Puku ya Pele ya Samuele 8:1-22
8 Ge Samuele a tšofetše o ile a kgetha barwa ba gagwe ba babedi gore e be baahlodi ba Isiraele.
2 Leina la morwa wa gagwe wa mathomo e be e le Joele, la wa bobedi e le Abija. Ba be ba ahlolela ba le Beresheba.
3 Eupša barwa ba gagwe ga se ba latela mohlala wa gagwe. Ba be ba tlwaetše go hwetša tšhelete ka boradia, ba amogela pipamolomo e bile ba sa sware batho ka toka.
4 Ge nako e dutše e eya, banna ba bagolo ka moka ba Isiraele ba ile ba kgobokana gomme ba tla go Samuele kua Rama.
5 Ba ile ba re: “Wena o tšofetše, eupša barwa ba gago ga ba latele mohlala wa gago. Bjale, re kgethele kgoši gore e re ahlolele go swana le ditšhaba tše dingwe ka moka.”
6 Eupša Samuele ga se a kgahlwa ke ge ba re: “Re fe kgoši yeo e tlago go re ahlolela.” Ke moka Samuele a rapela Jehofa,
7 gomme Jehofa a re go yena: “Theetša dilo ka moka tšeo batho ba ba go botšago tšona, ka gobane ga se wena ba go gannego, eupša ba ganne nna gore ke be kgoši ya bona.
8 Ba sa dira dilo tšeo ba di dirilego go tloga letšatšing leo ke ba ntšhitšego Egepeta go fihla le lehono. Ba dula ba ntlogela gore ba hlankele medimo e mengwe, le wena ba go dira tšona tšeo.
9 Ka gona theetša seo ba se bolelago. Eupša o ba botše tsebe-go-kwa ka ditlamorago, o be o ba botše gore kgoši yeo e tlago go ba buša e tla ba le tshwanelo ya go nyaka dilo tše itšego go bona.”
10 Ke moka Samuele a botša batho bao ba bego ba nyaka gore a ba kgethele kgoši dilo ka moka tšeo Jehofa a di boletšego.
11 A re: “Kgoši ye e tlago go le buša e tla ba le tshwanelo ya go dira dilo tše di latelago: E tla tšea barwa ba lena gomme ya ba dira gore ba otlele dikoloi tša yona tša ntwa, ya ba dira gore e be banamedi ba dipere tša yona gomme ba bangwe ya ba dira gore ba kitime pele ga dikoloi tša yona tša ntwa.
12 E tla ikgethela baetapele bao ba tlago go buša dihlopha tša ba 1 000 (sekete) le baetapele bao ba tlago go buša dihlopha tša ba 50. Ba bangwe ba tla e lemela le go e bunela dilo tšeo di bjetšwego, ba e direla dibetša tša ntwa le ditlabakelo tša dikoloi tša yona tša ntwa.
13 E tla tšea barwedi ba lena gore ba dire ditlolo,* ba apee le go dira dinkgwa.
14 E tla tšea mašemo a lena a mabotse, dirapa tša lena tša meterebe le tša mehlware gomme ya di nea bahlanka ba yona.
15 E tla tšea karolo ya lesome ya mašemo a mabele le ya dirapa tša meterebe ya lena gomme ya di nea baetapele ba yona bao ba šomago kgorong le bahlanka ba yona.
16 Le gona, e tla tšea bahlanka ba lena ba banna le ba basadi le mehlape ya lena yeo e phetšego gabotse kudu le ditonki tša lena, gomme ya di dirišetša modiro wa yona.
17 E tla tšea karolo ya lesome ya mehlape ya lena gomme lena la ba bahlanka ba yona.
18 Go tla tla letšatši leo le tlago go lla ka lona ka baka la kgoši ya lena yeo le ikgethetšego yona, gomme la kgopela Modimo gore a le thuše, eupša Jehofa a ka se le arabe.”
19 Lega go le bjalo, Baisiraele ba gana go theetša dilo tšeo Samuele a ba boditšego tšona gomme ba re: “Aowa, rena re nyaka go bušwa ke kgoši.
20 Ke moka re tla swana le ditšhaba tše dingwe ka moka gomme kgoši ya rena ya re ahlolela, ya re eta pele, ya ba ya lwa le manaba a rena.”
21 Ge Samuele a kwele dilo ka moka tšeo batho ba di bolelago, o ile a di botša Jehofa.
22 Jehofa a re go Samuele: “Theetša seo ba se bolelago gomme o ba kgethele kgoši gore e ba buše.” Ke moka Samuele a re go setšhaba sa Isiraele: “Yo mongwe le yo mongwe a a ye motseng wa gabo.”
Mengwalo ya tlase
^ Goba, “ba dire dinkgišabose.”
