Puku ya Pele ya Samuele 6:1-21
-
Bafilisita ba bušetša Areka nageng ya Isiraele (1-21)
6 Areka ya Jehofa ya dula nageng ya Bafilisita dikgwedi tše šupago.
2 Bafilisita ba bitša baperisita le dinoge ba ba botšiša ba re: “Re dire’ng ka Areka ya Jehofa? Re botšeng gore re ka e romela bjang moo e tšwago gona.”
3 Bona ba re: “Ge e ba le bušetša areka ya kgwerano ya Jehofa Modimo wa Isiraele morago le se ke la e bušetša e se na sebego, le swanetše go kgonthišetša gore le e bušetša e na le sebego sa go kgopela tshwarelo. Ge le ka dira bjalo, le tla fodišwa gomme la tseba gore ke ka baka la eng Modimo a sa kgaotše go le otla.”
4 Bafilisita ba re: “Sebego sa go kgopela tshwarelo seo re swanetšego go mo nea sona ke’ng?” Bona ba re: “Go ya ka palo ya dikgoši tša Bafilisita, romelang diswantšho tše hlano tša gauta tša dikaku le diswantšho tše hlano tša gauta tša magotlo, ka gobane yo mongwe le yo mongwe wa lena le dikgoši tša lena le hweditše kotlo e swanago.
5 Le swanetše go dira diswantšho tša dikaku tša lena le diswantšho tša magotlo a lena ao a senyago naga gomme le hlomphe Modimo wa Isiraele. Mohlomongwe a ka tlogela go otla lena le modimo wa lena le naga ya lena.
6 Ke ka baka la’ng le thatafatša dipelo tša lena go etša kamoo Baegepeta le Farao ba ilego ba thatafatša dipelo tša bona ka gona? Ge Modimo a be a ba otla gasehlogo, ba ile ba lesa Baisiraele gore ba tloge, ke moka Baisiraele ba tloga.
7 Bjale tšeang kariki e mpsha le dikgomo tše pedi tšeo di sa kago tša rwešwa joko, tšeo di nago le dinamane le di pane kariking. Eupša dinamane tša tšona le di gomišetše gae, di be kgole le bommago tšona.
8 Le tšee Areka ya Jehofa le e nametše kariking gomme diswantšho tša gauta tšeo le di neago Modimo e le sebego sa go kgopela tshwarelo le di tsenye ka lepokising leo le lego kgauswi le areka. Ke moka le lese kariki e sepele
9 gomme le e lebelele. Ge e ba kariki e ka sepela ka tsela ya go ya Bethe-shemeshe, e lego moo areka e tšwago gona, gona ke Modimo yo a re baketšego dilo tše tše sehlogo. Eupša ge e ba go se bjalo, gona re tla tseba gore ga se yena a re otlilego, e be e le kotsi feela.”
10 Bafilisita ba dira ka wona mokgwa woo. Ba tšea dikgomo tše pedi tšeo di bego di na le dinamane ba di pana kariking gomme dinamane tša tšona ba di tswalelela ka lešakeng.
11 Ba nametša Areka ya Jehofa kariking, ba nametša le lepokisi leo le bego le rwele magotlo a gauta le diswantšho tša dikaku tša bona.
12 Dikgomo tša sepela thwii ka tsela yeo e lebilego Bethe-shemeshe. Tša sepela tseleng e kgolo di tšama di lla. Ga se tša arogela ka go le letona goba ka go le letshadi. Dikgoši tša Bafilisita tšona di be di sepela di šetše dikgomo tšeo morago go ba go fihla mollwaneng wa Bethe-shemeshe.
13 Batho ba Bethe-shemeshe ba be ba buna korong moeding. Ge ba emiša mahlo gomme ba bona Areka, ba ile ba thaba kudu.
14 Kariki yeo ya tsena ka tšhemong ya Joshua wa Mobethe-shemeshe ya ema kgauswi le leswika le legolo gona ka moo tšhemong yeo. Ke moka ba phapha dikgong tša kariki yeo gomme dikgomo tšeo ba di neela Jehofa e le sebego sa go fišwa.
15 Balefi ba fološa Areka ya Jehofa le lepokisi leo le bego le tlile le yona leo le bego le rwele diswantšho tša gauta, ba di bea leswikeng le legolo. Batho ba Bethe-shemeshe ba neela Jehofa dibego le go mo direla dihlabelo letšatšing leo.
16 Ge dikgoši tše hlano tša Bafilisita di bona seo, tša gomela morago Ekirone lona letšatšing leo.
17 Bafilisita ba ile ba romela diswantšho tše hlano tša gauta tša dikaku e le sebego sa go kgopela tshwarelo go Jehofa. Ba ile ba romela se setee sa Baashidodo, se setee sa Bagatsa, se setee sa Baashikaloni, se setee sa Bagathe le se setee sa Baekirone.
18 Diswantšho tša magotlo a gauta di be di lekana le palo ya metse ka moka ya Bafilisita ye e lego ya dikgoši tše hlano go tloga ka metse ye e šireleditšwego go fihla ka metsana ya nageng.
Leswika le legolo leo ba bego ba beile Areka ya Jehofa godimo ga lona ke bohlatse go ba go fihla le lehono nageng ya Joshua wa Mobethe-shemeshe.
19 Eupša Modimo a bolaya banna ba Bethe-shemeshe, ka gobane ba ile ba tsepelela Areka ya Jehofa. Gare ga bona, o ile a bolaya ba 50 070 (dikete tše masomehlano le masome a šupago) gomme batho ba thoma go lla ka gobane Jehofa o be a bolaile batho ba bantši.
20 Banna ba Bethe-shemeshe ba botšiša ba re: “Ke mang yo a tlago go kgona go ema pele ga Jehofa Modimo yo yo mokgethwa? Na ga go kgonege gore a re tlogele gomme a ye go hlasela ba bangwe?”
21 Ba romela baromiwa go badudi ba Kiriathe-jearima, ba re: “Bafilisita ba bušitše Areka ya Jehofa. Theogang le e tšee le rotoge le yona.”
