšhaba ka moka ka taba yeo.
10 Ke moka ba bea dibetša tša gagwe ka ntlong ya medingwana ya diswantšho tša Ashiterothe, gomme setopo sa gagwe ba se bofelela lebotong la Bethe-shane.
11 Ge badudi ba Jabeshe-gileada ba ekwa ka seo Bafilisita ba se dirilego Saulo,
12 mašole ka moka a matla a tsoga gomme a sepela bošego ka moka a yo tloša setopo sa Saulo le ditopo tša barwa ba gagwe lebotong la Bethe-shane. A boela Jabeshe, gomme a di fišetša moo.
13 Ke moka mašole ao a tšea marapo a bona a a bolokela ka tlase ga mohlare wa motamarisiki kua Jabeshe, gomme a ikona dijo ka matšatši a šupago.
